MATHAYO 17 - Mbivilia

Kũalyũka kwa mũvw’ano wake

¹ Na ĩtina wa matukũ thanthatũ Yesũ oosa Vetelo, na Yakovo, na Yoana mwana‐a‐inyia, ambata nao me oka kĩĩmanĩ kĩtũlu:

² na mũvw’ano wake waalyũka mene; na ũthyũ wake watisa ta syũa, na ngũa syake syeeũva ta kyeni.

³ Na sisya, Mose na Eliya mamaumĩlĩla makĩneenan’ya nake.

⁴ Na Vetelo asũngĩa na amwĩa Yesũ, Mwĩaĩi, nĩ ũseo kwitũ kwĩthĩwa vaa: ethĩwa nũkwenda, nĩngwaka vaa malwanda atatũ; yĩmwe yaku, na yĩngĩ ya Mose, na yĩngĩ ya Eliya.

⁵ Akĩneena, sisya, ĩthweo ĩtisũku yamekĩa muunyĩ: na sisya, wasya wauma ĩthweonĩ, ũkyasya, Ũũ nĩwe Mwana wakwa mwendwa, ũla nendeew’e nĩwe; mwĩw’ei we.

⁶ Na amanyĩw’a mawĩw’a, mavalũka na mothyũ moo, na makĩa mũno.

⁷ Na Yesũ ooka amakiita, na asya, Ũkĩlai, mũikakĩe.

⁸ Na makyũkĩlya metho moo, maiaaona mũndũ ate o Yesũ weka.

⁹ Na makĩtheea kuma kĩĩmanĩ, Yesũ ameaĩa, akyasya, Mũikatavye mũndũ ũvoo wa woni ũsu, mũvaka Mwana wa mũndũ athayũũka kuma kwa akw’ũ.

¹⁰ Na amanyĩw’a make mamũkũlya, makyasya, Nĩkĩ ĩndĩ aandĩki mekwasya mũvaka Eliya ambe kũka?

¹¹ Nake asũngĩa, amea, Nĩ w’o Eliya nĩwũkĩte, na kũtũnga maũndũ onthe kwĩthĩwa meũ:

¹² ĩndĩ nĩngũmwĩa, kana Eliya nĩwokie, na maiaamũmanya, ĩndĩ mamwĩkie o ũndũ mendie. No ta ũu Mwana wa mũndũ nake akathĩnw’a nĩo.

¹³ Nĩvo ala amanyĩw’a mamanyie kana aneena nao ũndũ wa Yoana Mũvatisi.

Kũvow’a kwa mwana waĩ na ndaimoni

¹⁴ Na mavika vala ve yĩla ĩkomano, mũndũ ooka amũtulĩlya ndu, akyasya,

¹⁵ Mwĩaĩi, mwĩw’ĩe mwana wakwa tei: nũndũ e na ũwau wa mũng’uthũko, nake enyamaw’a mũno; nũndũ mavinda maingĩ avalũkaa mwakinĩ, na mavinda maingĩ manzĩnĩ.

¹⁶ Nakwa namũete kwa amanyĩw’a maku, na mainatonya kũmũvosya.

¹⁷ Na Yesũ asũngĩa, asya, Ũsyao ũũ ũte na mũĩkĩĩo na mũemu, ngeethĩwa vamwe nenyu ĩvinda yĩana ata? Nĩmũmĩĩsya ĩvinda yĩana ata? Mũetei vaa nĩĩ.

¹⁸ Na Yesũ amĩkan’ya; na ĩla ndaimoni yauma: na kĩmwana kyavoa kuma ĩvinda yĩu.

¹⁹ Nĩvo ĩndĩ ala amanyĩw’a maendie vala ve Yesũ kasama, masya, Nĩkĩ ithyĩ tũinatonya kũmyumya?

²⁰ Na amea, Nũndũ wa kũnyivĩwa nĩ mũĩkĩĩo: nũndũ nĩ w’o nĩngũmwĩa, Ethĩwa mwĩ na mũĩkĩĩo: wĩana kaveke ka kalatali, mũkatavya kĩĩma kĩĩ, Uma vau ũĩ ũthi vaya; nakyo kĩkathi; o na vai ũndũ ũtakatonyeka kwenyu.

²¹ Ĩndĩ mũthemba ũũ ndumaa ate ũndũ wa kũvoya na kũtĩĩa ũya.

Yesũ akyathana kĩkw’ũ kyake ya kelĩ

²² Na yĩla mekalĩte Kalilii, Yesũ amea, Mwana wa mũndũ ethi kũnenganwe mokonĩ ma andũ;

²³ nao makamũaa, na mũthenya wa katatũ akathayũũkw’a. Nao meew’a woo mũno.

Akyumya koti wa ĩkalũ

²⁴ Na mavika Kavelinaumi, ala maumasya koti wa nyunzu sekeli mathi kwa Vetelo, masya, Mũmanyĩsya wenyu ndaumasya ĩla nyunzu ya sekeli?

²⁵ Asya, Ĩĩ. Na alika nyũmba, Yesũ amba ũmũkũlya, akyasya, Wĩona ata, Simoni? Asumbĩ ma nthĩ maumasya koti kana ũelo kwa aaũ? Kwa ana moo, kana kwa aenĩ?

²⁶ Na asya, Kwa aeni. Yesũ amwĩa, Na ĩndĩ ana moo nĩ athasye.

²⁷ Ĩndĩ, nĩ kana tuĩkese ũmalulutĩkya, enda ũkanganĩ, noyĩkya ndoano, na ĩkũyũ yĩla yĩamba ũkwatw’a yose; na wayathamũkan’ya kanyw’a, ũkoona sekeli: wose ũkamanenge kwondũ wakwa na kwondũ waku.