MATHAYO 18 - Mbivilia

Ũmanyĩsyo wa wĩnyivyo

¹ Saa ũsu amanyĩw’a mooka vala ve Yesũ, makyasya, Nũũ ĩndĩ ũla mũnene ũsumbĩnĩ wa ĩtu?

² Na eeta kana kanini, akaũngamya katĩ woo,

³ na asya, Nĩ w’o nĩngũmwĩa, Mwalea kũalyũka mwĩthĩwe ta syana nini, mũikalika nongi ũsumbĩnĩ wa ĩtu.

⁴ O ũla ĩndĩ ũkenyivya ta kana kaa kanini, ũsu nĩ mũnene ũsumbĩnĩ wa ĩtu.

⁵ Na o ũla ũkosa kana kamwe kanini kailyĩ kaa syĩtwanĩ yakwa embosa nyie:

⁶ ĩndĩ ũla ũkalulutĩkya kamwe ka tũũ tũnini tũla tũmbĩtĩkĩlaa, nĩwaĩle kwoveewa ngingo ĩvia ĩnene ya ũthia, na akĩkw’a kyũngũnĩ kya ũkanga.

Kũsũvĩa kũlulutĩkya angĩ

⁷ Woo nĩ wa nthĩ kwondũ wa molulutĩkyo! Nũndũ molulutĩkyo maitĩa kũka; ĩndĩ woo nĩ wa mũndũ ũla ũtumaa ũlulutĩkyo wũka!

⁸ Na ethĩwa kw’oko kwaku kana kũũ kwaku nĩkũũkũlulutĩkya, kũtile, wĩkye kũasa naku: nĩ ũseo kwaku ũlike thayũnĩ na kĩthu kya kw’oko kana kya kũũ, kwĩ ũkĩkw’a wĩ na moko elĩ kana maũũ elĩ mwakinĩ wa tene na tene.

⁹ Na ethĩwa itho yaku nĩyĩũkũlulutĩkya, yumye, wĩkye kũasa naku: nĩ ũseo kwaku ũlike thayũnĩ wĩ nthongo, kwĩ ũkĩkw’a wĩ na metho elĩ nthĩnĩ wa Ngiena ya mwaki.

¹⁰ Sisyai mũikavũthye kamwe ka tũũ tũnini: nũndũ nĩngũmwĩa, kana alaĩka matw’o ĩtunĩ mavinda onthe monaa ũthyũ wa Asa wakwa ũla wĩ ĩtunĩ.

¹¹ Nũndũ Mwana wa mũndũ nĩwokie kũtangĩĩa kĩla kyaĩte.

Ngelekan’yo ya ĩlondu yau

¹² Mwĩona ata? Ethĩwa mũndũ o na wĩva e na malondu ĩana, na yĩmwe yamo yĩkyaa, ndeũtia ala mĩongo kenda na kenda, na akĩthi iĩmanĩ kũmantha yĩla yau?

¹³ Na ethĩwa nũnũũyona, nĩ w’o nĩngũmwĩa, nũnũũyĩtanĩa yĩu mbee wa ala mĩongo kenda na kenda mate mau.

¹⁴ No ta ũu ti kwenda kwa Ĩthe wenyu ũla wĩ ĩtunĩ, kamwe ka tũũ tũnini kae.

Ũndũ twaĩle kwĩka na avĩtan’ya

¹⁵ Na mwana‐a‐au akwĩka naĩ, thi, ũmwon’ye ĩvĩtyo yake wĩ nake mwĩ inyw’oka: akwĩw’a, nĩwamwona mwana‐a‐au.

¹⁶ Ĩndĩ alea ũkwĩw’a, osa ũngĩ ũmwe kana elĩ vamwe naku, nĩ kana kwa makanyw’a ma ngũsĩ ilĩ kana itatũ kĩla ndeto ĩlũme.

¹⁷ Na alea ũmew’a mo, yĩtavye ĩkanisa: na alea kwĩw’a ĩkanisa nayo, kwaku nĩethĩwe ta Mũndũ‐wambaĩ‐ingĩ na ta mumya wa koti.

