NTHIMO 17 - Mbivilia

¹ Nĩ kavaa kalungu komũ ka ũya, na ũuu vamwe nako, Kwi nyũmba yusũĩte mboka vamwe na ĩteta.

² Mũthũkũmi ũla wĩkaa na ũĩ akasumbĩka mwana ũla ũsonokasya, Na akeethĩwa na kĩanda ũtiĩwanĩ katĩ wa ana‐a‐ĩthe.

³ Na mbisũ ya kũthesya nĩ kwondũ wa vetha, na iko ĩnene kwondũ wa thaavu; Ĩndĩ Yeova nũtataa ngoo.

⁴ Mwĩki wa naĩ nĩwĩthukĩĩasya ilomo nthũku; Na mũneeni wa ũvũngũ nũteaa kũtũ ew’e ũĩmĩ mũthũku.

⁵ Ũla ũthekeeaa ngya nũvũthasya Mũmbi wake; Na ũla ũtanaw’a nĩ wanangĩko mũnene ndakatĩa kũkũnwa.

⁶ Nzũkũlũ nĩ ngovia ya ũsumbĩ ya andũ akũũ; Na ũtaĩo wa syana nĩ aaĩthe masyo.

⁷ Kũneena kũseo kũtiaĩle ndia; Nĩ mbee mũno ilomo ila ineenaa ũvũngũ kũlea kwaĩla mũnene wĩ mbee ũsumbĩnĩ.

⁸ Ĩvaki nĩ ta kavila ke thooa mũnene methonĩ ma ũla wĩ nayo; O vala yĩelekela, nĩyĩunĩkasya.

⁹ Ũla ũvw’ĩkaa ĩvĩtyo nũmanthaa wendo; Ĩndĩ ũla ũtindaa aineena ũndũ, ataanasya anyanya anene.

¹⁰ Ũkan’yo ũlikaa mũno mũndũnĩ wĩ na ũmanyi Kwĩ makũnwa ĩana nthĩnĩ wa ndia.

¹¹ Mũndũ mũthũku nũmanthaa no ũng’endu; Kwondũ wa ũu mũtũmwa mwai akatũmwa okite nake.

¹² Kavaa nduva ĩvenetwe tũswii twayo kũkomana na mũndũ, Kwĩ ndia ũtumanunĩ wayo.

¹³ Ũla ũtũngaa ũthũku vandũ va ũseo, Ũthũku ndũkauma nyũmbanĩ yake.

¹⁴ Wambĩlĩlyo wa ĩteta nĩ ta yĩla mũndũ wavũthũa manzĩ; Kwondũ wa ũu eka ngananĩo, kũtanethĩwa ĩteta.

¹⁵ Ũla ũtalĩlaa athũku ũlũngalu, na ũla ũtusaa alũngalu avĩtan’ya, Asu elĩ nĩ ũthatyo kwa Yeova.

¹⁶ Nĩkĩ mbesa syĩ kw’okonĩ kwa ndia ĩthooe ũĩ, Nayo ndĩ na ũmanyi?

¹⁷ Mũnyanya nĩwendanaa ĩndĩ yonthe; Na mwana‐a‐ĩthe asyaiwe kwondũ wa kũthĩnũkasya.

¹⁸ Mũndũ ũte ũmanyi nũkwatanasya moko, Na aitw’ĩka mũĩkĩĩthya mũtũi wake ene

¹⁹ Ũla wendaa ĩteta endaa ĩvĩtyo: Ũla ũkĩlasya mbingĩlo yake ĩũlũ mũno nũmanthaa wanangĩko.

²⁰ Ũla wĩ na ngoo ngengani ndonaa ũseo o na wĩva; Na ũla wĩ na ũĩmĩ wĩ ngũlũ nũvalũkaa ũthũkunĩ.

²¹ Ũla ũsyaaa ndia ekaa ũu kwa woo wake; Na ĩthe wa ndia nde na ũtanu nongi.

²² Ngoo ndanu nĩ mũiito mũseo; Ĩndĩ veva mũtũlĩku ũtumaa mavĩndĩ moma.

²³ Mũndũ mũthũku nĩwosaa ĩvaki kuma kĩthũinĩ, Elelũkasye nzĩa sya ũsili wa katĩ.

²⁴ Ũĩ wĩ mbee wa ũthyũ wa ũla wĩ na ũmanyi; Ĩndĩ metho ma ndia me itulunĩ sya nthĩ.

²⁵ Mwana mũtumanu nĩ woo kwa ĩthe wake, Na ũũ kwa ũla wamũsyaie.

²⁶ O na kũsilĩla ala alũngalu ti ũseo, Kana kũkũna ala me ndaĩa nũndũ wa ũlũngalu woo.

²⁷ Ũla ũsũvĩaa ndeto syake e na ũĩ; Na ũla wĩ na veva mũuu nĩ mũndũ wĩ na ũmanyi.

²⁸ O na ndia, yĩla ĩvindĩtye, ĩtalawa nĩ mbũĩ; Yĩla ĩtumĩtye ilomo syayo, ĩtalawa yĩ na kĩlĩko.