MATHAYO 5 - Mbivilia

“Ũtavan’yo kĩĩmanĩ”

¹ Nake akyona ala makomano, ambata kĩĩmanĩ: na ekala nthĩ, amanyĩw’a make mathi vala ũĩ:

² na aathamya kanyw’a wake na amamanyĩsya, akyasya,

Ala aathime

³ Nĩ aathime ala me na ũkya wa ngoo: nũndũ ũsumbĩ wa ĩtu nĩ woo.

⁴ Nĩ aathime ala me na kĩmeto: nũndũ nĩo makakiakiw’a.

⁵ Nĩ aathime ala auu: nũndũ nĩo makatiĩwa nthĩ.

⁶ Nĩ aathime ala me na nzaa na waũni wa ũlũngalu: nũndũ nĩo makausũw’a.

⁷ Nĩ aathime ala me na tei: nũndũ nĩo makew’ĩwa tei.

⁸ Nĩ aathime ala atheu ngoo: nũndũ nĩo makamwona Ngai.

⁹ Nĩ aathime ala mekaa mũuo: nũndũ nĩo maketwa ana ma Ngai.

¹⁰ Nĩ aathime ala mathĩniw’e kwondũ wa ũlũngalu: nũndũ ũsumbĩ wa ĩtu nĩ woo.

¹¹ Mwĩ aathime inyw’ĩ yĩla andũ meũmũkava, na kũmũthĩn’ya na kũmũneenea kĩla ũndũ ũthũku wa ũvũngũ, kwondũ wakwa.

¹² Tanai, na ĩthĩwai na mũyo mũnene: nĩkwĩthĩwa ĩtuvi yenyu nĩ ĩnene ĩtunĩ: nũndũ ũu nĩw’o mathĩnisye athani ala maĩ mbee wenyu.

Momanyĩsyo kwa ngelekan’yo ya mũnyũ na taa

¹³ Inyw’ĩ mwĩ mũnyũ wa nthĩ: ĩndĩ ũla mũnyũ wathela mũsamo waw’o, ũkasamĩthw’a mũnyũ na kyaũ? Ndwĩ vata ĩngĩ nongi, ate o kwĩkw’a ĩtheka na kũkinyangwa nĩ andũ.

¹⁴ Ĩnyw’i mwĩ kyeni kya nthĩ. Ndũa yĩ kĩĩmanĩ ĩũlũ ndĩvithĩka.

¹⁵ O na andũ maikwatasya taa, na kũwia ungu wa ĩmisi, ĩndĩ mawiaa vala vatũlu; naw’o nũmamulĩkĩlaa onthe me nyũmba.

¹⁶ No ta ũu kyeni kyenyu nĩkĩkenae mbee wa andũ, nĩ kana mone mawĩa menyu maseo, na kũmũtaĩa Ĩthe wenyu ũla wĩ ĩtunĩ.

Mwĩao mũkũũ na mwĩao mweũ wa Yesũ

¹⁷ Mũikasũanĩe kana nokie kwananga mĩao kana mavuku ma athani: ndyaaũka kwananga, ĩndĩ nĩ kwĩanĩsya.

¹⁸ Nũndũ nĩ w’o nĩngũmwĩa, Mũvaka yĩla ĩtu na nthĩ ikavĩta, kũikavĩta kaũandĩko kamwe kana kaũkenyũsyo kamwe mĩaonĩ, mũvaka onthe meanĩw’e.

¹⁹ Na ĩndĩ mũndũ o na wĩva ũla ũkananga mwĩao ũmwe wa ĩno ĩla mĩnini, na kũmanyĩsya andũ ũu, aketwa mũnini mbee ũsumbĩnĩ wa ĩtu: ĩndĩ o ũla ũkamĩka na kũmĩmanyĩsya, aketwa mũnene ũsumbĩnĩ wa ĩtu.

²⁰ Nũndũ nĩngũmwĩa, Ũlũngalu wenyu walea kũvĩtũka ũlũngalu wa aandĩki na Avalisi, mũikalika nongi ũsumbĩnĩ wa ĩtu.

Ũthatu na ũaani

²¹ Nĩmwĩw’ĩte kana andũ ma tene meeĩwe, Ndũkoae; na o ũla ũkoaa akethĩwa mũndũ wa kũsilĩlwa:

²² ĩndĩ nyie nĩngũmwĩa, o ũla ũkamũthatĩa mwana‐a‐ĩthe vate kĩtumi akethĩwa mũndũ wa kũsilĩlwa; na o ũla ũkamũkava mwana‐a‐ĩthe akethĩwa mũndũ wa kũsilĩlwa ni nzama; na o ũla ũkasya, Wĩ ndia we, akethĩwa ũla waĩlwe nĩ mwaki wa Ngiena.

²³ Ethĩwa ĩndĩ nũũnengane mũthĩnzĩo waku kĩthembeonĩ, na ũkĩlilikanĩla vu kana mwana‐a‐au e ũndũ naku,

²⁴ tia mũthĩnzĩo waku vu mbee wa kĩthembeo, noithi, wambe kwĩw’ana na mwana‐a‐au na ĩndĩ ũkyũka ũnengane mũthĩnzĩo waku.

²⁵ Ĩw’ana mĩtũkĩ na mũvinganĩsya waku, yĩla wĩ vamwe nake nzĩanĩ; ũla mũvinganĩsya ndakese ũkũtwaa kwa mũsili na mũsili aikũnengane kwa ĩkanga noyĩkĩwa kolokolonĩ.

