NTHIMO 3 - Mbivilia

Motao ma wĩwi

¹ Mwana wakwa, ndũkolwe nĩ mĩao yakwa; Ĩndĩ ngoo yaku nĩlũmye mĩao yakwa:

² Nũndũ ĩkakwongeleela mĩthenya mingĩ, Na myaka ya thayũ na mũuo,

³ Ndũkaaĩtĩkĩle ũseo na w’o ikũtie: Syoveee ngingonĩ yaku; Iandĩke ĩsengeanĩ ya ngoo yaku:

⁴ Na ĩndĩ ũkoona ũseo na ũmanyi mũseo Methonĩ ma Ngai na ma mũndũ.

⁵ Ĩkĩĩa Yeova na ngoo yaku yonthe, Na ndũkekwatye ũmanyi waku mwene:

⁶ Mĩendelenĩ yaku yonthe mũkũsĩĩe we, Na akaũlũngalĩlya nzĩa syaku.

⁷ Ndũkethĩwe na ũĩ wa metho maku mwene; Mũkĩe Yeova, na ũitia ũthũku:

⁸ Ũkakwĩkĩa vinya mũkonyo waku, Na mũthungo mavĩndĩ maku.

⁹ Mũtaĩe Yeova na syĩndũ syaku, Na ũsyao wa mbee wa wingĩvo waku w’onthe:

¹⁰ Na kwondũ wa ũu makũmbĩ maku makausũwa nĩ wingĩ, Na maviva maku makausũa na kũng’okwa nĩ mbinyu mbĩthĩ.

¹¹ Mwana wakwa, ndũkavũthye makũna ma Yeova; O na ndũkanow’e nĩ mokan’yo make:

¹² Nũndũ ũla Yeova ũmwendaa nũmũkanasya, O tondũ ĩthe wĩkaa mwana ũla ũtanaa kwondũ wake.

¹³ Mũndũ nĩ mũtanu ũla wonaa ũĩ, Na mũndũ ũla ũkwataa ũmanyi.

¹⁴ Nũndũ kwĩthĩwa naw’o kwĩ kavaa kwĩ kwĩthĩwa na vetha, Na ũtandĩthyo waw’o kwĩ thaavu ũla mũseo.

¹⁵ Wĩ na vata mũno kwĩ tũvila twa maliani: Na vati kĩmwe kya syĩndũ ila ũtonya kwenda kĩtonya kũvw’ananw’a naw’o.

¹⁶ Mĩthenya mingĩ yĩ kw’okonĩ kwaw’o kwa aũme; Kw’okonĩ kwaw’o kwa aka ve mothwii na ndaĩa.

¹⁷ Mĩendele yaw’o nĩ mĩendele ya kwendeesya, Na nzĩa syaw’o syonthe nĩ sya mũuo.

¹⁸ Nĩ mũtĩ wa thayũ kwa ala mokwataa: Na kĩla ũmwe nĩ mũtanu ũla wĩkalaa naw’o.

¹⁹ Yeova kwondũ wa ũĩ nĩwakwatisye wambĩlĩlyo wa nthĩ; Kwondũ wa ũmanyi nĩwalũlũmĩlye matu.

²⁰ Kwondũ wa ũmanyi wake syũngũ nĩsyavingũkie, Na matu nĩmavolotangasya ĩmwe.

²¹ Mwana wakwa, ndũkaeke syume methonĩ maku; Sũvĩa ũĩ mwĩanĩu na kĩlĩko:

²² Kwondũ wa ũu ikeethĩwa thayũ wa ngoo yaku, Na mumo ngingonĩ yaku.

²³ Nĩvo ĩndĩ wĩendaa mĩendelenĩ yaku wĩyelele, Na kũũ kwaku kũtikalulutĩka.

²⁴ Yĩla wĩkoma, ndũkakĩa: Ĩĩ, ũkakoma, na too waku ũkeethĩwa wĩ mũyo.

²⁵ Ndũkakĩe w’ĩa wa kĩthũlũmũko, O na wanangĩko wa ala athũku, yĩla wĩũka:

²⁶ Nũndũ Yeova akeethĩwa ũĩkĩĩi waku, Na akakũsũvĩa kũũ kwaku kũikakwatw’e.

²⁷ Ndũkamaime ũndũ ũseo ala maĩlwe nĩw’o, Yĩla wĩ ũtonyinĩ wa kw’oko kwaku wa kũwĩka.

²⁸ Ndũkatavye mũtũi waku, Enda, na ũkyũka ĩngĩ, Na ũnĩ ngakũnenga; Naku nũkwete ĩ kĩndũ.

²⁹ Ndũkasũanĩĩe mũtũi waku ũthũku, Nũndũ atwĩe eyelele vakuvĩ naku.

³⁰ Ndũkatetan’ye na mũndũ vate kĩtumi, Ethĩwa ndakwĩkĩte ũthũku.

³¹ Ndũkamwĩw’ĩe kĩwĩu mũndũ wa ũng’endu, Na ndũkanyuve o na ũmwe wa mĩendele yake.

³² Nũndũ ũla wĩ ngũlũ nĩ ũthatyo kwa Yeova; Ĩndĩ ũnyanya wake nĩ wake na ũla mũlũngalu.

³³ Kĩumo kya Yeova kĩ nyũmbanĩ ya ũla mũthũku; Ĩndĩ nũathimaa ũtũo wa ala alũngalu.

³⁴ Vate ndĩi nũvũthasya ala mavũthasya; Ĩndĩ anengae mumo ala menyivasya.

³⁵ Ala oĩ makatiĩwa ndaĩa; Ĩndĩ nthoni ikeethĩwa ũnene wa ndia.