NTHIMO 13 - Mbivilia

¹ Mwana mũĩ nĩwĩw’aa ũmanyĩsyo wa ĩthe wake; Ĩndĩ mũkaakaan’ya ndew’aa ũkan’yo.

² Mũndũ akaya ũseo kwondũ wa ũsyao wa kanyw’a wake; Ĩndĩ ngoo ya nzeleke ĩkaya ũng’endu.

³ Ũla ũsũvĩaa kanyw’a wake nĩwĩkalasya thayũ wake; Ĩndĩ ũla ũtumũkanganasya ilomo syake mũno akeethĩwa na wanangĩko.

⁴ Ngoo ya ũla mũtulu nĩyendaa, na ndĩ na kĩndũ; Ĩndĩ ngoo ya ũla mũthingu ĩkeethĩwa nou.

⁵ Mũndũ mũlũngalu nũmenaa movũngũ; Ĩndĩ mũndũ mũthũku nĩ ũtiiki, na avikĩaa kũsonoka.

⁶ Ũlũngalu nũsũvĩaa ũla mũlũngalu nzĩanĩ; Ĩndĩ ũthũku nĩwanangaa mũndũ mwathe.

⁷ Kwĩ ũla wĩthuasya, ĩndĩ nde kĩndũ: Kwĩ ũla wĩtusaa ngya, ĩndĩ e na ũthwii mwingĩ.

⁸ Mbovosya ya thayũ wa mũndũ nĩ ũthwii wake; Ĩndĩ ngya ndĩw’aa ũkan’yo.

⁹ Kyeni kya ũla mũlũngalu nĩkĩtanaa; Ĩndĩ taa wa ũla mũthũku ũkavow’a.

¹⁰ Kwondũ wa ngathĩĩo nĩkũkaa ngananĩo; Ĩndĩ kwa ala mataawa nesa kwĩ ũĩ.

¹¹ Ũthwii ũla wonekaa na nzĩa ĩtaĩle ũkaolwa; Ĩndĩ ũla ũmbanasya kwondũ wa wĩa akeethĩwa na wongeleko.

¹² Wĩkwatyo ũla ũtĩaa nũwaasya ngoo; Ĩndĩ kĩla kyendetwe kyooka, nĩ mũtĩ wa thayũ.

¹³ O ũla ũvũthasya ndeto nĩwĩeteae wanangĩko; Ĩndĩ ũla ũkĩaa mwĩao akatuvwa.

¹⁴ Mwĩao wa ũla mũĩ nĩ nthongo ya thayũ, Nĩ kana mũndũ atie itei sya kĩkw’ũ.

¹⁵ Ũmanyi mũseo nũetae ũseo; Ĩndĩ nzĩa ya mũvĩtan’ya nĩ nyũmũ.

¹⁶ Kĩla mũndũ wĩ kĩlĩko nũtethasya wĩa na ũmanyi; Ĩndĩ ndia nĩyonanasya ũtumanu wayo.

¹⁷ Mũtũmwa mũthũku nũvalũkaa naĩnĩ; Ĩndĩ mũtũmwa wĩ kĩthito nĩ wa ũvosya.

¹⁸ Ũkya na nthoni ikeethĩwa sya ũla ũleaa kwonw’a mavĩtyo; Ĩndĩ ũla wĩtĩkĩlaa ũkan’yo akataĩwa.

¹⁹ Ũla wendetwe weanĩw’a nĩ mũyo wa ngoo; Ĩndĩ nĩ ũthatyo kwa ndia kũtia naĩ.

²⁰ Endaa na andũ oĩ, ũkeethĩwa mũĩ; Ĩndĩ ũla ũtindanasya na ndia akathĩna.

²¹ Ũthũku nũatĩĩaa andũ athe; Ĩndĩ ala alũngalu makaĩvwa ũseo.

²² Mũndũ mũseo nũtiĩaa esũkũũe make ũtiĩwa; Na ũthwii wa mũndũ mwathe wiawa kwondũ wa alũngalu.

²³ Lĩu mwingĩ wĩ kũĩmanĩ kwa ngya; Ĩndĩ kwĩ kĩla kyanangĩtwe kwondũ wa ũsili ũte wa katĩ.

²⁴ Ũla ũimaa mwana wake ndata yake nũmenaa mwana wake; Ĩndĩ ũla ũmwendaa nũmũkũnaa mavinda maĩle.

²⁵ Ũla mũlũngalu nũĩsaa akavũn’ya thayũ wake; Ĩndĩ ĩvu ya ũla mũthũku yĩkeew’a nzaa.