NTHIMO 12 - Mbivilia

¹ O ũla wendaa kwonw’a mavĩtyo eendaa ũmanyi; Ĩndĩ ũla ũmenaa ũkan’yo nĩ ta nyamũ.

² Mũndũ mũseo akoona ũseo kwa Yeova; Ĩndĩ mũndũ wa mosũanĩo mathũku akamũtw’a mũvĩtan’ya.

³ Mũndũ ndakalũlũmĩlw’a nĩ ũthũku; Ĩndĩ mũi wa ũla mũlũngalu ndũkathingithangw’a.

⁴ Mũndũ mũka mwaĩlu nĩ ngovia ya ũsumbĩ ya mũũme wake; Ĩndĩ ũla ũsonokasya nĩ ta wou mavĩndĩnĩ make.

⁵ Mosũanĩo ma ala alũngalu nĩ ma katĩ; Ĩndĩ motao ma ala athũku nĩ ũkengani.

⁶ Ndeto sya ala athũku nĩ sya kwoveesya nthakame; Ĩndĩ kanyw’a wa ala alũngalu ũkamavonokya.

⁷ Ala athũku nĩmanangawa, na mati vo; Ĩndĩ nyũmba ya ala alũngalu ĩkaũngama.

⁸ Mũndũ akataĩwa kwĩanana na ũĩ wake; Ĩndĩ ũla wĩ na ngoo yĩ ngũlũ akavũthw’a.

⁹ E kavaa ũla ũtalawa ta vathei, na e na mũthũkũmi, Kwĩ ũla wĩtaĩaa, na nde na lĩu.

¹⁰ Mũndũ mũlũngalu nũsiasya thayũ wa nyamũ yake; Ĩndĩ matei mololo ma ũla mũthũku no wai.

¹¹ Ũla ũĩmaa nthĩ yake akeethĩwa na lĩu mwingĩ; Ĩndĩ ũla ũatĩĩaa andũ mate kĩĩĩ nde na ũmanyi.

¹² Ũla mũthũku nĩwendaa kĩtei kya ala athe; Ĩndĩ mũi wa ũla mũlũngalu nũsyaa ũsyao.

¹³ Ĩvĩtyonĩ ya ilomo ve kĩtei kwa mũndũ mũthũku; Ĩndĩ ũla mũlũngalu akauma thĩnanĩ.

¹⁴ Mũndũ akeanĩw’a nĩ ũseo kwondũ wa ũsyao wa kanyw’a wake; Na meko ma moko ma mũndu makatũngwa kwake.

¹⁵ Nzĩa ya ndia nĩ ya w’o methonĩ mayo e yo; Ĩndĩ ũla mũĩ nĩwĩthukĩĩasya ũtao.

¹⁶ Ũthatu wa ndia nũmanyĩkaa ũtheinĩ; Ĩndĩ mũndũ wĩ kĩlĩko nũvithaa nthoni.

¹⁷ Ũla ũneenaa w’o nĩwonanasya ũlũngalu; Ĩndĩ ngũsĩ ya ũvũngũ, ũkengani.

¹⁸ Ve ũla ũneenaa mĩtũkĩ ateũsũanĩa ta kũtonyanga kwa ũvyũ; Ĩndĩ ũĩmĩ wa ũla mũĩ nũvoasya.

¹⁹ Kĩlomo kya w’o kĩkalũlũmĩlw’a tene na tene; Ĩndĩ ĩũmĩ ũneenaa ũvũngũ no wa kavinda kanini.

²⁰ Ũkengani wĩ ngoonĩ ya ala masũanĩaa ũthũku; Ĩndĩ ala maseũvasya maũndũ ma mũuo kwoo nĩ ũtanu.

²¹ Vati ũthũku ũkekĩka kwa ũla mũlũngalu; Ĩndĩ ũla mũthũku akausũwa nĩ ũthũku.

²² Ilomo ila ineenaa ũvũngũ nĩ ũthatyo kwa Yeova; Ĩndĩ ala mekaa w’o nĩ ũtanu wake.

²³ Mũndũ wĩ kĩlĩko nũvithaa ũmanyi; Ĩndĩ ngoo ya ndia nĩtavanasya ũtumanu.

²⁴ Kw’oko kwa ũla mũthingu kũkasumbĩka; Ĩndĩ ũla mũtulu akathũkũmĩthw’a.

²⁵ Kĩmako ngoonĩ ya mũndũ nĩkĩminamasya; Ĩndĩ ndeto nzeo nĩmĩtanasya.

²⁶ Ũla mũlũngalu nĩ mũtongoi wa mũtũi wake; Ĩndĩ mũendele wa ala athũku nũmavĩtĩthasya.

²⁷ Mũndũ mũtulu ndavĩvasya kĩla wosaa aisyĩma; Syĩndũ syĩ vata mũno sya andũ nĩ kwondũ wa ala athingu.

²⁸ Mũendelenĩ wa ũlũngalu ve thayũ; Na nzĩanĩ yaw’o vati kĩkw’ũ.