²⁶ Nĩ w’o nĩngũkwĩa, Ndũkauma vo nongi, mũvaka waĩva kũvika ĩsendi ya kũminũkĩlya.

Ũvuku

²⁷ Nĩmwĩw’ĩte kana nĩkwaneeniwe, Ndũkalaalae:

²⁸ ĩndĩ nyie nĩngũmwĩa, kana kĩla mũndũ ũsyaasya mũndũ mũka na kũmwĩw’ĩa mũmeo nĩweka ũlaalai nake ngoonĩ yake.

²⁹ Na ethĩwa itho yaku ya ngalĩ ya kw’oko kwa aũme nĩyĩũkũlulutĩkya, yumye, ũyĩkye kũasa naku: nũndũ nĩkwaĩle kwaku kwaĩwa nĩ mutha ũmwe waku, kwĩ mwĩĩ waku w’onthe kwĩkw’a Ngienanĩ.

³⁰ Na ethĩwa kw’oko kwaku kwa aũme nĩkũũkũlulutĩkya, kũtile, ũkwĩkye kũasa naku: nũndũ nĩkwaĩle kwaku kwaĩwa nĩ mutha ũmwe, kwĩ mwĩĩ waku w’onthe kwĩkw’a Ngienanĩ.

³¹ Na ĩngĩ nĩkwaneeniwe, O ũla ũekaa mũka, namũnenge valũa wa kũtaanĩsya:

³² ĩndĩ nyie nĩngumwia, kana kĩla mũndũ ũekaa mũka wake, ate o kwondũ wa ũlaalai, nũnũũmũtw’ikĩthya kĩlaalai: na o ũla wĩmũtwaa ũsu ũeketwe nũnũũlaalaa.

Mawĩvĩto ma ũvũngũ na w’o

³³ Na ĩngĩ, nĩmwĩw’ĩte kana andũ ma tene meeiwe, Ndũkaaĩvĩte wĩvĩto wa ũvũngũ, ĩndĩ wĩkae mawĩvĩto maku kwa Mwĩaĩi:

³⁴ ĩndĩ nyie nĩngũmwĩa, Mũikaaĩvĩte nongi; o na kwa ĩtu, nĩkwĩthĩwa nĩyo kĩvĩla kya ũsumbĩ kya Ngai;

³⁵ o na kwa nthĩ, nĩkwĩthĩwa nĩyo kavĩla ka nyaĩĩ syake; o na kwa Yelusaleme, nĩkwĩthĩwa nĩyo ndũa ya Mũsumbĩ ũla mũnene.

³⁶ O na ndũkaaĩvĩte na mũtwe waku, nĩkwĩthĩwa ndũtonya kũtuma ũsw’ĩĩ ũmwe weũva kana wia.

³⁷ Ĩndĩ kũneena kwenyu kwĩthĩwe, Ĩĩ, ĩĩ; Aiee, aiee; na ũndũ o na wĩva ũla ũthonokete asu, nĩ wa ũla mũthũku.

Wĩyĩĩvanĩsyo

³⁸ Nĩmwĩw’ĩte kana nĩkwaneeniwe, Itho vandũ va itho, na ĩeo vandũ va ĩeo:

³⁹ ĩndĩ nyie nĩngũmwĩa, Mũikakĩlan’ye vinya na mũndũ mũthũku; ĩndĩ o ũla ũnũũkũkũna ĩtau ya ngalĩ ya kw’oko kwa aũme, mũthyũũĩe yĩngĩ nayo.

⁴⁰ Na ethĩwa mũndũ o na wĩva nũkwenda ũkũtwaa silanĩ, na kwosa kĩtonyeo kyaku, mũekee ngũa yaku ya ĩũlũ nayo.

⁴¹ Na o ũla ũkakũĩngĩĩsya kũthi nake mũendo wa nyunzu ya saa, endan’ya nake saa mũima.

⁴² Mũnenge ũla ũnũũkwĩtya; na ũla ũnũkwenda kũkova kwaku, ndũkamũvate.

Wendo na mwĩkalo mwĩanĩu

⁴³ Nĩmwĩw’ĩte kana nĩkwaneeniwe, Mwende mũtũi waku, na mũmene mũmaitha waku:

⁴⁴ ĩndĩ nyie nĩngũmwĩa, Mendei amaitha menyu, na mavoyeaei ala mamũthĩnasya;

⁴⁵ nĩ kana mwĩthĩwe ana ma Ĩthe wenyu ũla wĩ ĩtunĩ; nĩkwĩthĩwa we nũmaumĩasya syũa yake athũku na aseo, na kũmauĩsya mbua ala mekaa ũlũngalu na ala matekaa ũlũngalu.

⁴⁶ Nũndũ mũkĩmenda ala mamwendaa, mwĩ na ĩtuvi yaũ? O na aumya ma koti matyĩkaa o ũu?

⁴⁷ Na ethĩwa mwĩmakethya ana‐a‐ĩthe menyu oka, mũmavĩtũkaa va? O na Andũ‐ma‐mbaĩ‐ingĩ matyĩkaa o ũu?

⁴⁸ Inyw’ĩ ĩndĩ ĩthĩwai eanĩu, tondũ Ĩthe wenyu wĩ ĩtuni nĩ mwĩanĩu.