MATHAYO 8 - Mbivilia

Kũvow’a kwa mũndũ ũwaĩte mangũ

¹ Na atheea kuma kĩĩmanĩ, makomano maingĩ mamũatĩĩa.

² Na sisya, mũndũ ũwaĩte mangũ athi vala ũĩ na amũthaitha, akyasya, Mwĩaĩi, ethĩwa nũkwenda, nũtonya kũnthesya.

³ Nake atambũũkya kw’oko kwake, na amũkiita, akyasya, Nĩngwenda; ĩthĩwa mũtheu. Na oyu athea mangũ make.

⁴ Na Yesũ amwĩa, Sisya, ndũkatavye mũndũ; ĩndĩ thi, ũkeyonan’ye kwa mũthembi, noiumya mũthĩnzĩo ũla Mose weaie, wĩthĩwe ũkũsĩ kwoo.

Mũthũkũmi wa mũnene wa asikalĩ ĩana aivow’a

⁵ Na avota Kavelinaumi, mũnene wa asikalĩ ĩana ooka vala ũĩ, aimwĩsũva,

⁶ akyasya, Mwĩaĩi, mũthũkũmi wakwa nũkomete nyũmba awaĩte ũwau wa kwaa mamutha, na nũnũũthĩna mũno.

⁷ Na amwĩa, Ngooka na ngĩmũvosya:

⁸ Na ũla mũnene wa asikalĩ ĩana amũsũngĩa, asya, Mwĩaĩi, ndyĩanĩwe nue kũlika ungu wa kĩala kyakwa; ĩndĩ neena ndeto tũ, na mũthũkũmi wakwa nũnũũvoa.

⁹ Nũndũ nyie nakwa nĩ mũndũ ũla wĩaĩawa, nĩ na asikalĩ makwa ĩtheo wakwa; na ngĩmwĩa ũmwe, Enda, na akĩthi; na ũngĩ, Ũka na akyũka; na ngombo yakwa, Ĩka ũna, na ĩkĩka.

¹⁰ Na Yesũ eew’a ũu, aseng’a, na amea ala mamũvikĩlĩte, Nĩw’onĩngũmwĩa, Ndyaaona mũĩkĩĩo mũnene ta ũu, aiee, o na nthĩnĩ wa Isilaeli.

¹¹ Nakwa nĩngũmwĩa, kana aingĩ makooka kuma wumĩlonĩ wa syũa na ũthũĩlonĩ wa syũa, na makekala nthĩ vamwe na Avalaamu, na Isaka, na Yakovo ũsumbĩnĩ wa ĩtu:

¹² ĩndĩ ana ma ũsumbĩ makekw’a kĩvindũnĩ kĩla kĩ nza: vo vakethĩwa kĩĩo na kũvevetan’ya maeo.

¹³ Na Yesũ amwĩa ũla mũnene wa asikalĩ ĩana Ĩendee; kwĩthĩwe kwaku o tondũ ũĩkĩĩe. Na ũla mũthũkũmi avow’a kavinda o kau.

Yesũ aivosya inyia wa mũka wa Vetelo na angĩ aingĩ

¹⁴ Na Yesũ athi nyũmbanĩ ya Vetelo, oona inyia wa mũka wa Vetelo akomete awaĩte ndetema.

¹⁵ Nake amũkiita kw’oko, na ndetema yamũtia; nake ookĩla, amathũkũma.

¹⁶ Na kwavika wĩoo, mamũetee aingĩ makwetwe nĩ ndaimoni: na amaumya ndaimoni na ndeto, na avosya onthe ala maĩ awau:

¹⁷ nĩ kana kwĩanĩw’e ũla waneeniwe nĩ mwathani Isaia, akyasya, We mwene nĩwosie mawonzu maitũ na akua mowau maitũ.

Matatwa ma ala metw’ika amanyĩw’a ma Yesũ

¹⁸ Na Yesũ oona makomano manene mamũthyũlũlũkĩte, eeaa mathi mũingo ũla ũngi.

¹⁹ Na kwooka mũandĩki ũmwe, na amwĩa, Mũmanyĩsya, ngakũatĩĩa o kũla wĩthi.

²⁰ Na Yesũ amwĩa, Mbĩwa syĩ na maima, na nyũnyi sya yayaya syĩ na ndala; ĩndĩ Mwana wa mũndũ nde na vandũ va ũkomya mũtwe wake.

²¹ Na ũngĩ wa amanyĩw’a amwĩa, Mwĩaĩĩ, nenga ũthei nambe ũthi kũmũthika nau.

²² Ĩndĩ Yesũ amwia, Mbikĩla; eka akw’ũ mathike akw’ũ moo.

Yesũ aiuĩthya kĩseve kĩnene

²³ Na alika ngalawanĩ, amanyĩw’a make mamũvikĩla.

²⁴ Na sisya, kwookĩla kĩuutani kĩnene ũkanganĩ, mũvaka ngalawa yavw’ĩkwa nĩ itulumo: ĩndĩ we nĩwakomete.

²⁵ Na mathi vala ũĩ mamũamũkya, makyasya, Mwĩaĩi tũtangĩĩe; nĩtũũkw’a.

²⁶ Na amea, Nĩkĩ mwĩ na w’ĩa inyw’ĩ ma mũĩkĩĩo mũnini? Nĩvo ĩndĩ wokĩlile, akan’ya iseve na ũkanga; na kwaya ũuu mũnene.

²⁷ Na ala andũ maseng’a, makyasya, Ailyĩ ata mũndũ ũũ, nũndũ o na iseve na ũkanga niũmwĩw’a?

Andũ Akatalene makwatĩtwe nĩ ndaimoni

²⁸ Na avika mũingo ũla ũngĩ nthĩ ya Akatalene, andũ elĩ makwatĩtwe nĩ ndaimoni makomana nake, maumĩte mbũanĩ me ai mũno, ũndũ mũndũ o na wĩva ndaĩ atonya kũvĩtĩla nzĩanĩ ĩsu.

²⁹ Na sisya makaya, makyasya, Ithyĩ twĩ ũndũ naku wa kĩ, we Mwana wa Ngai? Nĩwooka vaa kũtũthĩn’ya ĩvinda yĩte ĩviku?

³⁰ Na ĩndĩ kwaĩ ĩĩthya ya ngũlũe nyingĩ vaasa nao yĩkĩya.

³¹ Na ila ndaimoni syamwĩsũva, ikyasya, Ethĩwa nũũtumya, tũeke tũende tũlike ĩĩthyanĩ ya ngũlũe.

³² Na asyĩa, Thii. Nasyo syauma, syalika ngũlũenĩ: na sisya, yĩla ĩĩthya yonthe ya ngũlũe yatheea kĩvaũũkonĩ yĩsembete, yalika ũkanganĩ, yakw’ĩa manzĩnĩ.

³³ Na ala maĩthasya, mathi ndũanĩ, na matavan’ya ũvoo w’onthe, na ũndũ ũmakĩtĩkie ala meĩkwatĩtwe nĩ ndaimoni.

³⁴ Na sisya, andũ ma ndũa nima maumaala kũmũthaũa Yesũ: na mamwona, mamwĩsũva aume mĩvakanĩ yoo athi.