¹⁸ Nĩ w’o nĩngũmwĩa, Maũndũ o na meva ala mũkova kũũ nthĩ makethĩwa me move ĩtunĩ; na maũndũ o na meva ala mũkathasya kũũ nthĩ makethĩwa me mathasye ĩtunĩ.

Ngwatanĩo mboyanĩ

¹⁹ Ĩngĩ nĩngũmwĩa, ethĩwa elĩ ma inyw’ĩ makeew’ana kũũ nthĩ ũndũnĩ o na wĩva ũla makavoya, makeekwa ũndũ ũsu nĩ Asa wakwa ũla wĩ ĩtunĩ.

²⁰ Nĩkwĩthĩwa vala ve elĩ kana atatũ mombene syĩtwanĩ yakwa, nyie nĩ vo katĩ woo.

Vata wa ũekeo na ngelekan’yo ya ngombo ĩte tei

²¹ Na ĩndĩ Vetelo athi, amwĩa, Mwĩaĩi, nĩ mavinda meana ata mwana‐a‐asa aimbĩka naĩ nĩmũekee? Kũvika ya mũonza?

²² Yesũ amwĩa, Ndiũkũtavya kũvika ya mũonza; ĩndĩ kũvika mũonza kũndũ mĩongo mũonza.

²³ Kwondũ wa ũu ũsumbĩ wa ĩtu ũilyĩ ta mũsumbĩ ũmwe, ũla wendie ũtalo kwa ngombo syake.

²⁴ Na ambĩlĩlya ũtala, aetewe ĩmwe ĩla yaĩ na thiĩ nake wa mbesa sya talendi ngili ĩkũmi.

²⁵ Ĩndĩ nĩkwĩthĩwa ĩtyaĩ na kĩndũ kya ũĩva, vwana wayo eeaa ĩtewe, yo na kĩveti kyayo, na syana, na syonthe ila yaĩ nasyo, kũĩva ũla thiĩ.

²⁶ Na ĩndĩ ĩla ngombo yavalũka nthĩ na yamũthaitha, ĩkyasya, Vwana, nandũa kavola, nakwa ngakũĩva syonthe.

²⁷ Na vwana wa ngombo ĩsu amĩw’ĩa tei, na amĩthasya, na amĩekea ũla thiĩ.

²⁸ Ĩndĩ ngombo ĩsu yaumaala, yoona ũmwe wa athũkũmi ala angĩ, ũla waĩ na thiĩ nayo wa silingi ĩana yĩmwe: amũkwata, na amũkwata mĩmeo, ĩkyasya, Ndĩva kĩla ngũũandũa.

²⁹ Na ĩndĩ mũthũkũmi ũsu avalũka nthĩ na amwĩsũva, akyasya, Nandũa kavola, nakwa ngakũĩva.

³⁰ Nayo ndĩaaĩtĩkĩla: ĩndĩ yathi yamwĩkĩa kolokolonĩ, mũvaka yĩla ũkaĩva ũla thiĩ.

³¹ Na ĩndĩ athũkũmi ala angĩ moona ũndũ weekwa, meew’a woo mũno, na mathi mamũtavya vwana woo w’onthe ũndũ kweekwa.

³² Na ĩndĩ vwana wayo amĩta kwake, na amĩtavya, We ngombo nthũku, ngũekeie thiĩ ũsu w’onthe, nũndũ nũmbĩsũvie:

³³ naku ndwaĩlwe nĩ kũmwĩw’ĩa tei mũthũkũmi ũngĩ, tondũ nyie ngwĩw’ĩie tei?

³⁴ Na vwana wayo athata, na amĩnengane kwa athĩn’ya, mũvaka yĩla ĩkaĩva thiĩ ũsu w’onthe.

³⁵ Asa wakwa wa ĩtunĩ akamwĩka inyw’ĩ o ta ũu, mwalea kũekanĩa kĩla mũndũ na mwana‐a‐ĩthe kuma ngoonĩ syenyu.