NTHIMO 22 - Mbivilia

Motao na mokan’yo

¹ Nĩ kavaa kũnyuva syĩtwa ĩseo kwĩ mothwii manene, Na ũseo ũla wonanaw’a nĩ wendo kwĩ vetha na thaavu.

² Athwii na ngya makomanaa vamwe: Yeova nĩwe mũmbi woo onthe.

³ Mũndũ wĩ kĩlĩko nĩwonaa ũthũku, na kwĩvitha; Ĩndĩ ala mate ũmanyi nĩmaendeeaa, na kũthĩna.

⁴ Ĩtuvi ya wĩnyivyo na kũmũkĩa Yeova Nĩ ũthwii, na ndaĩa, na thayũ.

⁵ Mĩw’a na itei syĩ nzĩanĩ ya ala me na ngũlũ: Ũla ũsũvĩaa ngoo yake akeethĩwa kũasa nasyo.

⁶ Manyĩsya kana nzĩa ĩla kaĩle kũendaa nayo, O na akũa ndakamĩtia.

⁷ Mũthwii nũsumbĩkaa ngya; Na ũla ũkovaa nĩ mũthũkũmi wa ũla ũkovethasya.

⁸ Ũla ũvuĩaa ũthũku akaketha wanangĩko mũnene; Na ndata ya ũthilĩku wake ĩkaa vinya.

⁹ Ũla wĩ na itho ĩlau akaathimwa; Nũndũ nũnengae ngya kuma lĩunĩ wake.

¹⁰ Mwĩkye nza mũkaakaan’ya, na ngananĩo ĩkaumaala; Ĩĩ, ĩteta na nzonoko ikathela.

¹¹ Ũla wendaa ũtheu wa ngoo, Nũndũ wa mumo wa ilomo syake mũsumbĩ akeethĩwa mũnyanyae.

¹² Metho ma Yeova masũvĩaa ũla wĩ na ũmanyi; Ĩndĩ nĩwanangaa ndeto sya nzeleke.

¹³ Mũndũ mũtulu easya, Ve mũnyambũ nza; Ngooaĩwa nzĩanĩ nene.

¹⁴ Kanyw’a wa aka aeni nĩ ĩima ĩliku; Ũla ũthĩthawa nĩ Yeova akavalũka nthĩnĩ wayo.

¹⁵ Ũtumanu nĩwovetwe ngoonĩ ya kana; Ĩndĩ ndata ya kwon’ya mavĩtyo ĩkoolũngya kũasa nako.

¹⁶ Ũla ũthĩnasya ngya nĩ kana aingĩvye ũtandĩthyo wake, Na ũla ũnenganae kwa athwii, akavika kwaĩwanĩ tũ.

¹⁷ Tea kũtũ kwaku, nokĩw’a ndeto sya ala oĩ, Noinengane ngoo yaku ũmanyinĩ wakwa.

¹⁸ Nũndũ nĩ ũndũ wa kwendeesya ethĩwa ũkasyĩkalya nthĩnĩ waku, Ethĩwa nilũlũmĩlw’e vamwe ilomonĩ syaku.

¹⁹ Nĩ kana ũĩkĩĩi waku wĩthĩwe nthĩnĩ wa Yeova, Nĩnĩkũmanyĩthĩtye syo ũmũnthĩ, o we.

²⁰ Ndikũandĩkĩe maũndũ manene Ma motao na ũmanyi,

²¹ Nĩtume ũmanya ki ndeto sya w’o, Nĩ kana ũmatũngĩae ndeto sya w’o ala makũtũmaa?

²² Ndũkavute ngya, nũndũ nĩ ngya; O na ndũkathĩnye ala athĩni mbingĩlonĩ:

²³ Nũndũ Yeova akamatetea, Na kũmavuta thayũ ala mamavutaa.

²⁴ Ndũkatume ndũũ na ũla ũthataa; Na ndũkaendan’ye na mũndũ ũthilĩkaa:

²⁵ Ndũkese kwĩmanyĩsya mĩendele yake, Na kwosea ngoo yaku kĩtei.

²⁶ O na ndũkethĩwe ũmwe wa ala makwatanasya moko, Kana wa aĩkĩĩthya kwondũ wa mathĩĩ.

²⁷ Ethĩwa ndwĩ na kya kũĩva, Aĩle ata kũtwaa ũkomo waku kumya ungu waku?

²⁸ Ndũkaakũĩĩsye kyambo kya mũvaka wa tene, Kĩla aaĩthe maku meekĩie.

²⁹ Nũkwona mũndũ mũthingu wĩanĩ wake? Akaũngama mbee wa asumbĩ; Ndakaũngama mbee wa andũ mate na nguma.