NTHIMO 14 - Mbivilia

¹ Kĩla mũndũ mũka mũĩ nĩwakaa nyũmba yake; Ĩndĩ ũla mũtumanu nũomboaa na moko make mwene.

² Ũla ũkinyaa ũlũngalunĩ wake nũkĩaa Yeova; Ĩndĩ ũla wĩ ngũlũ mĩendelenĩ yake nũmũvũthasya.

³ Kanyw’anĩ wa ũla mũtumanu ve ndata kwondũ wa ngathĩĩo yake; Ĩndĩ ilomo sya ala oĩ ikamasũvĩa.

⁴ Vala vate ng’ombe, vandũ va kũĩthĩw’a nĩ vathei; Ĩndĩ wingĩvo mwingĩ nĩ kwondũ wa vinya wa ng’ombe.

⁵ Ngũsĩ yĩ kĩthito ndĩneenaa ũvũngũ; Ĩndĩ ngũsĩ ngengani ĩneenaa movũngũ.

⁶ Mũkaakaan’ya nũmanthaa ũĩ, na ndawonaa; Ĩndĩ ũmanyi nĩwonekaa na ũvũthũ kwa ũla wĩ na kĩlĩko.

⁷ Lika vala va mũndũ mũtumanu, Na ndũkona kwake ilomo syĩ ũmanyi.

⁸ Ũĩ wa ũla wĩ kĩlĩko nĩ kũmanya mũendele wake; Ĩndĩ ũtumanu wa ndia nĩ ũkengani.

⁹ Nthembo kwondũ wa ĩvĩtyo nĩthekeeawa nĩ ndia; Ĩndĩ katĩ wa alũngalu kwĩ kwendana kũseo.

¹⁰ Ngoo nĩyĩsĩ ũũ wayo e yo; Na mũeni ndelikasya ũtanunĩ wayo.

¹¹ Nyũmba ya ũla mũthũku ĩkang’uthũlwa; Ĩndĩ ĩeema ya ũla mũlũngalu yĩkaathimĩka.

¹² Ve nzĩa ĩla ĩilyĩ ta ya w’o kwa mũndũ; Ĩndĩ mũminũkĩlyo wayo nĩ nzĩa sya kĩkw’ũ.

¹³ O na kũthekanĩ ngoo yĩ na woo; Na mũminũkĩlyo wa ũtanu nĩ kĩmako.

¹⁴ Ũla ũsyokete na ĩtina ngoonĩ yake akausũwa nĩ mĩendele yake mwene; Na mũndũ mũseo akeanĩw’a kuma nthĩnĩ wake mwene.

¹⁵ Ũla ũte ũmanyi nĩwĩtĩkĩlaa kĩla ndeto; Ĩndĩ ũla wĩ kĩlĩko asiasya ũndũ ũendaa.

¹⁶ Mũndũ mũĩ nũkĩaa na kũtia ũthũku; Ĩndĩ ndia nĩendaa yĩng’athĩlĩtye, na kwĩkwatya mwene.

¹⁷ Ũla ũthataa mĩtũkĩ akeka na ũtumanu; Na mũndũ wĩ mosũanĩo mathũku nũmenawa.

¹⁸ Ala mate ũmanyi matiĩawa ũtumanu; Ĩndĩ ala me kĩlĩko mekĩawa ngovia ya ũmanyi.

¹⁹ Ala athe makunamaa mbee wa ala aseo; Na ala athũku, mbingĩlonĩ sya alũngalũ.

²⁰ Ngya nĩmenawa o na nĩ mũtũi wayo mwene; Ĩndĩ mũthwii e na anyanyae aingĩ.

²¹ Ũla ũvũthasya mũtũi wake nĩwĩkaa naĩ; Ĩndĩ ũla ũsyĩw’ĩaa ngya tei nĩ mũtanu.

²² Maivĩtasya ala masũanĩaa ũthũku? Ĩndĩ tei na w’o ikeethĩwa sya ala masũanĩaa ũseo.

²³ Wĩanĩ w’onthe ve ũtandĩthyo; Ĩndĩ kũneena kwa ilomo kwangĩĩtye ũkyanĩ.

²⁴ Ngovia ya ũsumbĩ ya ala oĩ nĩ ũthwii woo; Ĩndĩ ũtumanu wa ndia no ũtumanu.

²⁵ Ngũsĩ ya w’o nĩvonokasya mathayũ; Ĩndĩ ũla ũneenaa movũngũ nũkenganaa.

²⁶ Nthĩnĩ wa kũmũkĩa Yeova ve ũĩkĩĩi wĩ vinya; Na syana syake ikeethĩwa na wĩvitho.

²⁷ Kũmũkĩa Yeova nĩ nthongo ya thayũ, Nĩ kana mũndũ atie itei sya kĩkw’ũ.

²⁸ Wingĩnĩ wa andũ nĩvo ve ndaĩa ya mũsumbĩ; Ĩndĩ ũolekunĩ wa andũ ve wanangĩko wa mũnene wĩ mbee ũsumbĩnĩ.

²⁹ Ũla mũmĩĩsya wa kũthata nĩ wa ũmanyi mwingĩ; Ĩndĩ ũla wĩ mĩtũkĩ vevanĩ nũnenevasya ũtumanu.

³⁰ Ngoo nduu nĩ thayũ wa mwĩĩ; Ĩndĩ kĩwĩu nĩ wou wa mavĩndĩ.

³¹ Ũla ũthĩnasya ngya nũvũthasya Mũmbi wake; Ĩndĩ ũla ũmew’ĩaa athĩni tei nũmũtaĩaa.

³² Ũla mũthũku nũtheeaw’a kwĩkanĩ kwake kũthũku; Ĩndĩ ũla mũlũngalu kĩkw’ũnĩ kyake e na wĩvitho.

³³ Ũĩ nĩwĩkalaa ngoonĩ ya ũla wĩ na ũmanyi; Ĩndĩ kĩla kĩ nthĩnĩ wa ndia nĩkĩvuanaw’a.

³⁴ Ũlũngalu nũnenevasya mbaĩ; Ĩndĩ naĩ nĩvũthĩthasya ũko o na wĩva wa andũ.

³⁵ Wonan’yo wa ũseo wa mũsumbĩ welekele mũthũkũmi ũla wĩkaa na ũĩ; Ĩndĩ ũthilĩku wake ũkeethĩwa ĩũlũ wa ũla ũsonokasya.