MATHAYO 16 - Mbivilia

Yesũ ailea kwonan’ya kyama

¹ Na Avalisi na Asatukai mooka mamũvoya amon’ye kyama kyume ĩtunĩ, makĩmũtata.

² Ĩndĩ asũngĩa na amea, Kũituka, inyw’ĩ mwĩasya, Kũkeethĩwa kwĩ kũseo: nũndũ ĩtu nĩ ĩtune.

³ Na kwĩ kĩoko mwĩasya, Kũkeethĩwa kwĩ kũthũku ũmũnthĩ: nĩkwĩthĩwa ĩtu nĩ ĩtune na nĩ ĩniinũkanu. Inyw’ĩ nĩmwĩsĩ kũmanya ũthyũ wa ĩtu; ĩndĩ syama sya mavinda aa mũitonya kwimanya.

⁴ Ũsyao mũthũku na wa ũlaalai wĩmantha kyama; ĩndĩ ndũkanengwa kyama, ate o kĩla kyama kya Yona. Na amatia, athi.

Aikan’ya kũlea kwona kwa amanyĩw’a

⁵ Na amanyĩw’a mathi mũingo ũla ũngĩ, na moolwa nĩ ũkua imũtũ.

⁶ Na Yesũ amea, Ĩmanyĩlĩlei na ĩsũvĩei yĩla ĩlawa ya Avalisi na Asatukai.

⁷ Na masũanĩa ene kwa ene, makyasya, Nĩkwĩthĩwa tũinakua imũtũ.

⁸ Na Yesũ amanya ũu asya, Ĩnyw’ĩ ma mũĩkĩĩo mũnini, nĩkĩ mũũsũanĩa inyw’ĩ kwa inyw’ĩ, nĩkwĩthĩwa mũi na imũtũ?

⁹ Mũinamba kũmanya, o na mũiũlilikana ila imũtũ itano sya ala ngili itano, na ũndũ ikavũ syeanaa ila mwoosie?

¹⁰ O na ila imũtũ mũonza sya ala ngili inya, na ũndũ ikavũ syeanaa ila mwoosie?

¹¹ Kũilyĩ ata ĩndĩ, ũndũ mũteũmanya kana ndinaneena nenyu ũndũ wa imũtũ? Ĩndĩ ĩsũvĩei ĩlawa ya Avalisi na Asatukai.

¹² Na ĩndĩ mamanya kana ndanamatavya mesũvĩe ĩlawa ya imũtũ, ĩndĩ nĩ ĩlawa ya ũmanyĩsyo wa Avalisi na Asatukai.

Vetelo aikũsĩĩa atĩ Yesũ nĩwe Klĩsto

¹³ Na Yesũ alika kĩvalonĩ kya Kaisalea ya Vilivu, amakũlya amanyĩw’a make, akyasya, Andũ measya Mwana wa mũndũ nũũ?

¹⁴ Na masya, Amwe measya nĩ Mũvatisi Yoana; angĩ, nĩ Eliya; na angĩ, nĩ Yelemia, kana ũmwe wa athani.

¹⁵ Amea, Ĩndĩ inyw’ĩ mwĩasya nyie nĩ ũũ?

¹⁶ Na Simoni Vetelo asũngĩa na asya, We nue Klĩsto, Mwana wa Ngai ũla wĩ thayũ.

¹⁷ Na Yesũ asũngĩa na amwĩa, Wĩ mũathime we, Simoni mwana wa Yona: nĩkwĩthĩwa mwĩĩ na nthakame itikwonetye ũu, ĩndĩ nĩ Asa wakwa ũla wĩ ĩtunĩ.

¹⁸ Nakwa nĩngũkwĩa, kana nue Vetelo, na ĩvianĩ yĩĩ ngaaka ĩkanisa yakwa; na mbingĩlo sya vala maveva ma akw’ũ mekaala itikayĩkĩlya vinya.

¹⁹ Nakwa ngakũnenga we mbungũo sya ũsumbĩ wa ĩtu: na ũndũ o na wĩva ũla ũkova kũũ nthĩ, ũkethĩwa wĩ wove ĩtunĩ; na ũndũ o na wĩva ũla ũkathasya kũũ nthi, ũkethĩwa wĩ ũthasye ĩtunĩ.

²⁰ Nĩvo wameaĩe amanyĩw’a make maikatavye mũndũ kana we nĩwe Klĩsto.

Yesũ akyathana kũkw’a na kũthayũũka kwake

²¹ Kuma ĩvinda yĩu Yesũ ambĩlĩlya kũmon’ya amanyĩw’a make, kana ndatĩa ũthi Yelusaleme, na kũthĩnw’a na mathĩna maingĩ nĩ atumĩa na athembi anene na aandĩki, na kũawa, na kũthayũũkw’a mũthenya wa katatũ.

²² Na Vetelo amwosa, na ambĩlĩlya kũmũkan’ya, akyasya, Ũu nĩwĩthĩwe kũasa naku, Mwĩaĩi; ũu ndũkethĩwa kwaku o na ĩndĩĩ.

²³ Ĩndĩ eethyũũa, na amwĩa Vetelo, Enda ĩtina wakwa, Satani: we wĩ ũlulutĩkyo kwakwa: nũndũ ndũũlilikana maũndũ ma Ngai, ĩndĩ nĩ ala ma andũ.

Wĩtano wa kwĩlea mwene

²⁴ Nĩvo Yesũ wameie amanyĩw’a make, Ethĩwa mũndũ o na wĩva nũnũkwenda kũmbikĩla, nĩelee mwene, na kwĩyaĩkya ngelan’yo yake, na akĩmbikĩla.

²⁵ Nũndũ o ũla ũnũkwenda kũvĩtya thayũ wake akawasya: na o ũla ũkawasya thayũ wake kwondũ wakwa akawona ĩngĩ.

²⁶ Nũndũ mũndũ aunwa nĩ kyaũ, o na akosa nthĩ nima, na akyasya thayũ wake? Kana mũndũ akakũan’ya thayũ wake na kyaũ?

²⁷ Nũndũ Mwana wa mũndũ akooka ũtheunĩ mũtisu wa Ĩthe wake vamwe na alaĩka make; na ĩvinda yĩu akamũĩva kĩla mũndũ kwĩanana na kwĩka kwake.

²⁸ Nĩ w’o nĩngũmwĩa, Ve andũ amwe ma aa maũngeme vaa, ala matakasama kĩkw’ũ nongi, matanamba kwona Mwana wa mũndũ akyũka ũsumbĩnĩ wake.