MATHAYO 24 - Mbivilia

Yesũ akyathana kwanangwa kwa ĩkalũ

¹ Na Yesũ auma ĩkalũnĩ, na e nzĩanĩ aendete; na amanyĩw’a make mooka vala ũĩ nĩ kana mamwon’ye myako ya ĩkalũ.

² Ĩndĩ asũngĩa, amea, Mũtikwona syĩndũ ii syonthe? Nĩ w’o nĩngũmwĩa, Vaa vaikatiwa ĩvia ĩũlũ wa yĩngĩ, yĩla yĩtakaombowa.

Mawoo ala mokĩte

³ Na ekalĩte kĩĩmanĩ kya Mĩthata, amanyĩw’a mooka vala ũĩ nzama, makyasya, Tũtavye, maũndũ asu makethĩwa indĩĩ? Na wonan’yo nĩ wĩva wa kũka kwaku, na wa wĩanĩu wa ĩvinda yĩĩ?

⁴ Na Yesũ asũngĩa, amea, Ĩsũvĩei mũndũ ndakamwasye

⁵ Nũndũ aingĩ makooka na syĩtwa yakwa, makyasya, Ninyie Klĩsto; na makamasya aingĩ.

⁶ Na mũkeew’a ũvoo wa makaũ na mawetango ma makaũ; sisyai mũikaũũye: nũndũ maũndũ asu mati ndĩi ya ũlea kwĩkĩka; ĩndĩ mũminũkĩlyo ndũnamba ũvika.

⁷ Nũndũ mbaĩ ĩkookĩlĩla mbaĩ, na ũsumbĩ ũkookĩlĩla ũsumbĩ; na kũkeethĩwa mayũa na itetemo sya nthĩ kũũ na kũũ.

⁸ Ĩndĩ maũndũ asu onthe nĩ wambĩlĩlyo wa woo.

⁹ Nĩvo makamũnengane thĩnanĩ, na makamũaa; na mũkeethĩwa mũmenetwe nĩ mbaĩ syonthe kwondũ wa syĩtwa yakwa.

¹⁰ Nĩvo aingĩ makalulutĩka, na makenengane ene kwa ene amaithanĩ, na makamenana.

¹¹ Na athani aingĩ ma ũvũngũ makookĩla, na makamasya aingĩ.

¹² Na kwondũ wa ũthũku kwingĩva, wendo wa aingĩ ũkavoa.

¹³ Ĩndĩ ũla ũkomĩĩsya kũvika mũminũkĩlyo, ũsu akatangĩĩwa.

¹⁴ Na ũvoo ũũ mũseo wa ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.

¹⁵ Yĩla ĩndĩ mwĩona ũthatyo ũla wanangaa, ũla wawetiwe nĩ mwathani Ndanieli, ũũngeme vala vandũ vatheu (ũla ũsomaa namanye),

¹⁶ nĩvo ala me Yutia makĩe mathi iĩmanĩ:

¹⁷ na ũla wĩ ĩũlũ wa nyũmba ndakatheee aumye syĩndũ ila syĩ nyũmbanĩ kwake:

¹⁸ na ũla wĩ mũũndanĩ ndakasyoke ose ngũa yake ya ĩũlũ.

¹⁹ Ĩndĩ woo nĩ wa ala aito na ala mekwongya mĩthenya ĩsu!

²⁰ Na voyai kũkĩa kwenyu kũikethĩwe ĩvinda ya mbevo, kana mũthenya wa savato:

²¹ nũndũ ĩvinda yĩu kũkethĩwa thĩna mũnene, ũndũ ũtaaĩthĩwa kuma mwambĩlĩlyo wa nthĩ kũvika yu, o na kũikethĩwa ũngĩ nongi.

²² Na kethĩwa matukũ asu matyaakuvĩvw’a, kũivĩta mwĩĩ o na wĩva: ĩndĩ kwondũ wa ala anyuve matukũ asu makakuvĩvw’a.

²³ Na ĩvinda yĩu ethĩwa mũndũ o na wĩva akakwĩa, Sisya, Klĩsto e vaa, kana, e vaya; mũtiketĩkĩle.

²⁴ Nũndũ makookĩla Maklĩsto ma ũvũngũ, na athani ma ũvũngũ, na makoonan’ya syama nene na moseng’yo; nĩ kana masye, o na anyuve, ethĩwa ũu nũtonyeka.

²⁵ Sisyai, nĩnamũtavya inyw’ĩ mbee.

²⁶ Ethĩwa ĩndĩ makamwĩa, Sisyai, e weũnĩ; mũikaumaale: Sisyai, e nyũmbanĩ sya nthĩnĩ; mũiketĩkĩle.

²⁷ Nũndũ o ũndũ ũtisi ũtisaa wumĩlonĩ wa syũa, nokyoneka kũvika ũthũĩlonĩ; o ta ũu kũkeethĩwa kũka kwa Mwana wa mũndũ.

²⁸ O vala vethĩawa kimba, nĩvo ndei syũmbanĩaa.

