MALIKO 3 - Mbivilia

Kũvow’a kwa mũndũ waĩ na kw’oko kwau

¹ Na alika ĩngĩ ĩsinakokenĩ; na kwaĩ mũndũ vo waĩ na kw’oko kwau.

² Na mamũsyaĩĩsya, kana nũnũũmũvosya mũthenya wa savato: nĩ kana mamũvinganĩsye.

³ Na amwĩa ũla mũndũ waĩ na kw’oko kwau, Ũngama katĩ.

⁴ Na amakũlya, Nĩkwosana na ĩla mĩao kwĩka nesa mũthenya wa savato, kana kwĩka ũthũku? Kũtangĩĩa thayũ kana kũaa? Indĩ mavindya.

⁵ Na amasiangya na ũthatu, akĩw’a woo nũndũ wa wũmũ wa ngoo syoo, amwĩa ũla mũndũ, Tambũũkya kw’oko kwaku. Na atambũũkya; na kw’oko kwake kwavoa kwethĩwa kũima.

⁶ Na Avalisi maumaala, na oyu mambĩlĩlya kũsaman’ya vamwe na ala ma Elote ũndũ matonya kũmũaa.

Avow’a angĩ

⁷ Na Yesũ eesomola vau, we na amanyĩw’a make, athi ũkanganĩ: na ĩkomano ĩnene kuma Kalilii yamũatĩĩa: o na kuma Yutia,

⁸ na kuma Yelusaleme, na kuma Itumea, na mbee was Yolotani, na ngalĩ sya Tile na Sitoni, ĩkomano ĩnene, ya ala meew’a maũndũ manene ala wĩkaa, mooka vala ũĩ.

⁹ Na atavya amanyĩw’a make kana kakalawa kekale vakuvĩ nake nũndũ wa ĩkomano, yĩikese kũmũvivinya;

¹⁰ nũndũ nũvoetye aingĩ; na onthe ala maĩ na mothĩn’yo mamũvivinyanĩa nĩ kana mamũkiite.

¹¹ Na maveva mavuku, o yĩla mamwona, mavalũka nthĩ mbee wake, na kũneena na wasya mũnene, makyasya, We nue Mwana wa Ngai.

¹² Na amakindĩlĩla mũno maikamumbũle.

Yesũ akĩnyuva amanyĩw’a ĩkũmi na elĩ

¹³ Na ambata kĩĩmanĩ, na ameta o ala wendete we mwene moke kwake; nao mooka vala ũĩ.

¹⁴ Na anyuva ĩkũmi na elĩ kana methĩwae vamwe nake, na nĩ kana amatũme kũtavan’ya,

¹⁵ na kwĩthĩwa na ũkũmũ wa kũvosya mowau na kumya ndaimoni;

¹⁶ na amũtw’ĩĩa Simoni syĩtwa yĩngĩ, Vetelo;

¹⁷ na Yakovo mwana was Sevetii, na Yoana mwana‐a‐inyia wa Yakovo; namo amatw’ĩĩa syĩtwa yĩngĩ, Voaneliki, nayo nĩ, Ana ma kĩtundumo:

¹⁸ na Andalea, na Vilivu, na Valitholomayo, na Mathayo, na Thoma, na Yakovo mwana wa Aluvaio, na Thatayo na Simoni Mũkanaani,

¹⁹ na Yutasi Isikalioti, ũla wamũvũnyanĩe. Na mathi nyũmbanĩ.

Yesũ akĩsũngĩa ala maisye kana mekonĩ make e na ũtethyo wa Satani

²⁰ Na yĩla ĩkomano yoombana ĩngĩ, ũndũ mo mataatonya ũndũ o na kũya lĩu.

²¹ Na andũ ma kwoo meew’a ũu, maumaala mamũkwate: nũndũ masya, E na ndũũka.

²² Na aandĩki ala matheeie kuma Yelusaleme masya, E na Veelisevuli, na eumya ndaimoni na vinya wa mũnene wa ndaimoni.

²³ Na ameta moke vala ũĩ, na amatavya na ngelekan’yo, Satani atonya ata kumya Satani?

²⁴ Na ethĩwa ũsumbĩ nĩwĩvathanĩtye, ũsumbĩ ũsu ndũtonya kũũngama.

²⁵ Na ethĩwa nyũmba nĩyĩvathanĩtye, nyũmba ĩsu ndĩtonya kũũngama.

²⁶ Na ethĩwa Satanĩ nũkwĩyũkita mwene, na kwĩvathan’ya, ndakaũngama, ĩndĩ e na mũminũkĩlyo.

²⁷ Ĩndĩ vai mũndũ ũtonya kũvota nyũmbanĩ ya ũla wĩ vinya, akamũvuta mĩio yake, atambĩte kũmwova ũla wĩ vinya; na ĩndĩ aitava ila syĩ nyũmbanĩ yake.

²⁸ Nĩ w’o nĩngũmwĩa, Naĩ syonthe ĩkaekewa ana ma andũ, na moumano moo ala maumanaa namo:

²⁹ ĩndĩ o ũla wĩmũuma Veva Mũtheu nde ĩndĩ ũkaekewa, ĩndĩ e na ĩvĩtyo ya tene na tene;

³⁰ nũndũ masya, E na veva mũvuku.

Wana‐a‐ia wa w’o

³¹ Na inyia wake na ana‐a‐inyia make mooka; na maũngama nza, na mamũtũmana maimwĩta.

³² Na ikomano yekala nthĩ yĩmũthyũlũlũkĩte; na mamwĩa, Sisya, mwenyu na ana‐a‐mwenyu me nza na nĩmeũkũmantha.

³³ Na amasũngĩa, na asya, Mwaitũ na ana‐a‐ia naaũ?

³⁴ Na amasiangya ala mekalĩte nthĩ mamũthyũlũlũkite, na asya, Sisyai, mwaitũ na ana‐a‐ia!

³⁵ Nĩkwĩthĩwa o ũla wĩkaa kwenda kwa Ngai, ũsu nĩwe mwana‐a‐ia, na mwĩĩtu‐a‐ia, na mwaitũ.