MATHAYO 9 - Mbivilia

Kũvow’a kwa mũndũ waĩ mwau mamutha

¹ Na alika ngalawanĩ, ainga, athi ndũanĩ kwoo.

² Na sisya, mamũetee mũndũ ũla waĩ na ũwau wa kwaa mamutha, akomete ũkomonĩ: na Yesũ oona mũĩkĩĩo woo amwĩa ũla waĩ na ũwau wa kwaa mamutha, Mwana, ĩthĩwa na ũnyĩau; naĩ syaku nĩsyaekwa.

³ Na sisya, amwe ma aandĩki maneena ngoonĩ syoo, Mũndũ ũũ nũkũumana.

⁴ Na Yesũ amanya malilikano moo, asya, Nĩ ũndũ wa kĩ mũũsũanĩa mothũku ngoonĩ syenyu?

⁵ Nũndũ ũla ũvũthũ nĩ wĩva, kwasya, Naĩ syaku nĩsyaekwa; kana kwasya, Ũkĩla, ũthi?

⁶ Ĩndĩ nĩ kana mũmanye atĩ Mwana wa mũndũ e na ũkũmũ kũũ nthĩ wa kũekea naĩ (nĩvo wamwĩie ũla waĩ na ũwau wa kwaa mamutha), Ũkĩla, ũkue ũkomo waku, wĩnũke.

⁷ Nake ookĩla, enũka.

⁸ Ĩndĩ makomano moona ũu, makwatwa nĩ w’ĩa, na mamũtaĩa Ngai, ũla ũnengete andũ ũkũmũ ta ũsu.

Kwĩtwa kwa Mathayo

⁹ Na Yesũ akĩvĩta kuma vau, oona mũndũ, wetawa Mathayo, ekalĩte vala vaumĩaw’a koti: na amwĩa, Mbikĩla. Nake ookĩla, amũvikĩla.

¹⁰ Na kweethĩwa ekalĩte nyũmba akĩya lĩu, sisya, aumya ma koti na andũ athe aingĩ mooka na mekala nthĩ vamwe na Yesũ na amanyĩw’a make.

¹¹ Na Avalisi moona ũu, mamea amanyĩw’a make, Nĩkĩ Mũmanyĩsya wenyu ũnũũya vamwe na aumya ma koti na andũ athe?

¹² Nake eew’a ũu, amea, Ala mate awau mati vata wa mũiiti, ĩndĩ no ala awau.

¹³ Ĩndĩ endai mũkemanyĩsye ũndũ ũtilyĩ ũndũ ũũ, Nyie nendaa tei na ti nthembo: nĩkwĩthĩwa ndyaaũka kũmeta ala alũngalu, ĩndĩ nĩ ala athe.

Ũndũ wa kũtĩĩa ũya

¹⁴ Nĩvo ĩndĩ amanyĩw’a ma Yoana mookie, makyasya, Nĩkĩ ithyĩ na Avalisi tũtĩĩaa ũya mavinda maingĩ, ĩndĩ amanyĩw’a maku matitĩĩaa ũya?

¹⁵ Na Yesũ amakũlya, Ala metĩtwe mũtwaanonĩ nĩmatonya kũmeta ĩvinda yĩla mũtwaani wĩ vamwe nao? Ĩndĩ mĩthenya nĩyũkĩte, yĩla mũtwaani ũkaumw’a kwoo, nĩvo ĩndĩ makatĩĩa ũya.

¹⁶ Na vai mũndũ ũliaa kĩlio kya ngũa nzaũ ngũanĩ ngũũ; nũndũ kĩla kĩkĩawa vo nĩkyumasya kĩlungu kya ngũa ĩla ngũũ, na ũtembũku ũiendeea ũineneva.

¹⁷ O na andũ maiĩ-kĩaa mbinyu mbĩthĩ mathatwanĩ makũũ: nĩkwĩthĩwa mekĩa, ala mathatwa makatembũka, na mbinyu ĩkĩtĩka, na mathatwa makyanangĩka: ĩndĩ mekĩaa mbinyu mbĩthĩ mathatwanĩ meũ, na syelĩ ikĩkala.

