MATHAYO 27 - Mbivilia

Yesũ ainenganwe kwa ngavana Vilato

¹ Na kwakya, athembi onthe anene na atumĩa ma andũ mamũsamĩa Yesũ, nĩ kana mamũae:

² na mamwova, mamũtwaa, na mamũnengane kwa ũla ngavana Vilato.

Kĩkw’ũ kya Yutasi

³ Na ĩndĩ Yutasi, ũla wamũvũnyanie, oona kana nĩwasilĩlwa, eelila, na amatũngĩa athembi anene na atumĩa ila ilungu mĩongo ĩtatũ sya vetha,

⁴ akyasya, Nĩnĩvĩtĩtye nũndũ nĩnĩmũvũnyanie ũla nthakame yake ĩte ĩvĩtyo. Ĩndĩ mo masya, Ũu nĩ ũndũ witũ ata? Sisya eue.

⁵ Nake ekya ila ilungu sya vetha nthĩnĩ wa vala vandũ vatheu, na aumaala; na athi eesũsya.

⁶ Na athembi anene moosa ilungu sya vetha na masya, Kũtyosana na ĩla mĩao kũsia vala vaiawa nthembo, nĩkwĩthĩwa nĩ thooa wa nthakame.

⁷ Na masũanĩa na mathooa kĩsesi kya mũmbi nasyo, kĩthĩwe vandũ va kũthikaa aeni.

⁸ Kwondũ wa ũu kĩsesi kyu kyeetwa, Kĩsesi kya nthakame, kũvika ũmũnthĩ.

⁹ Nĩvo weanĩw’e ũla waneeniwe nĩ Yelemia, akyasya, Na nĩmoosie ilungu mĩongo ĩtatũ sya vetha, thooa wa ũsu ũla watw’ĩĩwe thooa, ũla amwe ma ana ma Isilaeli mamũtw’ĩĩe thooa;

¹⁰ na mainengane kwondũ wa kĩsesi kya mũmbi o ũndũ Mwĩaĩi wambĩaĩe.

Yesũ e mbee wa Vilato

¹¹ Na Yesũ aũngama mbee wa ngavana: na ngavana amũkũlya, akyasya, We nue Mũsumbĩ wa Ayuti? Na Yesũ amwĩa, We nĩwaneena.

¹² Na avinganĩw’a nĩ athembi anene na atumĩa, ndaasũngĩa ũndũ.

¹³ Nĩvo ĩndĩ Vilato wamwĩie, Ndũkwĩw’a maũndũ ũndũ meana ala meũkũkũsĩĩa?

¹⁴ Nake ndaamũsũngĩa ndeto o na ĩmwe: mũvaka ngavana aseng’a mũno.

¹⁵ Na ĩndĩ ĩvinda ya mboka ngavana akothaa kũyĩthaĩsya ĩkomano mwovwa ũmwe, o ũla mekwenda.

¹⁶ Na ĩvinda yĩu maĩ na mwovwa ũmwe wesĩkĩwe, wetawa Valava.

¹⁷ Na ĩndĩno mombanĩte vamwe, Vilato amea, Mwĩenda nĩmũthaĩsye ũũ? Valava, kana Yesũ ũla wĩtawa Klĩsto?

¹⁸ Nũndũ nĩwesĩ kana mamũnenganie nũndũ wa kĩwĩu.

¹⁹ Na akĩkalĩla kĩvĩla kya sila, kĩveti kyake kyamũtwaĩa ũtũmane, kĩkyasya, Ndũkethĩwe na ũndũ na mũndũ ũsu mũlũngalu; nũndũ ũmũnthĩ nĩthĩniw’e nĩ maũndũ maingĩ ndotonĩ nũndũ wake.

²⁰ Na ala athembi anene na atumĩa mamathinga’ĩĩsya makomano nĩ kana mamwĩtye Valava, na kũmũaa Yesũ.

²¹ Ĩndĩ ngavana asũngĩa na amea, Andũ aa elĩ, mwĩenda nĩmũthaĩsye wĩva? Nao masya, Valava.

²² Vilato amea, Nĩmwĩke ata ĩndĩ Yesũ ũla wĩtawa Klĩsto? Onthe masya, Nĩambwe.

