NTHIMO 25 - Mbivilia

Mosyaanĩsyo na momanyĩsyo ma mwĩkalo mũseo

¹ Ii nasyo nĩ nthimo sya Solomoni, ila andũ ma Esekia mũsumbĩ wa Yũta meeyumĩĩĩsye.

² Nĩ ũtaĩo wa Ngai kũvitha ũndũ; Ĩndĩ ũtaĩo wa asumbĩ nĩ kũmantha ũndũ.

³ O tondũ matunĩ kũtũlĩte, na nthĩ kũlikĩte, Now’o ngoo ya asumbĩ ndĩmanthĩka.

⁴ Umya makwaũ nthĩnĩ wa vetha, Na kũkaumĩla mũio kwondũ wa mũui waw’o;

⁵ Umya ala athũku mbee wa mũsumbĩ, Na kĩvĩla kyake kya ũsumbĩ kĩkalũlũmĩlw’a ũlũngalunĩ.

⁶ Ndũkenenevye vala ve mũsumbĩ, Na ndũkaũngame vandũnĩ va andũ anene:

⁷ Nũndũ nĩ kavaa ũkewa, Ambata vaa, Kwĩ kũtheeangw’a mũnene wĩ mbee ũsumbĩnĩ ene, Ũla metho maku mamwonete.

⁸ Ndũkaumaale mĩtũkĩ ũkatete, Ndũkese kũlea kũmanya wa kwĩka mũminũkĩlyonĩ waw’o, Yĩla mũtũi waku ũkũsonoketye.

⁹ Ĩoan’ye na mũtũi waku, Na ndũkavuan’ye nzama ya ũngĩ;

¹⁰ Ũla ũmĩw’aa ndakese ũkũuma, Na nguma yaku nthũku ĩkĩlea kũvetwa.

¹¹ Ndeto ĩneenawa ĩvinda yayo Nĩ ta mosyao ma mũevo ma thaavu kĩkavũnĩ kya vetha.

¹² Ta ngome ya kũtũ ya thaavu, na wananake wa thaavu mũseo, Now’o kũilyĩ mũkan’ya mũĩ kũtũnĩ kũla kwĩw’aa.

¹³ Ta mbevo ya ĩa ĩvinda ya ngetha, Now’o ũilyĩ mũtũmwa wĩ kĩthito kwa ala mamũtũmaa; Nũndũ nũvuũkasya ngoo ya mavwana make.

¹⁴ Ta mathweo na kĩseve vate mbua, Now’o ũilyĩ ũla wĩkathĩĩaa na ũkengani kwondũ wa mĩthĩnzĩo yake.

¹⁵ Kwondũ wa kũmĩĩsya ĩvinda ĩasa mũsumbĩki nũtonya kũkikw’a, Na ũĩmĩ mwololo nũtũlaa ĩvĩndĩ.

¹⁶ Nĩwonete ũkĩ wa nzũkĩ? Ya ũla ũkwĩanĩe, Ndũkese kusũwa nĩw’o, noyũtavĩka.

¹⁷ Kũũ kwaku kũikethĩwe nyũmbanĩ ya mũtũi waku kaingĩ, Ndakese kũnow’a nue, na akĩkũmena.

¹⁸ Mũndũ ũla ũmũkũsĩĩa mũtũi wake ũvũngũ Nĩ kĩiva kya mũtĩ, na ũvyũ, na mũsyĩ mũĩ.

¹⁹ Uĩkĩĩi mũndũnĩ ũte kĩthito ĩvinda ya thĩna Nĩ ta ĩeo ĩtũlĩku, na kũũ kũkitũku.

²⁰ O tondũ mũndũ ũla wumasya ngũa ĩvinda ya mbevo, na ta siki ĩũlũ wa ĩtai, Now’o ũilyĩ ũla winĩaa ngoo ngito mbathi.

²¹ Ethĩwa mũmaitha waku e na nzaa, mũnenge lĩu wa kũya; Na ethĩwa e na waũni, mũnenge manzĩ ma kũnyw’a:

²² Nũndũ ũkamũmbĩĩa makaa ma mwaki mũtwenĩ wake, Na Yeova akakũĩva.

²³ Kĩseve kyumĩte ngalĩ ya ĩũlũ nĩkĩetae mbua; Now’o ũĩmĩ wĩ nzuku ũetae ũthyũ mũthatu.

²⁴ Nĩ kavaa kũtũa kĩkotonĩ kya nyũmba ĩũlũ, Kwĩ kũtũa na mũndũ mũka wĩ ĩteta nyũmbanĩ nthanthau.

²⁵ Ta manzĩ mathithu kwa mũndũ wĩ waũni, Now’o ũilyĩ ũvoo mũseo wumĩte nthĩ yĩ kũasa.

²⁶ Ta nthongo nthokoan’ye, na mbuluti mbukye, Now’o ũilyĩ mũndũ mũlũngalu ũla ũkusĩkaa nĩ ala athũku.

²⁷ Ti ũseo kũya ũkĩ wa nzũkĩ mwingĩ; No ta ũu andũ kũmantha ndaĩa yoo ene nĩ ũthũku.

²⁸ Ũla ũtasiĩĩaa veva wake Nĩ ta ndũa ĩla ĩomboetwe na ĩte na maũvai.