MATHAYO 14 - Mbivilia

Kĩkw’ũ kya Yoana Mũvatisi

¹ Ĩvĩnda yĩu mũsumbĩ Elote eew’a ũvoo wa Yesũ,

² na amea athũkũmi make, Ũsu nĩwe Yoana ũla Mũvatisi; nũthayũũkĩte kuma akw’ũnĩ; na kwondũ wa ũu mavinya aa metethya wĩa nthĩnĩ wake.

³ Nũndũ Elote aĩ anamũkwata Yoana, akamwova, na akamwĩkĩa kolokolonĩ kwondũ wa Elotia, mũka wa Vilivu mwana‐a‐inyia.

⁴ Nĩkwĩthĩwa Yoana amũtavisye, Kũtyosana na mĩao we kwĩthĩwa nake.

⁵ Na akyenda kũmũaa, akĩa nguthu ya andũ, nũndũ mamwonaa e mwathani

⁶ Ĩndĩ yĩla mũthenya wa kũsyawa kwa Elote wavikie, mwĩĩtu wa Elotia asũngĩa katĩ woo, na amwendeesya Elote.

⁷ Na ĩndĩ amwatha na wĩvĩto kũmũnenga kĩla wĩmwĩtya o na kĩva.

⁸ Nake, asilw’a nĩ nyinyia, asya, Nenga mũtwe wa Mũvatisi Yoana vaa ĩsaaninĩ.

⁹ Na ũla mũsumbĩ eew’a woo; ĩndĩ kwondũ wa mawĩvĩto make, na kwondũ wa ala mailyĩ lĩunĩ vamwe nake, eeaa anengwe;

¹⁰ na atũma mũndũ amũtila Yoana mũtwe e kolokolonĩ.

¹¹ Na mũtwe wake waetwe wĩ ĩsaaninĩ, wanengwa ũla mwĩĩtu: nake amũtwaĩa nyinyia.

¹² Na amanyĩw’a make mooka, moosa kimba, makĩthika; na mathi mamũtavya Yesũ.

Kũvũnĩthw’a kwa andũ ngili itano

¹³ Na Yesũ eew’a ũvoo ũsu, auma vau na ngalawa, athi e weka vandũ vate andũ: na makomano meew’a, mamũatĩĩa na nyaĩĩ kuma ndũanĩ syoo.

¹⁴ Na aumĩla, na oona ĩkomano ĩnene ya andũ, na amew’ĩa tei, na avosya awau moo.

¹⁵ Na kwavika wĩoo, amanyĩw’a mathi vala ũĩ, makyasya, Vaa tũĩ nĩ weũnĩ, na ĩngĩ o na yu ĩvinda nĩ ĩthelu; ĩmbũũkya, makomano mathi mĩsyĩ, makethooee lĩu.

¹⁶ Ĩndĩ Yesũ amea, Mati na vata wa kuma kũũ mathi; manengei lĩu e inyw’ĩ.

¹⁷ Nao mamwĩa, Vaa tũi na kĩndũ ate o imũtũ itano na makũyũ elĩ.

¹⁸ Na amea, Ndeteei isu vaa.

¹⁹ Na ameaĩa makomano mekale nthĩ nyekinĩ; na oosa ila imũtũ itano na ala makũyũ elĩ, na ang’elela ĩtunĩ, aiathima, na aĩtilanga, na anenga amanyĩw’a make ila imũtũ, na amanyĩw’a manenga makomano.

²⁰ Na onthe maya, mavũna: na moosa ũtialo wa ilungu isu ndile, ikavũ ĩkũmi na ilĩ syausũa.

²¹ Na ala maĩe maĩ andũ ta ngili itano, eka aka na syana.

Yesũ akinyĩle ũkanganĩ ĩũlũ

²² Na oyu amathing’ĩĩsya amanyĩw’a make malike ngalawanĩ, mathi mbee wake kũvika mũingo ũngĩ, mũvaka we amombũũkya makomano.

²³ Na amombũũkya makomano, ambata kĩĩmanĩ e weka kũvoya: na kwavika wĩoo, e o vo e weka.

²⁴ Ĩvĩnda yĩu ĩla ngalawa yaĩ ũkanganĩ katĩ, ĩkyũkĩlangw’a nĩ itulumo; nũndũ kĩseve nĩkyamathaũĩtye.

²⁵ Na ũsyaĩĩsyo wa kana wa ũtukũ athi vala maĩ akinyĩle ũkanganĩ ĩũlũ.

²⁶ Na amanyĩw’a mamwona akinyĩle ũkanganĩ ĩũlũ, maũũya, makyasya, Nĩ ĩimũ; na makaya nĩ w’ĩa.

²⁷ Ĩndĩ oyu Yesũ aneena nao, akyasya, Ĩthĩwai na ũnyiau; ninyie; mũikakĩe.

²⁸ Na Vetelo amũsũngĩa, asya, Mwĩaĩi, ethĩwa nue, mbĩa nũke vala ũĩ, nginyĩle manzĩnĩ ĩũlũ.

²⁹ Na amwĩa, Ũka. Na Vetelo auma ngalawanĩ, na akinyĩla manzĩnĩ ĩũlũ, nĩ kana aende vala ve Yesũ.

³⁰ Ĩndĩ oona kĩseve kingĩ, aya w’ĩa; na akyambĩlĩlya ũlika manzĩnĩ, akaya, akyasya, Mwĩaĩi, ndangĩĩa.

³¹ Na kavinda kau Yesũ atambũũkya kw’oko kwake, amũkwata, na amwĩa, We wa mũĩkĩĩo mũnini, nũndũ wa kĩ waya nzika?

³² Na mambata ngalawanĩ, kĩseve kyakilya.

³³ Na ala maĩ ngalawanĩ mamũthaitha, makyasya, Nĩ w’o, we wĩ Mwana wa Ngai.

Awau maivow’a Kenesaleti

³⁴ Na mainga, mavika nthĩ ya Kenesaleti.

³⁵ Na aũme ma vandũ vau mamũmanya, matũma andũ nthĩ ĩsu yonthe, mamũetee onthe ala maĩ awau;

³⁶ mamwĩsũva makiite o na ethĩwa no ũtiivo wa ngũa yake: na onthe ala makiitie mavow’a vyũ.