NTHIMO 10 - Mbivilia

Ala alũngalu na ala athũku maivathũkanw’a

¹ Nthĩmo sya Solomoni. Mwana mũĩ nũtanĩthasya ĩthe; Ĩndĩ mwana mũtumanu nĩ kĩmako kya inyia wake.

² Syĩndũ syũmbanĩtw’e na ũthũku itiunaa; Ĩndĩ ũlũngalu nũvonokasya kuma kĩkw’ũnĩ.

³ Yeova ndakaeka ngoo ya ũla mũlũngalu ĩnyale; Ĩndĩ nũluutĩĩlaa ũtee kwenda kwa ũla mũthũku.

⁴ Ũla ũtethasya wĩa na kw’oko kũleelu nũtw’ĩkaa ngya; Ĩndĩ kw’oko kwa ũla mũthingu nĩkũthuasya.

⁵ Ũla wũmbanasya ĩvinda ya syũa nĩ mwana mũĩ; Ĩndĩ ũla ũkomaa ĩvinda ya ngetha nĩ mwana ũla ũsonokasya.

⁶ Moathimo me ĩũlũ wa mũtwe wa ũla mũlũngalu; Ĩndĩ ũng’endu nũtumĩaw’a kanyw’anĩ wa ũla mũthũku.

⁷ Ũlilikano wa ũla mũlũngalu nĩ mũathimĩku; Ĩndĩ syĩtwa ya mũthũku yĩkoa.

⁸ Ala oĩ ngoonĩ makoosa mĩao; Ĩndĩ ndia ĩla ĩvulũkaa ndeto ĩkavalũka.

⁹ Ũla ũendaa na mĩendele myaĩlu aendaa na ũĩkĩĩi; Ĩndĩ ũla welelũkasya mĩendele yake akamanyĩka.

¹⁰ Ũla ũvenanĩasya na itho aetae woo; Ĩndĩ ndia ĩla ĩvulũkaa ndeto ĩkavalũka.

¹¹ Kanyw’a wa alũngalu nĩ nthongo ya thayũ; Ĩndĩ ũng’endu nũtumĩaw’a kanyw’anĩ wa ũla mũthũku.

¹² Kĩmena nĩkyũkĩlasya mateta; Ĩndĩ wendo nũvw’ĩkaa mavĩtyo onthe.

¹³ Ũĩ nĩwonekaa ilomonĩ sya ũla ũvathũkanasya maũndũ; Ĩndĩ ndata nĩ ya mũongo wa ũla ũte na ũmanyi.

¹⁴ Andũ oĩ maiaa ũmanyi; Ĩndĩ kanyw’a wa ũla mũtumanu nĩ wanangĩko wa yu.

¹⁵ Syĩndũ sya mũndũ mũthwii nĩ ndũa yake yĩ vinya: Wanangĩko wa ngya nĩ ũkya woo.

¹⁶ Wĩa wa ũla mũlũngalu wangĩe thayũnĩ; Wongeleko wa ũla mũthũku welekele naĩnĩ.

¹⁷ Ũla wĩw’aa aikanw’a e nzĩanĩ ya thayũ; Ĩndĩ ũla ũleaa ũkan’yo nũvĩtasya.

¹⁸ Ũla ũvithaa kĩmena nĩ wa ilomo ineenaa ũvũngũ; Na ũla ũneenaa nzukũ nĩ ndia.

¹⁹ Wingĩnĩ wa ndeto vatyaa ĩvĩtyo; Ĩndĩ ũla ũsiĩĩaa ilomo syake nĩwĩkaa na ũĩ.

²⁰ Ũĩmĩ wa ũla mũlũngalu nĩ ta vetha mũseo: Ngoo ya ũla mũthũku nĩ ya vata mũnini.

²¹ Ilomo sya mũlũngalu niathĩasya aingĩ; Ĩndĩ atumanu makusaa nũndũ wa kwaa ũmanyi.

²² Ũathimo wa Yeova, naw’o nũthuasya; Na ndawongelanasya na woo.

²³ Nĩ ta ĩthaũ kwa ndia kwĩka ũthũku; Now’o ũilyĩ ũĩ kwa mũndũ wĩ na ũmanyi.

²⁴ W’ĩa wa mũthũku, naw’o ũkooka ĩũlũ wake; Na kwenda kwa alũngalu kũkeanĩwa.

²⁵ Yĩla kĩlingi kyavĩta, mũthũku nde vo; Ĩndĩ ũla mũlũngalu nĩ wambĩlĩlyo wa tene na tene.

²⁶ Tondũ siki ũtilyĩ maeonĩ, na tondũ syũki yĩtilyĩ methonĩ, Now’o mũtulu ũilyĩ kwa ala mamũtũmaa.

²⁷ Kũmũkĩa Yeova nĩkwongelaa mĩthenya; Ĩndĩ myaka ya athũku ĩkakuvĩvw’a.

²⁸ Wĩkwatyo wa mũlũngalu ũkeethĩwa ũtanu; Ĩndĩ weteelo wa mũthũku ũkaa.

²⁹ Nzĩa ya Yeova nĩ ngome yĩ vinya kwa mũlũngalu; Ĩndĩ nĩ wanangĩko kwa eki ma naĩ.

³⁰ Mũlũngalu ndakavetwa nongi; Ĩndĩ mũthũku ndakatũa ĩ nthĩ.

³¹ Kanyw’a wa mũlũngalu nĩwumasya ũĩ; Ĩndĩ ũĩmĩ wĩ ngũlũ ũkatilwa.

³² Ilomo sya mũlũngalu nĩsyĩsĩ kĩla kĩtĩkĩlĩkaa; Ĩndĩ kanyw’a wa mũthũku nũneenaa na ngũlũ.