MATHAYO 3 - Mbivilia

Yoana Mũvatisi na ũtũmane wake

¹ Na matukũ asu Yoana Mũvatisi aumĩla, akĩtavan’ya weũnĩ wa Yutia, akyasya,

² Alyũlai ngoo; nũndũ ũsumbĩ wa ĩtu nĩ mũthengeeu.

³ Nĩkwĩthĩwa ũũ nĩwe ũla wawetiwe nĩ mwathani Isaia, akyasya, Wasya wa mũndũ akĩneena mũno weũnĩ, Seũvyai nzĩa ya Mwĩaĩi, Lũngalyai moendelo make.

⁴ Na Yoana mwene aĩ na ngũa yake ya w’ĩa wa ngamĩle, na mũkwa kĩnyunyunĩ kyake; na kya ũya kyake kyaĩ ngie na ũkĩ wa nzũkĩ wa kĩthekanĩ.

⁵ Nĩvo Yelusaleme, na Yutia yonthe, na nthĩ yonthe ĩthyũlũlũkĩte Yolotani maendie vala ũĩ;

⁶ na mavatisĩwa nĩwe ũsĩnĩ wa Yolotani, makyumbũla naĩ syoo.

⁷ Ĩndĩ oona aingĩ ma Avalisi na Asatukaĩ makyũka ũvatisonĩ wake, amea, Inwy’ĩ ũsyao wa nzoka mbai, nũũ ũmwonetye kũkĩa ũthatu ũla wũkĩte?

⁸ Syaai ĩndĩ ũsyao ũla waĩle ũalyũlo wa ngoo:

⁹ na mũikalilikane kwasya nthĩnĩ wenyu, Twĩ na asa waitũ Avalaamu: nũndũ nĩngũmũtavya, kana Ngai nũtonya kũmũkĩlĩlya Avalaamu syana mavianĩ aa.

¹⁰ O na yu ĩthoka nĩyiĩtwe matinanĩ ma mĩtĩ: kĩla mũtĩ ĩndĩno ũtasyaaa ũsyao mũseo nũtemawa, na kwĩkw’a mwakinĩ.

¹¹ Nĩ w’o nyie nĩmũvatisaa na manzĩ kũvikĩa ũalyũlo wa ngoo: ĩndĩ ũla wũkĩte ĩtina wakwa e na vinya kwĩ nyie, o na ndyĩanĩwe nĩ ũkua iatũ syake: ũsu akamũvatisaa na Veva Mũtheu na mwaki:

¹² na kĩũlũkya kyake kĩ kw’okonĩ kwake, nake akathesya vyũ kĩvũĩo kyake; na akoomban’ya nganũ yake ĩkũmbĩnĩ, ĩndĩ wewa akavĩvya na mwaki ũtavoeka.

Kũvatiswa kwa Yesũ

¹³ Nĩvo ĩndĩ Yesũ waumie Kalilii athi Yolotani kwa Yoana, nĩ kana avatiswe nĩwe.

¹⁴ Ĩndĩ Yoana enda kũmũsiĩĩa, akyasya, Nyie nĩ na vata wa kũvatiswa nue, naku wĩũka kwakwa?

¹⁵ Ĩndĩ Yesũ amũsũngĩa, amwĩa, Ĩtikĩla ũu yu, nũndũ nĩw’o ũtwaĩle kwĩanĩsya ũlũngalu w’onthe. Na ĩndĩ eetĩkĩla.

¹⁶ Na Yesũ, avatiswa, ambata oyu kuma manzĩnĩ: na sisya, matu mamũvingũkĩa, na oona Veva wa Ngai aitheea ta ĩvũĩ, na aimũvũĩla;

¹⁷ na sisya, wasya wauma matunĩ, ũkyasya, Ũũ nĩwe Mwana wakwa mwendwa, ũla nendeeaw’a nĩwe.