MATHAYO 13 - Mbivilia

Ngelekan’yo ya mũvuĩi

¹ Mũthenya ũsu Yesũ auma nyũmbanĩ, athi, ekala nthĩ ũtee wa ũkanga.

² Na makomano manene mamũmbanĩa, kwa ũu avota ngalawanĩ, ekala vo; na yĩla ĩkomano yonthe yaũngama ũtee wa ũkanga.

³ Nake aneena nao maũndũ maingĩ na ngelekan’yo, akyasya, Sisyai, mũvuĩi nĩwaendie kũvuĩa;

⁴ na akĩvuĩa, mbeke imwe syavalũka ũtee wa nzĩa, na nyũnyi syooka syaiya;

⁵ na ĩngĩ syavalũka mavianĩ, vala ve mũthanga mũnini: na syamea na mĩtũkĩ, nĩkwĩthĩwa ityaĩ na mũthanga mũliku:

⁶ na syũa yaaa, syavova; na nĩkwĩthĩwa ityaĩ na mĩi, syooma.

⁷ Na ingi syavalũka mĩw’anĩ; na mĩw’a yeana na yainyita;

⁸ na ingĩ syavalũka mũthanganĩ mũseo, na syasyaa ũsyao, imwe ĩana, na imwe mĩongo, thanthatũ, na imwe mĩongo ĩtatũ.

⁹ Ũla wĩ matũ, nĩew’e.

Wĩa wa ngelakany’yo

¹⁰ Na amanyĩw’a mooka, mamwĩa, Nĩkĩ ũũneena nao na ngelekan’yo?

¹¹ Nake asũngĩa, amea, Inyw’ĩ mũnengetwe kũmanya nzama sya ũsumbĩ wa ĩtu, ĩndĩ mo maiaanengwa.

¹² Nũndũ o ũla wĩ na kĩndũ, akanengwa, nake akaingĩvĩwa: ĩndĩ ũla ũte na kĩndũ, akoosewa o na kĩla wĩ nakyo.

¹³ Kwondũ wa ũu nĩneenaa nao na ngelekan’yo; nĩkwĩthĩwa makĩsisya matikwona, na makĩw’a matikwĩw’a, o na maiũmanya.

¹⁴ Na wathani wa Isaia nĩweanĩiw’e kwoo, ũla waĩtye, Kwĩw’a mũkeew’a, o na mũikamanya nongi; Na kũsisya mũkasisya, o na mũikona nongi:

¹⁵ Nũndũ ngoo sya andũ aa nĩ nenevu, Na matũ moo mew’aa na vinya, Na metho moo nĩmalalĩtye; Maikese kwona na metho moo, Na kwĩw’a na matũ moo, Na kũmanya na ngoo syoo, Na kwĩalyũla, Na ngĩmavosya.

¹⁶ Ĩndĩ nĩ maathime metho menyu, nĩkwĩthĩwa nĩmekwona; na matũ menyu, nĩkwĩthĩwa nĩmekwĩw’a.

¹⁷ Nũndũ nĩ w’o nĩngũmwĩa, kana nĩ athani aingĩ na andũ alũngalu ala mendie kwona maũndũ ala mũkwona, na maiaamona; na kwĩw’a maũndũ ala mũkwĩw’a, na maiaamew’a.

Ũelesyo wa ngelekan’yo ya mũvuĩi

¹⁸ Ĩthukĩĩsyei inyw’ĩ ĩndĩ ĩla ngelekan’yo ya mũvuĩi.

¹⁹ Mũndũ o na wĩva eew’a ndeto ya ũsumbĩ, na ndeũmĩmanya, nĩvo ĩndĩ wĩũka ũla mũthũku, akavulya kĩla kĩvuĩĩtwe ngoonĩ yake. Ũsu nĩwe ũla ũvuĩĩtwe ũtee wa nzĩa.

²⁰ Na ũsu ũvuĩĩtwe mavianĩ, nĩwe ũla wĩw’aa ndeto, na aiosa oyu na ũtanu;

²¹ ĩndĩ nde na mĩi nthĩnĩ wake, ĩndĩ ekalanga ĩvinda ĩnini; na yĩla thĩna kana ũnyamao wookĩla kwondũ wa ĩla ndeto, oyu ailulutĩka.