²³ Nake asya, Nĩkĩ, nĩ ũthũku mwaũ wĩkĩte? Ĩndĩ maneena na mawasya manene mũno, makyasya, Nĩambwe.

²⁴ Na ĩndĩ Vilato oona kana ndatonya ũndũ, ĩndĩ kĩtuu nĩkĩkwingĩva, oosa manzĩ, na athambĩsya moko make mbee wa ĩkomano, akyasya, Nyie ndi na ĩvĩtyo nthakamenĩ ya mũndũ ũũ mũlũngalu; sisyai ũndũ ũsu e inyw’ĩ.

²⁵ Na andũ onthe masũngĩa, masya, Nthakame yake yĩthĩwe ĩũlũ waitũ, na ĩũlũ wa syana sitũ.

²⁶ Nĩvo ĩndĩ wamathaĩsye Valava; ĩndĩ amũkũna Yesũ na kĩvoko kyatũange, na amũnengane ambwe.

Kwambwa kwa Yesũ

²⁷ Nĩvo asikalĩ ma ngavana mamũtwaie Yesũ kĩsilĩlonĩ, na mamũmbanĩsya nguthu yonthe ya asikalĩ.

²⁸ Na mamumya ngũa mamwĩkĩa ngũa ndune mũno.

²⁹ Na mavĩlangan’ya ngovia ya mĩw’a na mamwĩkĩa mũtwe wake, na mamũkwatĩthya mũangi kw’okonĩ kwake kwa aũme; na matulya ndu mbee wake na mamũthekeea na kĩvũthya, makyasya, Nũvoo, Mũsumbĩ wa Ayuti!

³⁰ Na mamũtw’ĩla mata, na moosa ũla mũangi na mamũkũna mũtwe.

³¹ Na mamina ũmũthekeea, mamumya ĩla ngũa, na mamwĩkĩa ngũa syake, mamũtwaa kũmwamba ngelan’yonĩ.

³² Na makyumaala, mamwĩthĩa mũndũ wa Kulene, wetawa Simoni: ũsu mamũkwata na vinya athi nao, nĩ kana amũkuĩe ngelan’yo yake.

³³ Na mavika vandũ vetawa Kolokotha, ũalyũlo wayo nĩ, Vandũ va kĩng’ala,

³⁴ mamũnenga mbinyu ĩvulanĩtw’e na nyongo: nake amĩsama, ndaaĩtĩkĩla kũnyw’a.

³⁵ Na mamwamba, maan’ya ngũa syake makĩlimana; nĩ kana kwĩanĩw’e ũla waneeniwe nĩ mwathani, Nĩmaanisye ngũa syakwa katĩ woo, na kwondũ wa kĩtonyeo kyakwa kĩasa nĩmalimanile.

³⁶ Na mekala nthĩ vo mamũsyaĩĩsye.

³⁷ Na meekĩa ũvingan’yo ĩũlũ wa mũtwe wake, ũandĩkĩtwe, ŨŨ NĨWE YESŨ MŨSUMBĨ WA AYUTI.

³⁸ Nĩvo avutani elĩ mambiwe vamwe nake, ũmwe ngalĩ ya kw’oko kwake kwa aũme, na ũngĩ ngalĩ ya kw’oko kwake kwa aka.

³⁹ Na ala mavĩtaa nzĩanĩ mamũuma, makĩthingithya mĩtwe yoo,

⁴⁰ makyasya, We ũla wanangaa ĩkalũ, nokĩyaka na mĩthenya ĩtatũ, ĩtangĩĩe mwene: ethĩwa nue Mwana wa Ngai, theea wume ngelan’yonĩ.

⁴¹ No ta ũu ala athembi anene makĩmũthekeea, vamwe na aandĩki na atumĩa, masya,

⁴² Nĩwatangĩĩe angĩ; ndatonya kwĩtangĩĩa mwene. Nĩ mũsumbĩ wa Isilaeli; natheee yu aume ngelan’yonĩ, naitũ nĩtũũmwĩtĩkĩla.

⁴³ Nũmũĩkĩĩaa Ngai; namũvonokye yu, ethĩwa nũmwendete: nũndũ aisye, Nyie nĩ Mwana wa Ngai.

⁴⁴ Na avutani nao ala mambĩtwe vamwe nake mamũneenea ndeto ta isu.

