NTHIMO 18 - Mbivilia

¹ Ũla wĩvathaa amanthaa kwenda kwake mwene, Na alonzanĩlasya ũĩ w’onthe mwĩanĩu.

² Ndia ndĩtanĩaa ũmanyi, Ĩndĩ no kana ngoo yayo ĩtonye kwĩvuan’ya.

³ Yĩla mũthũku woka, kĩvũthya nakyo nĩkyũkaa, Na vamwe na nzonoko kũkaa kĩvũthya.

⁴ Ndeto sya kanyw’a wa mũndũ nĩ ta syũngũ; Mbuluti ya ũĩ nĩ ta kalũsĩ kavĩtĩtye.

⁵ Kwendeesya mũndũ mũthũku ti ũseo, Kana kwelelũkya ala alũngalu silanĩ.

⁶ Ilomo sya ndia nilikaa ngananĩonĩ, Na kanyw’a wayo nĩwĩtasya makũna.

⁷ Kanyw’a wa ndia nĩ wanangĩko wayo, Na ilomo syayo nĩ kĩtei kya ngoo yayo.

⁸ Ndeto sya ũla ũneenaa na kĩwe nĩ ta tũlungu tũseo twa lĩu, Na ilikaa nthĩnĩ ki.

⁹ O na ũla mũleelu wĩanĩ wake Nĩ mwana‐a‐inyia wa mwanangi.

¹⁰ Syĩtwa ya Yeova nĩ mwako mũtũlu wa mũnyoolo, Ũla mũlũngalu akĩĩaa vo, na nde na mũisyo.

¹¹ Syĩndũ sya mũndũ mũthwii nĩ ndũa yake yĩ vinya, Na ta wako mũtũlu ũsũanĩonĩ wake.

¹² Wanangĩko ũtanamba kũka ngoo ya mũndũ yĩ na wĩng’athĩlĩlyo; Na wĩnyivyo ũtongoeasya ndaĩa.

¹³ Ũla ũsũngĩaa atanamba kwĩw’a, Kwake nĩ ũtumanu na nthoni.

¹⁴ Veva wa mũndũ ũkatw’ĩĩka wonzu wake; Ĩndĩ veva mũtũlĩku nũũ ũtonya kũmĩĩsya?

¹⁵ Ngoo ya ũla wĩ na kĩlĩko nĩyosaa ũmanyi; Na kũtũ kwa ũla mũĩ nĩkũmanthaa ũmanyi.

¹⁶ Mũthĩnzĩo wa mũndũ nũmwonasya mwanya, Na kũmũete mbee wa andũ anene.

¹⁷ Ũla wambaa kũtetea ũvoo wake nĩwonekaa ta mũlũngalu; Ĩndĩ mũtũi wake ooka nũmũvuanasya.

¹⁸ Kũlimana nĩkũtumaa ngananĩo ithela, Na kũtaan’ya ala me na ũtonyi.

¹⁹ Mwana‐a‐asa alulutĩkw’a nĩ vinya kũtũngĩka kwĩ ndũa yĩ vinya; Na ngananĩo ta isu nĩ ta ivingi sya nyũmba nene yĩ kĩemo.

²⁰ Ĩvu ya mũndũ yĩkausũw’a nĩ ũsyao wa kanyw’a wake; Akeanĩaw’a nĩ wingĩvo wa ilomo syake.

²¹ Kĩkw’ũ na thayũ syĩ vinyanĩ wa ũĩmĩ; Na ala mawendaa makaĩsaa ũsyao waw’o.

²² Ũla ũmeasya kĩveti nũmeasya kĩndũ kĩseo; Na kwona ũseo kuma kwa Yeova.

²³ Ngya nĩsyĩsũvanaa; Ĩndĩ athwii masũngĩaa na vinya.

²⁴ Ũla ũtumaa ndũũ na andũ aingĩ ekaa ũu ũndũ wa wanangĩko wake mwene; Ĩndĩ ve mũnyanya ũla ũlũmanasya mũno kwĩ mwana‐a‐inyia.