NTHIMO 15 - Mbivilia

¹ Ũsũngĩo mwololo nũthyũũaa ũthilĩku; Ĩndĩ ndeto mbai nĩyũkĩlasya ũthatu.

² Ũĩmĩ wa ala oĩ nũneenaa ũmanyi katĩ; Ĩndĩ kanyw’a wa ndia nĩwonoasya ũtumanu.

³ Metho ma Yeova me kĩla vandũ, Makĩsyaĩĩsya ũthũku na ũseo.

⁴ Ũĩmĩ mũuu nĩ mũtĩ wa thayũ; Ĩndĩ ngũlũ syaw’o nĩ kũtũlĩka kwa veva.

⁵ Ndia nĩvũthasya kwonw’a mavĩtyo nĩ ĩthe wayo; Ĩndĩ ũla wĩtĩkĩlaa ũkan’yo nĩwosaa kĩlĩko.

⁶ Nyũmbanĩ ya mũlũngalu ve ũthwii mwie mwingĩ; Ĩndĩ motandĩthyonĩ ma ala athũku ve thĩna.

⁷ Ilomo sya ala oĩ ninyaĩĩkasya ũmanyi; Ĩndĩ ngoo ya mũtumanu ndĩkaa ũu.

⁸ Nthembo ya ũla mũthũku nĩ ũthatyo kwa Yeova; Ĩndĩ mboya ya ũla mũlũngalu nĩ ũtanu wake.

⁹ Mũendele wa ũla mũthũku nĩ ũthatyo kwa Yeova; Ĩndĩ nũmwendaa ũla ũatĩĩaa ũlũngalu.

¹⁰ Ve kũsilĩlwa kwai kwa ũla ũtiaa ĩ nzĩa; Na ũla ũmenaa kũkanw’a akakw’a.

¹¹ Seoli na Avatoni kwĩ ũtheinĩ mbee wa Yeova; Nĩ mbee veana ata ngoo sya ana ma andũ!

¹² Mũkaakaan’ya ndendaa kũkanw’a; Ndaendaa kwa ũla mũĩ.

¹³ Ngoo ndanu nĩtanĩthasya ũthyũ; Ĩndĩ ũndũ wa woo wa ngoo veva nũtũlĩkaa.

¹⁴ Ngoo ya ũla wĩ na ũmanyi nĩmanthaa ũĩ; Ĩndĩ kanyw’a wa ndia nũĩsaa ũtumanu.

¹⁵ Mĩthenya yonthe ya ala mathĩnaa nĩ mĩthũku; Ĩndĩ ũla wĩ na ngoo ndanu e na mboka ĩtatw’ĩkanaa.

¹⁶ Kavaa kĩndũ kĩnini, vamwe na kũmũkĩa Yeova, Kwĩ ũthwii mwie mwingĩ vamwe na thĩna.

¹⁷ Kavaa kũya nyũnyi, vala ve wendo, Kwĩ ng’ombe ĩĩthaw’a kĩtũũnĩ vamwe na kĩmena.

¹⁸ Mũndũ mũthilĩku nĩwũkĩlasya ngananĩo; Ĩndĩ mũmĩĩsya wa kũthata mũuasya ĩteta.

¹⁹ Nzĩa ya ũla mũtulu ĩilyĩ ta wiio wa mĩw’a; Ĩndĩ nzĩa ya ũla mũlũngalu nĩtw’ĩkĩthaw’a lelũ.

²⁰ Mwana mũĩ nũtanĩthasya ĩthe; Ĩndĩ mũndũ mũtumanu nũvũthasya inyia wake.

²¹ Ũtumanu nĩ ũtanu kwa ũla ũte na ũĩ; Ĩndĩ mũndũ wĩ na ũmanyi nũlũngalasya mũendele wake.

²² Vala vate ũtao, maũndũ ala masũanĩĩtwe kwĩkwa nĩmanangĩkaa; Ĩndĩ vala ve wingĩ wa atai nĩmalũlũmĩlaw’a.

²³ Mũndũ e na ũtanu ũsũngĩonĩ wa kanyw’a wake; Na ndeto ĩvindanĩ yayo, kote nzeo!

²⁴ Kwa ũla mũĩ nzĩa ya thayũ ĩelete ĩũlũ, Nĩ kana ethyũũe na kũtia Seoli ĩtheo.

²⁵ Yeova akakũanĩsya na mĩi nyũmba ya ekathĩĩi; Ĩndĩ akalũlũmĩlya mũvaka wa mũndũ mũka ndiwa.

²⁶ Mosũanĩo mathũku nĩ ũthatyo kwa Yeova; Ĩndĩ ndeto nzeo nĩ ntheu.

²⁷ Ũla wĩ na ĩtomo ya ũtandĩthyo nũthĩnasya nyũmba yake mwene; Ĩndĩ ũla ũmenaa mavaki akekala thayũ.

²⁸ Ngoo ya ũla mũlũngalu nĩsũanĩaa kũsũngĩa; Ĩndĩ kanyw’a wa ũla mũthũku nĩwonoasya maũndũ mathũku.

²⁹ Yeova e kũasa na ũla mũthũku; Ĩndĩ nĩwĩw’aa mboya ya ũla mũlũngalu.

³⁰ Kyeni kya metho nĩkĩtanasya ngoo; Na maũvoo maseo manoasya mavĩndĩ.

³¹ Kũtũ kũla kwĩthukĩĩasya ũkan’yo wa thayũ Kũkekala katĩ wa ala oĩ.

³² Ũla ũleaa kwonw’a mavĩtyo nũvũthasya thayũ wake mwene; Ĩndĩ ũla wĩthukĩĩasya ũkan’yo nĩwosaa ũmanyi.

³³ Kũmũkĩa Yeova nĩ ũmanyĩsyo wa ũĩ; Na wĩnyivyo ũtongoeasya ndaĩa.