Mũminũkĩlyo wa ĩvinda yĩĩ

²⁹ Ĩndĩ ĩtina wa thĩna wa matukũ asu, kavinda o kau, syũa yĩkĩya kĩvindu, na mwei ũilea kumya kyeni kyaw’o, na ndata ikĩvalũka kuma ĩtunĩ, na mavinya na matu makĩthingithangw’a:

³⁰ na ĩndĩ kũkyoneka wonan’yo wa Mwana wa mũndũ ĩtunĩ: na ĩndĩ mbaĩ syonthe sya nthĩ ikameta, na makoona Mwana wa mũndũ okĩte ĩũlũ wa mathweo ma ĩtu na vinya na ũtheu mũnene mũtisu.

³¹ Nake akatũma alaĩka make na wasya mũnene wa soo, nao makoomban’ya ala anyuve make kuma ngalĩ inya sya iseve, kuma itulunĩ sya matu kũvika itulunĩ ila ingĩ syamo.

Vata wa kũsyaĩĩsya

³² Na ĩndĩ ĩmanyĩsyei ngelekan’yo ya mũkũyũ: mbonge syololoa, na syathongoosya wenze, nĩmwĩsĩ kana mũniino nũthengeee;

³³ no ta ũu nenyu, mũkyona maũndũ asu onthe, manyai kana e vakuvĩ, o ta mĩomonĩ.

³⁴ Nĩ w’o nĩngũmwĩa, Ũsyao ũũ ndũkavĩta maũndũ asu onthe mateanĩw’e.

³⁵ Ĩtu na nthĩ nikavĩta, ĩndĩ ndeto syakwa itikavĩta.

³⁶ Ĩndĩ mũthenya ũsu na saa ũsu vai ũmwe wĩsĩ, o na alaĩka ma ĩtunĩ, o na Mwana, ĩndĩ no Asa weka.

³⁷ Ĩndĩ o ũndũ kwailyĩ matukũ ma Noa, now’o kũkethĩwa kũilyĩ Mwana wa mũndũ akyũka.

³⁸ Nũndũ o tondũ matukũnĩ asu ala maĩ mbee wa kĩla kĩw’ũ kingĩ, andũ meethĩiwe makĩya na makĩnyw’a, makĩtwaana na makĩtwawa, kũvika mũthenya ũla Noa walikile ngalawanĩ,

³⁹ na matyeesĩ mũvaka kĩla kĩw’ũ kingĩ kyooka, kyamatwaa onthe; now’o kũkethĩwa kũilyĩ Mwana wa mũndũ akyũka.

⁴⁰ Ĩvinda yĩu aũme elĩ makeethĩwa mũũndanĩ; ũmwe nũkwoswa, na ũla ũngĩ nũkatiwa:

⁴¹ aka elĩ makethĩwa maithianĩa ĩvianĩ yĩmwe; ũmwe nũkoswa, na ũla ũngĩ nũkatiwa.

⁴² Syaĩĩsyai ĩndĩ; nũndũ mũtyĩsĩ mũthenya ũla Mwĩaĩi wenyu wĩũka.

⁴³ Ĩndĩ manyai ũndũ ũũ, kana kethĩwa mwene wa nyũmba nĩwesĩ ĩvinda yĩla kĩng’ei kĩkoka, ethĩwa asyaĩĩsye, o na ndaĩ aeka nyũmba yake ĩtũlwe.

⁴⁴ Kwondũ wa ũu nenyu ĩkalai mwĩyũmbanĩtye; nũndũ saa ũla mũtataĩĩe nĩw’o wĩũka ũla Mwana wa mũndũ.

Ngelekan’yo ya ngombo yĩ kĩthito na ĩte kĩthito

⁴⁵ Nũũ ĩndĩ ngombo yĩ na kĩthito na mbũĩ, ĩla vwana wayo wamĩtwie mũnene ĩũlũ wa nyũmba yake, nĩ kana ĩmanenge ala angĩ lĩu ĩvinda yaw’o?

⁴⁶ Nĩ ngathime ngombo ĩsu, ĩla vwana wayo ooka wĩmĩthĩa ĩkĩka ũu.

⁴⁷ Nĩ w’o nĩngũmwĩa, akamĩtw’a mũnene ĩũlũ wa syonthe ila wĩ nasyo.

⁴⁸ Ĩndĩ ethĩwa ngombo ĩla nthũku ĩkasya ngoonĩ yayo, Vwana wakwa nĩwĩkalĩte;

⁴⁹ na ĩkyambĩlĩlya kũmakũna athũkũmi ala angĩ, na kũya na kũnyw’a vamwe na athengi;

⁵⁰ vwana wa ngombo ĩsu akooka mũthenya ũla ĩtatalĩthye, na saa ũla ĩtawĩsĩ,

⁵¹ na akamĩvũa mũno, na kũmĩnenga kĩanda kyayo vamwe na angangan’ya: vo vakethĩwa kĩĩo na kũvevetan’ya maeo.