²² Na ũla ũvuĩĩtwe miw’anĩ, ũsu nĩwe ũla wĩw’aa ĩla ndeto; na kwĩmakĩa kwa nthĩ, na ũkengani wa ũthwii, ũinyita ĩla ndeto, nake ailea ũsyaa.

²³ Na ũla ũvuĩĩtwe mũthanganĩ mũseo, ũsu nĩwe ũla wĩw’aa ĩla ndeto, na aimĩmanya; ũsu nĩwe ũsyaa ũsyao, ũmwe aisyaa ĩana, na ũngĩ mĩongo thanthatũ, na ũngĩ mĩongo ĩtatũ.

Ngelekan’yo ya ĩthaaa

²⁴ Amatavya ngelekan’yo ĩngĩ, akyasya, Ũsumbi wa ĩtu ũilyĩ ta mũndũ ũla wavuĩie mbeũ nzeo mũũndanĩ wake:

²⁵ ĩndĩ andũ makomete, mũmaitha wake ooka na avuĩĩa ĩthaaa nganũnĩ na athi.

²⁶ Ĩndĩ syamea na syamesya mathangũ na syasyaa iia, nĩvo ĩndĩ ĩthaaa yoonekie nayo.

²⁷ Na ngombo sya mwene nyũmba syathi na syamwĩa, Vwana, ndwaavuĩa mbeũ nzeo mũũndanĩ waku? Ĩthaaa ĩndĩ yumĩte va?

²⁸ Na asyĩa, Nĩ mũmaitha wekie ũu. Na ngombo syamwĩa, Nũkwenda tũthi tũkũe?

²⁹ Ĩndĩ asya, Aiee; mũikese ũkũanĩsya nganũ mũikũa ĩthaaa.

³⁰ Iekei syelĩ syĩane kũvika ngethanĩ: na ĩvinda ya ngetha ngatavya akethi, Mbee ũmban’yai ĩthaaa, mwove mĩio nĩ kana mũvĩvye; ĩndĩ nganũ ũmbanĩsyai ikũmbĩnĩ yakwa.

Ngelekan’yo sya mbeke ya kalatali na ĩlawa

³¹ Amatavya ngelekan’yo ĩngĩ, akyasya, Ũsumbĩ wa ĩtu ũtilyĩ ta mbeke ya kalatali, ĩla mũndũ wosie na aivanda mũũndanĩ wake:

³² nayo nĩ nini kwĩ mbeũ syonthe; ĩndĩ yeana, yĩthĩawa yĩ nene mbee wa nyũnyi syonthe, na ĩkĩtw’ĩka kĩtĩ, ũndũ nyũnyi sya yayaya syũkaa na kwĩkala mbongenĩ syakyo.

³³ Amatavya ngelekan’yo ĩngĩ; Ũsumbĩ wa ĩtu ũilyĩ ta ĩlawa, yĩla mũndũ mũka wosie, na avitha mĩtanĩ ĩtatũ ya mũtu, na w’onthe wakaata.

³⁴ Maũndũ asu onthe Yesu amatavisye makomano na ngelekan’yo; na vate ngelekan’yo ndaaneena nao:

³⁵ nĩ kana kwĩanĩw’e ũla waneeniwe nĩ mwathani, akyasya, Ngaathamya kanyw’a wakwa na ngelekan’yo; Ngaweta maũndũ ala mavithiwe kuma nthĩ yoombwa.

Ũelesyo wa ngelekan’yo ya ĩthaaa

³⁶ Na ĩndĩ atia makomano, athi nyũmba: na amanyĩw’a make mathi vala ũĩ, makyasya, Twon’ye ithyĩ ĩla ngelekan’yo ya ĩthaaa ya mũũndanĩ.

³⁷ Na asũngĩa, asya, Ũsu ũvuĩaa mbeũ ĩla nzeo nĩ Mwana wa mũndũ;

³⁸ na ũla mũũnda nĩ nthĩ; na mbeũ ĩla nzeo nĩ ana ma ũsumbĩ; na ĩthaaa nĩyo ana ma ũla mũthũku;

³⁹ na mũmaitha ũla waivuĩie nĩ ndevili: na ngetha nĩ wĩanĩu wa ĩvinda yĩĩ; na akethi nĩ alaĩka.

