NTHIMO 2 - Mbivilia

Ũtandĩthyo wa kũmantha ũĩ

¹ Mwana wakwa, ethĩwa ũkakwata ndeto syakwa, Na kwiaa mĩao yakwa nthĩnĩ waku,

² O na kũtea kũtũ kwaku wose ũĩ, Na kũnengana ngoo yaku ũmanyinĩ;

³ Ĩĩ, ethĩwa ũkaĩĩa kũvathũkan’ya kũseo, Na kũkĩlya wasya waku wone ũmanyi;

⁴ Ethĩwa ũkoomantha ta vetha, Na kũmantha ta syĩndũ mbithe syĩ vata mũno:

⁵ Nĩvo ĩndĩ wĩmanya kũmũkĩa Yeova, Na kwona ũĩ wa Ngai.

⁶ Nũndũ Yeova nũnenganae ũĩ; Kanyw’anĩ wake vaumaa ũmanyĩsyo na ũmanyi:

⁷ Aiaa ũĩ mwĩanĩu kwondũ wa ala alũngalu; Nake nĩ ngao kwa ala maendaa wĩanĩunĩ;

⁸ Kana atonye kũsũvĩa nzĩa sya ũsili wa katĩ, Na kũsũvĩaa mĩendele ya atheu make.

⁹ Nĩvo ĩndĩ wĩmanya ũlũngalu na usili wa w’o, Na katĩ, ĩĩ, kĩla nzĩa nzeo.

¹⁰ Nũndũ ũĩ ũkalika ngoonĩ yaku, Na ũmanyi ũkendeesya ngoo yaku;

¹¹ Kĩlĩko kĩkakũsyaĩĩasya; Ũmanyi ũkakũsũvĩaa:

¹² Kũũvonokya kuma mĩendelenĩ mĩthũku, Kuma andũnĩ ala maneenaa maũndũ ma ngũlũ;

¹³ Ala matiaa nzĩa sya ũlũngalu, Maendae mĩendelenĩ ya kĩvindu;

¹⁴ Ala matanaw’a nĩ kwĩka ũthũku, Na kwendeew’a nĩ ngũlũ ya ũla mũthũku;

¹⁵ Ala athyoekangu mĩendelenĩ yoo, Na me na ngũlũ nzĩanĩ syoo:

¹⁶ Kũũvonokya kwa mũndũ mũka mũeni, O kwa ũsu wa nthĩ ĩngĩ ũla wendeeasya na ndeto syake sya ũkathĩĩo;

¹⁷ Ũla wũlawa nĩ mũnyanyae wake wa ũika wake, Na wũlawa nĩ ũtianĩo wa Ngai wake:

¹⁸ Nũndũ nyũmba yake yangĩe kĩkw’ũnĩ, Na nzĩa syake kwa ala akw’ũ;

¹⁹ Kũti waasyoka ĩngĩ alika kwake, O na kũvikĩa nzĩa sya thayũ:

²⁰ Nĩ kana ũende mũendelenĩ wa andũ aseo, Na kũkwata nzĩa sya alũngalu.

²¹ Nũndũ ala alũngalu makatũa ĩ nthĩ, Na ala eanĩu makamĩkalaa.

²² Ĩndĩ ala athũku makavetwa kuma ĩ nthĩ, Na nzeleke ikakũanĩw’a na mĩi syume nthĩnĩ wayo.