Mwĩĩtu wa Yailu, na mũndũ mũka wauaa nthakame

¹⁸ Akĩneena maũndũ asu nao, sisya, kwooka mũndũ ũmwe mũnene, na amũthaitha, akyasya, Mwĩĩtu wakwa nĩwakw’a oyu: ĩndĩ ũka ũkamwilĩĩle kw’oko na nũnũkwĩthĩwa thayũ.

¹⁹ Na Yesũ ookĩla, amũvikĩla, vamwe na amanyĩw’a make.

²⁰ Na sisya, mũndũ mũka, ũla waumawa nĩ nthakame ĩvinda ya myaka ĩkũmi na ĩlĩ ooka ĩtina wake, na akiita ũtiivo wa ngũa yake:

²¹ nũndũ aisye ngooni yake, Nakiita, o na ethiwa no ngũa yake, nĩngũvoa nĩthĩwe nĩ mũima.

²² Ĩndĩ Yesũ eethyũũa na amwona amwĩa, Mwĩĩtu, ĩthĩwa na ũtanu mũnene; mũĩkĩĩo waku nĩwakũvosya. Na ũla mũndũ mũka avoa, eethĩwa e mũima kuma kavinda o kau.

²³ Na Yesũ alika nyũmbanĩ ya ũla mũnene, na oona avuvi ma nzumalĩ, na nguthu ya andũ maĩlonzan’ya,

²⁴ asya, Umai vaa: nũndũ kelĩtu ti kakw’ũ, ĩndĩ nĩkakomete. Na mamũthekeea mũno.

²⁵ Ĩndĩ ĩla nguthu yaumaalw’a nza, avota nthĩnĩ, na akakwata kw’oko; na kala kelitu kookĩla.

²⁶ Na nguma ya ũndũ ũsu yanyaĩĩka nthĩ ĩsu yonthe.

Ililinda ilĩ

²⁷ Na Yesũ akĩvĩta kuma vo, ililinda ĩlĩ syamũatĩĩa, syaneena na mawasya manene, ikyasya, Twĩw’ĩe tei, we mwana wa Ndaviti.

²⁸ Na avota nyũmba, ila ililinda syooka vala ũĩ: na Yesũ asyĩa, Nĩmũĩkĩĩe kana nĩndonya kwĩka ũndũ ũũ? Syamwĩa, Ĩĩ, Mwĩaĩi.

²⁹ Nĩvo ĩndĩ wakiitie metho masyo, akyasya, O ta kũĩkĩĩa kwenyu nĩkwĩkwe kwenyu.

³⁰ Na metho masyo masalukw’a. Na Yesũ amakindĩlĩla na vinya, akyasya, Sisyai mũndũ o na ũmwe ndakamanye.

³¹ Ĩndĩ mo mauma vo, na manyaĩĩkya nguma yake nthĩ ĩsu yonthe.

Mũndũ ũtaneenaa ũkwatĩtwe nĩ ndaimoni

³² Na makyumaala, sisya, aetewe mũndũ ũtaneenaa, ũkwatĩtwe nĩ ndaimoni.

³³ Na ndaimoni yaumwa, ũla ũtaneenaa, aneena: na makomano maseng’a, makyasya, Nthĩnĩ wa Isilaeli ũndũ ũsu ndwaamba kwoneka.

³⁴ Ĩndĩ Avalisi masya, Aumasya ndaimoni na vinya wa mũnene wa ndaimoni.

Tei wa Klĩsto kwa andũ

³⁵ Na Yesũ anganga ndũa syonthe na mĩsyĩ, aimanyĩsya masinakokenĩ moo, na aitavan’ya ũvoo mũseo wa ũsumbĩ, na aivosya mowau ma mĩthemba yonthe na kĩla wonzu.

³⁶ Na amona makomano, amew’ĩa tei nĩkwĩthĩwa nĩmanyamaaw’a na kũnyaĩĩkw’a ta malondu mate na mũĩthi.

³⁷ Na ĩndĩ amea amanyĩw’a make, Nĩ w’o ngetha nĩ nyingĩ, ĩndĩ akethi nĩ avũthũ.

³⁸ Voyai ĩndĩ Mwĩaĩi wa ngetha, atũme akethi ngethanĩ yake.