NTHIMO 1 - Mbivilia

Ũseo wa nthimo

¹ Nthimo sya Solomoni mwana wa Ndaviti, mũsumbĩ wa Isilaeli:

² Kũmanya ũĩ na ũmanyĩsyo; Kũvathũkan’ya ndeto sya ũmanyi;

³ Kwosa ũmanyĩsyo wa kwĩka ũĩ, Na wa ũlũngalu na wa ũsili wa w’o na katĩ;

⁴ Kũmũnenga ũla ũte ũmanyi kĩlĩko, Na mwanake ũmanyi na kĩlĩko:

⁵ Nĩ kana mũndũ ũla mũĩ ew’e, na kwongeleka kwosa momanyĩsyo; Na nĩ kana mũndũ wa ũmanyi akwate motao meanĩu:

⁶ Kũmanya nthimo, na ũalyũlo wayo, Ndeto sya andũ oĩ, na ndaĩ syoo.

⁷ Kũmũkĩa Yeova nĩ wambĩlĩlyo wa ũmanyi; Ĩndĩ ala atumanu mavũthasya ũĩ na ũmanyĩsyo.

Motao na mokan’yo

⁸ Mwana wakwa, ĩw’a ũmanyĩsyo wa ĩthe waku, Na ndũkaatie mĩao ya inyia waku:

⁹ Nũndũ makeethĩwa ta ngovia ya mumo mũtwenĩ waku, Na mĩnyoo ngingonĩ yaku.

¹⁰ Mwana wakwa, ethĩwa andũ athe nĩmeũkũsengasenga, Ndũketĩkĩle.

¹¹ Ethĩwa makakwĩa, Ũka tũendan’ye, Twoveesye twĩtĩkye nthakame; Twoveesye kĩmbithĩnĩ ala mate na ĩvĩtyo vate kĩtumi;

¹² Tũmamelye me thayũ ta Seoli, Na me aima, ta ala matheeaa yĩla iĩmanĩ;

¹³ Tũkoona syĩndũ syonthe syĩ vata mũno; Tũkausũsya nyũmba sitũ na mũtavo:

¹⁴ Ũkekye mũlimano waku vamwe naitũ; Ithyonthe tũkeethĩwa na ngusu ĩmwe:

¹⁵ Mwana wakwa, ndũkaendan’ye nzĩanĩ wĩ namo, Siĩĩa kũũ kwaku nzĩanĩ syoo:

¹⁶ Nũndũ maũũ moo masembaa meke ũthũku, Na mekalaataa metĩkye nthakame.

¹⁷ Nũndũ nĩ mana kũtambũũkya kĩtei Nyũnyi yene:

¹⁸ Na asu moveeasya nthakame yoo ene; Moveeasya na kĩmbithĩ mathayũ moo ene.

¹⁹ Nĩ w’o itilyĩ nzĩa sya kĩla ũmwe wĩ na ĩtomo ya ũtandĩthyo; Nĩyĩvetaa thayũ wa ene mayo.

Ũkan’yo wa ũĩ

²⁰ Ũĩ nũkayĩaa na wasya mũnene nzĩanĩ nene; Nĩumĩasya wasya waw’o kũndũnĩ kwaamu;

²¹ Nũkayĩaa vandũ va ndaĩa va kũmbanĩa; Ũlikĩlonĩ wa mbingĩlo, Nthĩnĩ wa ndũa, nĩumĩasya ndeto syaw’o:

²² Inyw’ĩ mũte ũmanyi, mũkenda kũtamanya kwenyu kũvika ĩndĩĩ? Na akaakaan’ya matanĩa kũkaakaasyanĩ kwoo, Na ndia kũmena ũmanyi?

²³ Ĩthyũũe kwondũ wa kũkanw’a ninyie: Sisyai, ngoonosya veva wakwa ĩũlũ wenyu; Ngamũmanyĩthya ndeto syakwa.

²⁴ Nĩkwĩthĩwa nĩnĩtanĩte, na nĩmũleete; Nĩnĩtambũũkĩtye kw’oko kwakwa, na vati mũndũ ũsisya;

²⁵ Ĩndĩ nĩmũtw’ĩte motao makwa onthe mana, Na mũtikwĩtĩkĩla mokan’yo makwa:

²⁶ O nakwa ngatheka mũthenyanĩ wa wanangĩko wenyu mũnene; Ngavũa ngũĩ yĩla w’ĩa wenyu wĩũka;

²⁷ Yĩla w’ĩa wenyu wĩũka ta kĩlingi, Na wanangĩko wenyu mũnene wĩũka ta kĩlingi; Yĩla monyamao na woo mũnene meũka ĩũlũ wenyu.

²⁸ Nĩvo ĩndĩ makengaĩla, ĩndĩ ndikasũngĩa; Makamantha na kĩthing’ĩĩsyo, ĩndĩ matikambona.

²⁹ Nũndũ nĩmamenie ũmanyi, Na matyaanyuva kũkĩa Yeova,

³⁰ Matyaaĩtĩkĩla motao makwa, Nĩmavũthisye mokan’yo makwa onthe.

³¹ Kwondũ wa ũu makaya ũsyao wa mĩendele yoo ene, Na kusũwa nĩ mĩtavyo yoo ene.

³² Nũndũ kũsyoka na ĩtina kwa ala mate ũmanyi kũkamoaa, Na kalengo ka ndia kakasyananga.

³³ Ĩndĩ o ũla ũmbĩthukĩĩsya akatũaa eyelelye, Na akekala athũmũĩte vate w’ĩa wa ũthũku.