NTHIMO 11 - Mbivilia

¹ Kĩthimi kya ũkengani nĩ ũthatyo kwa Yeova; Ĩndĩ ĩvia yĩla yĩthimaa w’o nĩ ũtanu wake.

² Yĩla ngathĩĩo yoka, nĩvo ĩndĩ nthoni yũkaa; Ĩndĩ ũĩ wĩ na ala menyivasya.

³ Wĩanĩu wa ala alũngalu ũkamatongoeasya; Ĩndĩ ngũlũ sya nzeleke ikasyananga.

⁴ Ũthwii ndwĩuna mũthenya wa ũthilĩku; Ĩndĩ ũlũngalu nũvonokasya kuma kĩkw’ũnĩ,

⁵ Ũlũngalu wa ũla mwĩanĩu ũkalũngalya mũendele wake; Ĩndĩ ũla mũthũku akavalũka kwondũ wa ũthũku wake mwene.

⁶ Ũlũngalu wa ala alũngalu ũkamavonokya; Ĩndĩ nzeleke ikakwatwa nĩ naĩ syasyo.

⁷ Yĩla mũndũ mũthũku ũkusaa, weteelo wake ũkaa; Na wĩkwatyo wa naĩ ũkyaa.

⁸ Ũla mũlũngalu nũvonokaw’a kuma thĩnanĩ; Na ũla mũthũku nũlikaa vandũ vake.

⁹ Mũndũ ũtakĩaa Ngai nĩwanangaa mũtũi wake na kanyw’a wake; Ĩndĩ kwondũ wa ũmanyi ũla mũlũngalu akavonokw’a.

¹⁰ Yĩla kũendaa nesa kwa ala alũngalu, ndũa nĩtanaa; Na yĩla ala athũku mekwaa, kwĩ mawasya matũlu.

¹¹ Kwondũ wa ũathimo wa alũngalu ndũa nĩtaĩawa; Ĩndĩ nĩng’uthũlangawa nĩ kanyw’a wa athũku.

¹² Ũla ũvũthasya mũtũi wake nde na ũĩ; Ĩndĩ mũndũ wĩ na ũmanyi nũvindasya.

¹³ Ũla wangangaa e mũsukani nũvuanasya nzama; Ĩndĩ ũla wa veva wĩ kĩthito nũvithaa ũndũ.

¹⁴ Vala vate ũtongoi mũĩ, andũ nĩmavalũkaa; Ĩndĩ vala ve wingĩ wa atai vati mũisyo.

¹⁵ Ũla ũtw’ĩkaa mũĩkĩĩwa kwondũ wa mũeni akathĩnw’a nĩ ũu; Ĩndĩ ũla ũmenaa ũvoo wa ũĩkĩĩthyo ũsu nĩ mwĩyelelu.

¹⁶ Mũndũ mũka mũseo nĩwĩkwatĩlaa ndaĩa; Na andũ ang’endu nĩmekwatĩlaa ũthwii.

¹⁷ Mũndũ wĩ tei nĩwĩkaa ngoo yake nesa; Ĩndĩ ũla mwai nũthĩnasya mwĩĩ wake mwene.

¹⁸ Ũla mũthũku nĩwĩyoseaa ĩtuvi ya ũkengani; Ĩndĩ ũla ũvuĩaa ũlũngalu e na ĩtuvi yĩte ngana.

¹⁹ Ũla mũlũmu ũlũngalunĩ akavikĩa thayũ; Ũla ũatĩĩaa ũthũku ekaa ũu kũvikĩa kĩkw’ũ kyake.

²⁰ Ala me ngũlũ ngoonĩ nĩ ũthatyo kwa Yeova; Ĩndĩ ala eanĩu mĩendelenĩ yoo nĩ ũtanu wake.

²¹ O na ethĩwa kw’oko kũkakwatana na kw’oko, mũndũ mũthũku ndakatĩa ũkũnwa; Ĩndĩ ũsyao wa ũla mũlũngalu ũkavonoka.

²² Ta ngome ya thaavu ĩnyiũũnĩ ya ngũlũe, Now’o ũilyĩ mũndũ mũka mwanake ũte na kĩlĩko.

²³ Kwenda kwa alũngalu no ũseo; Ĩndĩ weteelo wa ala athũku nĩ ũthilĩku.

²⁴ Kwĩ ũla ũnyaĩĩkaa, na ũyingĩva mũno mbee; Na kwĩ ũla ũimaa kũvĩtũka ũndũ waĩle, ĩndĩ ũendeeaa kwaĩwa.

²⁵ Mũndũ mũlau akeethĩwa mũnou; Na ũla ũnyithasya akanyithw’a mwene.

²⁶ Ũla ũimanaa lĩu wa mbaa ngetha, andũ makamũuma; Ĩndĩ ũathimo ũkeethĩwa mũtwenĩ wa ũla ũthooasya.

²⁷ Ũla ũmanthaa ũseo na kĩthing’ĩĩsyo nũmanthaa ũndũ ũseo; Ĩndĩ ũla ũmanthaa ũthũku, ũkooka vala ũĩ.

²⁸ Ũla ũĩkĩĩaa ũthwii wake akavalũka; Ĩndĩ ũla mũlũngalu akaaĩlaa ta ĩtũ yĩũ.

²⁹ Ũla ũthĩnasya nyũmba yake mwene akatiĩwa kĩseve; Na ũla mũtumanu akeethĩwa mũthũkũmi wa ũla mũĩ ngoo.

³⁰ Ũsyao wa ũla mũlũngalu nĩ mũtĩ wa thayũ; Na ũla mũĩ nĩwĩtĩkĩlĩthasya andũ.

³¹ Sisya, ala alũngalu makaĩvĩwa kũũ nthĩ; Nĩ mbee veana ata ala athũku na eki ma naĩ!