NTHIMO 24 - Mbivilia

¹ Ndũkamew’ĩe kĩwĩu andũ athũku; O na ndũkende kwĩthĩwa nao.

² Nũndũ ngoo syoo nĩsũanĩaa kũthĩn’ya, Na ilomo syoo nineenaa ũndũ wa ũthũku.

³ Kwondũ wa ũĩ nyũmba nĩyakawa; Na kwondũ wa ũmanyi nĩlũmaw’a;

⁴ Na kwondũ wa ũĩ tũsũmba nĩtusũaw’a Mothwii onthe me vata mũno na ma kwendeesya.

⁵ Mũndũ mũĩ e na vinya; Ĩĩ, mũndũ wa ũmanyi nĩwingĩvasya ũtonyi.

⁶ Nũndũ kwondũ wa ũtongoi mũĩ ũkakwatya kaũ waku; Na wingĩnĩ wa atai kwĩ ũkĩlyo.

⁷ Ũĩ wĩ ĩũlũ mũno kũmĩvĩtũka ndia: Ndĩathamĩasya kanyw’a wayo mbingĩlonĩ.

⁸ Ũla ũsũanĩaa kwĩka ũthũku, Andũ makamwĩta mũkwatya wa ũthũku.

⁹ Ũsũanĩo wa ũtumanu nĩ naĩ; Na mũkaakaan’ya nĩ ũthatyo wa andũ.

¹⁰ Ethĩwa nũnyalaa mũthenya wa thĩna, Vinya waku nĩ mũnini.

¹¹ Vonokya ala matwaawa kĩkw’ũnĩ, Na ala makilĩlye kũawa sĩsya kana ũmasiĩĩe.

¹² Ethĩwa wĩasya, Sisya, tũtyaamanya ũu; Ũla ũthimaa ngoo ndasũanĩaa ũu? Na ũla ũsũvĩaa ngoo yaku, ndesĩ ũu? Na ndakamũĩva kĩla mũndũ kwĩanana na wĩa wake?

¹³ Mwana wakwa, ya ũkĩ wa nzũkĩ, nũndũ nĩ mũseo; Na mavolotango ma ĩwa me mũyo ũkĩmasama:

¹⁴ O ta ũu ũkamanya ũĩ ũilyĩ ũu kwa ngoo yaku; Ethĩwa nũwonete, nĩvo kũkethĩwa ĩtuvi, Na wĩkwatyo waku ndũkavetwa.

¹⁵ We mũndũ mũthũku ndũkoveesye ũtũo wa ũla mũlũngalu; Ndũkaanange vandũ vake va ũthũmũa:

¹⁶ Nũndũ mũndũ mũlũngalu nũvalũkaa mavinda mũonza, na kũkĩla ĩngĩ: Ĩndĩ ala athũku nĩmanangawa nĩ wanangĩko mũnene.

¹⁷ Ndũkatane yĩla mũmaitha waku ũvalũkaa, Na ngoo yaku ndĩkatane yĩla wanangĩkaa;

¹⁸ Yeova ndakese kũwona, na ũkamwĩw’ĩthya woo, Na aithyũũa ũthilĩku wake ume kwake.

¹⁹ Ndũkenyamasye ũndũ wa eki ma ũthũku; O na ndũkamew’ĩe kĩwĩu ala athũku:

²⁰ Nũndũ kũikethĩwa ĩtuvi ya mũndũ mũthũku; Taa wa ũla mũthũku ũkavow’a.

²¹ Mwana wakwa, mũkĩe Yeova o na mũsumbĩ; Na ndũkatindan’ye na ala maalyũkaa:

²² Nũndũ wanangĩko woo mũnene ũkookĩla na kĩthũlũmũko; Na kwananga kwa asu elĩ, nũũ ũla ũkwĩsĩ?

²³ Ii nasyo nĩ ndeto sya ala oĩ. Kwendeesya andũ ũkĩsila ti kũseo.

²⁴ Ũla ũtavasya ũla mũthũku, Wĩ mũlũngalu, Ngo sya andũ ikamũuma, mbaĩ ikamũthĩtha;

²⁵ Ĩndĩ ala mamũkanasya makeethĩwa atanu, Na ũathimo mũseo ũkamokĩa.

²⁶ Nũmumunyaa ilomo Ũla ũsũngĩaa ũsũngĩo wa w’o.

²⁷ Seũvya wĩa waku na ku nza, Wĩseũvĩsye mũũnda; Na ĩtina aka nyũmba yaku.

²⁸ Ndũkamũkũsĩĩe mũtũi waku vate kĩtumi; Na ndũkakengane na ilomo syaku.

²⁹ Ndũkasye, Ngamwĩka o tondũ ũmbĩkĩte; Ngamũĩva ũ mũndũ kwĩanana na wĩa wake.

³⁰ Navĩtĩla ũtee wa mũũnda wa mũndũ mũtulu, Na mũũnda wa mĩsavivũ wa mũndũ ũtaĩ ũmanyi;

³¹ Na, sisya, wausũĩte mĩw’a, Na weekunĩkĩlw’e nĩ syĩnyeelya, Na ũvai wa mavia waw’o waĩ mũvalũku.

³² Nĩvo ĩndĩ nasiisye, na kũsũanĩa nesa; Noona, na noosa ũmanyĩsyo:

³³ Too mũnini, kwombosya vanini, Kũkwatan’ya syaa vanini ũkome;

³⁴ O ta ũu ũkya waku ũkooka ta mũvutani, Na kwaĩwa kwaku ta mũndũ wĩkĩĩte mĩio ya kaũ.