Kĩkw’ũ kya Yesũ

⁴⁵ Na kuma syũa yaũngama kwatulya kĩvindu nthĩ yonthe kũvika saa kenda.

⁴⁶ Na ta saa kenda Yesũ aneena na wasya mũnene, akyasya, Eli, Eli, lama, savakathani? Ũalyũlo wayo nĩ, Ngai wakwa, Ngai wakwa, ũndekee kĩ?

⁴⁷ Na amwe ma ala maũngeme vo, meew’a ũu, masya, Mũndũ ũũ emwĩta Eliya.

⁴⁸ Na oyu ũmwe woo asemba, na oosa sivanzi, anyw’ĩthya siki yakola, na amĩkĩa mũanginĩ, na amũnenga avivite.

⁴⁹ Na ala angĩ masya, Ekai; tũsisye kana Eliya nũnũkũka kũmũtangĩĩa.

⁵⁰ Na Yesũ aneena ĩngĩ na wasya mũnene, na aumya veva wake.

⁵¹ Na sisya, ngũa ya tũtũ ya ĩkalũ yatembũka ilungu ilĩ kuma ĩũlũ kũvika nthĩ; na nthĩ yatetema; na mavia manene maatũka;

⁵² na mbũa syavingũka; na mĩĩ mingĩ ya atheu ala maĩ manakoma yathayũũkw’a;

⁵³ na makyuma mbũanĩ ĩtina wa kũthayũũka kwake, malika ĩla ndũanĩ ntheu na mamaumĩlĩla aingĩ.

⁵⁴ Na ĩndĩ ũla mũnene wa asikalĩ ĩana, na ala maĩ nake makĩmũsyaĩĩsya Yesũ, moona kĩtetemo kya nthĩ, na maũndũ ala meekĩka, makĩa mũno, makyasya, Nĩ w’o ũũ eĩ Mwana wa Ngai.

⁵⁵ Na aka aingĩ maĩ vo makĩsisya me kũasa, ala mamũatĩĩe Yesũ kuma Kalilii, makĩmũtethya:

⁵⁶ na amwe moo maĩ Meli Makatalene, na Meli inyia wa Yakovo na Yose, na inyia wa ana ma Sevetii.

Kũthikwa kwa Yesũ

⁵⁷ Na kwavika wĩoo, kwathi mũndũ mũthwii wa nthĩ ya Alimathia, wetawa Yosevu, nake mwene aĩ mũmanyĩw’a wa Yesũ:

⁵⁸ mũndũ ũsu athi kwa Vilato, amwĩtya mwĩĩ wa Yesũ. Na ĩndĩ Vilato eeaa anengwe.

⁵⁹ Na Yosevu oosa mwĩĩ, na oolingĩla ngũa ntheu ya katane,

⁶⁰ na awia mbũanĩ yake nzaũ, ĩla wasĩte ĩvianĩ ĩnene: na avingilitya ĩvia ĩnene mũomonĩ wa mbũa, na athi.

⁶¹ Na Meli Makatalene aĩ vo, na Meli ũla ũngĩ, mailyĩ nthĩ melekele ĩla mbũa.

⁶² Na ũnĩ ũsu, naw’o nĩ mũthenya waatĩĩe ũla wa Ũseũvyo, athembi anene na Avalisi mamũmbanĩa Vilato,

⁶³ makyasya, Vwana, nĩtũlilikene kana mũkengani ũsu yĩla waĩ thayũ aisye, Ĩtina wa matukũ atatũ ngathayũũka.

⁶⁴ Ĩae ĩndĩ kana mbũa isũvĩwe mũno kũvika mũthenya wa katatũ, amanyĩw’a make maikese kũka mamũye, na kũmatavya andũ, Nũthayũũkĩte kuma kwa akw’ũ: na ũkengani wa ĩtina ũkeethĩwa wĩ mũnene kwĩ ũla wa mbee.

⁶⁵ Vilato amea, Mwĩ na asũvĩi: endai mũkamĩlũlũmĩlye mũno o ũndũ mũtonya.

⁶⁶ Nao mathi, malũlũmĩlya mbũa, makĩkĩa ĩvia ũsiĩlo, ala asũvĩi me vamwe nao.