NTHIMO 23 - Mbivilia

¹ Yĩla wĩĩkala nthĩ kũya na mũsumbĩki. Sũanĩa mũno ũla wĩ mbee waku;

² Nokĩkĩa kavyũ mũmeonĩ waku, Ethĩwa wĩ mũndũ ũla wendaa kũya.

³ Ndũkende sya ũya syake nzeo; Nũndũ nĩ malĩu ma ũkengani.

⁴ Ndũkenosye wĩthĩwe mũthwii; Ekana na ũĩ waku mwene.

⁵ Ũkaketeea kĩla kĩte vo? Nũndũ vate ndĩi mothwii nĩmeseũvĩasya nthwau, Ta ndiũ ĩla ĩũlũkaa yelekele ĩtunĩ.

⁶ Ndũkaye lĩu wa ũla wĩ na itho ĩthũku, O na ndũkende sya ũya syake nzeo:

⁷ Nũndũ, o tondũ ũsũanĩaa nthĩnĩ wake mwene, now’o ũilyĩ: Ekwĩa, Ya na nyw’a; Ĩndĩ ngoo yake ndĩ vamwe naku.

⁸ Kalungu kala waya ũkakatavĩka, Na kũsyasya ndeto syaku syĩ mũyo.

⁹ Ndũkaneene ndia ĩkĩw’a; Nũndũ ĩkavũthya ũĩ wa ndeto syaku.

¹⁰ Ndũkaakũĩĩsye kyambo kya mũvaka wa tene; Na ndũkalike mĩũndanĩ ya ala makw’ĩĩwe nĩ aaĩthe:

¹¹ Nũndũ Mwovosya woo e na vinya; Akamatetanĩsya kwaku.

¹² Nengane ngoo yaku ũmanyĩsyonĩ, Na matũ maku ndetonĩ sya ũmanyi.

¹³ Ndũkasiĩĩe ũkan’yo kwa kana; Nũndũ ethĩwa ũkakakũna na ndata, kaikakw’a.

¹⁴ Ũkakakũna na ndata, Na kũvonokya thayũ wako kaikalike Seoli.

¹⁵ Mwana wakwa, ethĩwa ngoo yaku nĩ mbũĩ, Ngoo yakwa ĩkatana, o ĩ yakwa:

¹⁶ Ĩĩ, ngoo yakwa ĩkatana, Yĩla ilomo syaku ineenaa maũndũ ma w’o.

¹⁷ Ngoo yaku ndĩkamew’ĩe andũ athe kĩwĩu; Ĩndĩ ĩthĩwa ũkĩmũkĩa Yeova mũthenya w’onthe:

¹⁸ Nũndũ vate ndĩi kwĩ ĩtuvi; Na wĩkwatyo waku ndũkavetwa.

¹⁹ Ĩw’a we, mwana wakwa, na ĩthĩwa na ũĩ, Noitongoesya ngoo yaku nzĩanĩ.

²⁰ Ndũkethĩwe katĩ wa anywi ma mbinyu Katĩ wa ayi ma nyama na ũtoonu:

²¹ Nũndũ mũnywi na mũyi makavika ũkyanĩ; Na kwombosya nĩkũmũvw’ĩkaa mũndũ matani.

²² Ĩthukĩĩsye au ũla wakũsyaie, Na ndũkavũthye mwenyu akũa.

²³ Thooa w’o, na ndũkothoosye; Ĩĩ, ũĩ, na ũmanyĩsyo, na ũmanyi.

²⁴ Ĩthe wa ũla mũlũngalu akatana mũno; Na ũla wĩsyaa kana koĩ akeethĩwa na ũtanu kwondũ wako.

²⁵ Au na mwenyu methĩwe na mũyo, Na ũla wakũsyaie natane.

²⁶ Mwana wakwa, nenga ngoo yaku; Na metho maku matanĩe nzĩa syakwa.

²⁷ Nũndũ ĩlwaya nĩ mũtaũ mũliku; Na mũndũ mũka wa nthĩ ĩngĩ nĩ ĩima ĩtheke.

²⁸ Ĩĩ, nĩwoveeasya ta mũvutani, Na kwingĩvya nzeleke katĩ wa andũ.

²⁹ Nũũ wĩ na woo? Nũũ wĩ na kĩmako? Nũũ wĩ na ngananĩo? Nũũ wĩ na mũnyungunyĩsyo? Nũũ wĩ na mawũkite vate kĩtumi? Nũũ wĩ na metho matune?

³⁰ Ala mekalaa ĩvinda ĩasa mainyw’a; Ala maendaa mamanthe mbinyu mbulan’ye.

³¹ Ndũkasisye mbinyu yĩla yatunĩva, Yĩla ĩtisatisĩaa kĩkombenĩ, Yĩla ĩnĩũmeleka nesa:

³² Mũminũkĩlyo nĩũmanaa ta nzoka, Na kũtonya ta kĩmbuva.

³³ Metho maku makoona maũndũ maeni, Na ngoo yaku ĩkaneena maũndũ ma ngũlũ.

³⁴ Ĩĩ, ũkeethĩwa ta ũla ũkomaa ũkanganĩ katĩ, Kana ta ũla ũkomaa mũthyanĩ wa mũlingoti.

³⁵ Ũkasya, Nĩmangũnĩte na ndyaaĩkwa ũndũ ũthũku; Nĩmangũnĩte, na ndyaaĩw’a ũndũ: Ngaamũka ĩndĩĩ? Ngamĩmantha ĩngĩ.