⁴⁰ Na ĩndĩ o ũndũ ĩthaaa yũmbanaw’a na kũvĩvw’a na mwaki; nĩw’o kũkethĩwa wĩanĩu wa ĩvinda yĩĩ.

⁴¹ Mwana wa mũndũ akatũma alaĩka make, nao makoomban’ya molulutĩkyo onthe maumw’e ũsumbĩnĩ wake, na ala mekaa mothũku,

⁴² na makamekya ikonĩ ĩnene yĩ mwaki: vo vakethĩwa kĩĩo na kũvevetan’ya maeo.

⁴³ Nĩvo ĩndĩ ala alũngalu makatisa ta syũa ũsumbĩnĩ wa Ĩthe woo. Ũla wĩ matũ, nĩew’e.

Ngelekan’yo sya ũthwii mũvithe na lũlũ na kĩtei

⁴⁴ Ũsumbĩ wa ĩtu ũilyĩ ta ũthwii mwie ũvithĩtwe mũũndanĩ; ũla mũndũ wonie, na oovithĩĩa; na kwondũ wa ũtanu wake athi na athoosya syĩndũ syonthe ila waĩ nasyo, na athooa mũũnda ũsu.

⁴⁵ Ĩngĩ, ũsumbĩ wa ĩtu ũilyĩ ta mũndũ mũtandĩthya, aimantha malũlũ maseo:

⁴⁶ na oona lũlũ ũmwe wa thooa mũnene, athi athoosya syĩndũ syonthe ila waĩ nasyo, oothooa.

⁴⁷ Ĩngĩ, ũsumbĩ wa ĩtu ũilyĩ ta kĩtei, kĩla kyekiw’e ũkanganĩ, na kyoomban’ya kĩla mũthemba:

⁴⁸ nakyo kyausũa, makĩkusya ũtee wa ũkanga; na mekala nthĩ, manyuvĩĩa ĩla mĩseo mĩionĩ, ĩndĩ ĩla mĩthũku mekya ũtee.

⁴⁹ Kũkeethĩwa ta ũu wĩanĩunĩ wa ĩvinda yĩĩ: alaĩka makooka, na makavathan’ya athũku na ala alũngalu,

⁵⁰ na makamekya ikonĩ ĩnene yĩ mwaki: vo vakethĩwa kĩĩo na kũvevetan’ya maeo.

⁵¹ Nĩmwamanya maũndũ asu onthe? Mamwĩa, Ĩĩ.

⁵² Nake amea, Kwondũ wa ũu kĩla mũandĩki watw’ĩkĩthĩtw’e mũmanyĩw’a wa ũsumbĩ wa ĩtu ailyĩ ta mũndũ mwene wa nyũmba, ũla wumasya kyũmbanĩsyonĩ kyake syĩndũ nzaũ na ila ngũũ.

Yesũ ailewa Nasaleti

⁵³ Na kweethĩwa, Yesũ amina ngelekan’yo isu, auma vo athi.

⁵⁴ Na avika nthĩ ĩla yake amamanyĩsya ĩsinakokenĩ yoo, mũvaka maseng’a, na masya, Mũndũ ũũ aumĩtye va ũĩ ũũ, na mavinya aa?

⁵⁵ Ũũ ti mwana wa mũseũvya wa mbwaũ? Inyia wake ndetawa Meli? Na ana‐a‐inyia ti Yakovo, na Yosevu, na Simoni, na Yutasi?

⁵⁶ Na eĩtu‐a‐inyia, mati kwitũ onthe? Ĩndĩ ũũ aumĩtye va maũndũ aa onthe?

⁵⁷ Na malulutĩkw’a nĩwe. Ĩndĩ Yesũ amea, Mwathani ndalea kwĩthĩwa na ndaĩa, ate o nthĩ yake mwene, na nyũmbanĩ yake mwene.

⁵⁸ Na ndaaĩka mavinya maingĩ vo nũndũ wa kũlea kwĩtĩkĩla kwoo.