NTHIMO 19 - Mbivilia

¹ Kavaa ngya ĩla ĩkinyaa wĩanĩũnĩ wayo Kwĩ ũla wĩ na ngũlũ ilomonĩ syake na nĩ ndia.

² O na ĩngĩ, thayũ kwĩthĩwa ũte na ũmanyi ti ũseo; Na ũla wĩkalaataa na maũũ make nũvĩtasya.

³ Ũtumanu wa mũndũ nũthũkasya mũendele wake; Na ngoo yake nĩmũnyungunyĩasya Yeova.

⁴ Ũthwii nĩwongelaa anyanya aingĩ; Ĩndĩ ngya nĩtaanaw’a na mũnyanyae wayo.

⁵ Ngũsĩ ya ũvũngũ ndĩkatĩa kũkũnwa; Na ũla ũneenaa movũngũ ndakavonoka.

⁶ Aingĩ makeesũva ũseo wa mũndũ mũlau; Na kĩla mũndũ nĩ mũnyanya wa ũla ũnenganae mĩthĩnzĩo.

⁷ Ana‐a‐inyia onthe ma ngya nĩmamĩmenaa: Nĩ mbee veana ata anyanyae mayo kũthi kũasa nayo! Nũmaatĩĩaa na ndeto, ĩndĩ nĩ aendu.

⁸ Ũla wĩthĩawa na ũĩ nĩwendaa thayũ wake mwene: Ũla ũsũvĩaa ũmanyi akoona ũseo.

⁹ Ngũsĩ ya ũvũngũ ndĩkatĩa kũkũnwa; Na ũla ũneenaa movũngũ akaaa.

¹⁰ Maũndũ ala mendeeasya thayũ ti maĩlu kwondũ wa ndia; Nĩ mbee veana ata kũlea kwaĩla, mũthũkũmi kũsumbĩka anene me mbee ũsumbĩnĩ.

¹¹ Kĩlĩko kya mũndũ nĩkĩtumaa ethĩwa mũmĩĩsya wa kũthata; Na nĩ ndaĩa yake kũekea ĩvĩtyo.

¹² Ũthilĩku wa mũsumbĩ nĩ ta kũluma kwa mũnyambũ; Ĩndĩ kwonan’ya kwake kwa ũseo nĩ ta ĩmwe nyekinĩ.

¹³ Mwana mũtumanu nĩ wanangĩko mũnene wa ĩthe wake; Na mateta ma kĩveti nĩ kũvolotanga kũtatw’ĩkanaa.

¹⁴ Nyũmba na mothwii nĩ ũtiĩwa kuma kwa aaĩthe; Ĩndĩ kĩveti kĩ kĩlĩko kyumaa kwa Yeova.

¹⁵ Ũtulu nĩwĩkasya toonĩ mũnene; Na mũndũ mũtulu akeew’aa nzaa.

¹⁶ Ũla ũkwataa mwĩao nũsũvĩaa thayũ wake; Ĩndĩ ũla ũte kĩio ũndũ wa mĩendele yake akakw’a.

¹⁷ Ũla wĩw’ĩaa ngya tei akovethasya Yeova, Na wĩko wake mũseo akamũĩva ĩngĩ.

¹⁸ Kũna mwana waku, nũndũ ve wĩkwatyo; Na ndũkende mũno ngoonĩ yaku wanangĩko wake.

¹⁹ Mũndũ wa ũthilĩku mũnene akakua ũsilĩlo, Nũndũ ethĩwa ũkamũvonokya, mũvaka wĩke ũu ĩngĩ.

²⁰ Ĩw’a ũtao, na osa ũmanvĩsyo, Nĩ kana wĩthĩwe mũĩ mũminũkĩlyonĩ waku.

²¹ Kwĩ mosũanĩo maingĩ ngoonĩ ya mũndũ; Ĩndĩ ũtao wa Yeova, nĩw’o wĩĩkalaa.

²² Kĩla kĩtuma mũndũ kwendwa nĩ ũseo wake; Na mũndũ ngya e kavaa kwĩ mũneeni wa ũvũngũ.

²³ Kũmũkĩa Yeova nĩkũetae thayũ; Na ũla wĩ nakw’o akekalaa eanĩwe; Ndakokĩwa nĩ ũthũku.

²⁴ Mũndũ mũtulu nũindaa kw’oko kwake ĩsaaninĩ, Na ndeĩtĩkĩla o na kũkũete kanyw’anĩ wake ĩngĩ.

²⁵ Kũna mũkaakaan’ya, na ũla ũte ũmanyi akeemanyĩsya kwĩthĩwa na kĩlĩko; Na kan’ya ũla wĩ na ũmanyi, na akamanya ũĩ.

²⁶ Ũla ũmũng’endeaa ĩthe, na kũlũngya inyia wake, Nĩ mwana ũla ũsonokasya na kũete kĩvũthya.

²⁷ Eka, mwana wakwa, kwĩw’a ũmanyĩsyo Na ĩndĩ ũkĩvĩtya na kũtia ndeto sya ũmanyi.

²⁸ Ngũsĩ ĩte vata nĩthekeeaa ũsili wa katĩ; Na kanyw’a wa ũla mũthũku nũmelasya ũthũku.

²⁹ Mosilĩlo nĩmaseũvĩaw’a akaakaan’ya, Na makũna kwondũ wa mĩongo ya ndia.