Luka 2 - Mbivilia

Ĩsyawa ya Yesũ

¹ Na kweethĩwa matukũ asu mwĩao waumie kwa Kaisali Aukusito, nĩ kana andũ onthe maandĩkwe.

² Na kũandĩka kũu kwaĩ kwa mbee yĩla Kwilinio waĩ ngavana wa Silia.

³ Na onthe mathi kũandĩkwa, kĩla mũndũ ndũanĩ yoo.

⁴ Na Yosevu nake ambata kuma Nasaleti, ndũa ĩmwe ya Kalilii, athi Yutia, avika ndũanĩ ya Ndaviti, ĩla yĩtawa Mbethelemu, nũndũ we aĩ wa nyũmba ya mũvĩa wa Ndaviti;

⁵ ni kana aandĩkwe vamwe na Meli, ũla wevaĩtye, nake aĩ mũito.

⁶ Na kweethĩwa, yĩla maĩ kw’o, matukũ make mavika ma ũsyaa.

⁷ Na asyaa kana kavĩsĩ ka mbee; na akavw’ĩka ngũa sya ũkenge, na akakomya mũvalatĩnĩ, nũndũ nyũmbanĩ ya aeni vaiaĩ ũthei woo.

⁸ Na nthĩ ĩsu kwaĩ aĩthi mekalaa weũnĩ, maisyaĩĩsya indo syoo ũtukũ.

⁹ Nao maumĩlĩlwa nĩ mũlaĩka wa Mwĩaĩi, na ũtheu mũtisu wa Mwĩaĩi wamamulĩka; nao makĩa mũno.

¹⁰ Na mũlaĩka amea, Ekai ũkĩa; nũndũ sisyai, nyie nĩnamũetee ũvoo mũseo wa ũtanu mũnene ũla ũkethĩwa wa andũ onthe:

¹¹ nũndũ ũmũnthĩ, ndũanĩ ya Ndaviti, nĩmũsyaĩwe Mũtangĩĩi, nake nĩ Klĩsto ũla Mwĩaĩi.

¹² Na wonan’yo kwenyu nĩ atĩĩ: Mũkoona kana kavw’ĩkĩtwe ngũa sya ũkenge, kamamĩtw’e mũvalatĩnĩ.

¹³ Na o kavinda kau, kwethĩwa vamwe na ũla mũlaĩka aingĩ ma nguthu ya ĩtunĩ, makĩmũkumya Ngai, makyasya,

¹⁴ Ngai nataĩwe ku ĩũĩũ mũno, Na mũuo wĩthĩwe kũũ nthĩ andũnĩ ala wendeeaw’a nĩmo.

¹⁵ Na kweethĩwa, yĩla alaĩka mamatiie makĩthi ĩtuni, aĩthi maneenan’ya ene kwa ene, Tũendei yu Mbethelemu, tũsisye ũndũ ũũ ũla weekĩka, ũla Mwĩaĩi watũmanyĩthya.

¹⁶ Na mathi mĩtũkĩ, na meethĩa Meli na Yosevu, na kala kaũkenge kamamĩtw’e mũvalatĩnĩ.

¹⁷ Na makona, matavan’ya ndeto ila mataviw’e ũndũ wa kala kana.

¹⁸ Na onthe ala meewie maseng’a kwondũ wa maũndũ ala mataviw’e nĩ aĩthi.

¹⁹ Ĩndĩ Meli ekalya ndeto isu syonthe ngoonĩ yake, akĩsũanĩa.

²⁰ Na aĩthi masyoka, maimũtaĩa na maimũkumya Ngai ũndũ wa maũndũ onthe ala meewie na moonie, o tondũ mataviw’e.

²¹ Na matukũ nyanya mavika ma kũkaĩka, syĩtwa yako keetwa Yesũ, o tondũ keetiwe nĩ mũlaĩka katanamba kũitavwa.

Kũnenganwe kwa Yesũ ĩkalũnĩ

²² Na matukũ meanĩa ma kwĩthesya kwoo kwĩanana na mĩao ya Mose, mambata nako Yelusaleme, kakanenganwe kwa Mwĩaĩi

²³ (o tondũ kũandĩkĩtwe mĩaonĩ ya Mwĩaĩi, Kala kaũme kakasyawa mbee kaketawa katheu ka Mwĩaĩi),

²⁴ na nĩ kana maumye nthembo o tondũ kwaĩtw’e mĩaonĩ ya Mwĩaĩi, Ndumbũ ilĩ, kana maswii elĩ ma mavũĩ.

Simeoni: Wathi wake

²⁵ Na ĩndĩ Yelusaleme kwaĩ mũndũ wetawa Simeoni; nake aĩ mũlũngalu na aĩ mũkĩi wa Ngai, akyeteela ũkiakisyo wa Isilaeli: na Veva Mũtheu aĩ ĩũlũ wake.

²⁶ Nake nĩwonetw’e nĩ Veva Mũtheu, kana ndakona kĩkw’ũ, atanona ũla Klĩsto wa Mwĩaĩi.

²⁷ Nake ooka ĩkalũnĩ atongoew’e nĩ Veva: na ĩthe na inyia mavota na kala kana Yesũ, nĩ kana meke nako tondũ wĩaĩtwe mĩaonĩ,

²⁸ nake ĩndĩ akosa kana mokonĩ make, na amũkatha Ngai, akyasya,

²⁹ Yu ĩndĩ, Mwĩaĩi, ngombo yaku nĩthi na mũuo, Tondũ waneenie;

³⁰ Nĩkwĩthĩwa metho makwa nĩmoona ũtangĩĩo waku,

³¹ Ũla ũseũvĩtye mbee wa andũ onthe;

³² Kyeni kya kũmavuanĩsya Andũ‐ma‐mbaĩ‐ingĩ, Na ũtaĩo wa andũ maku Isilaeli.

³³ Na ĩthe na inyia wako maseng’a ũndũ wa maũndũ ala maneeniwe ũndũ wako;

³⁴ na Simeoni amaathima, na amwĩa Meli inyia wako, Nĩwene, kana kaa kaiĩtwe kethĩwe ũvalũko na wũkĩlo wa aingĩ ma Isilaeli; na wonan’yo ũla ũkakananĩw’a mũno;

³⁵ ĩĩ, na ũvyũ ũkatonya ngoo yaku; nĩ kana mosũanĩo ma ngoo nyingĩ mavuanw’e.

Ana

³⁶ Na vo vaĩ mwathani mũndũ mũka, ũla wetawa Ana, mwĩĩtu wa Vanueli, wa mbaĩ ya Aseli (nake aĩ mũkũu mũno, na nĩwekalĩte myaka mũonza na mũũme wake ĩtina wa wĩĩtu wake,

³⁷ nake aĩ ndiwa myaka mĩongo nyanya na ĩna), o na ndaumaa ĩkalũnĩ, akĩthaitha na kũtĩĩa kũya na kwĩsũvana ũtukũ na mũthenya.

³⁸ Nake ooka kavinda kau amũtũngĩa Ngai mũvea, na amatavya onthe ala meteele wovosyo wa Yelusaleme ũvoo wako.

³⁹ Na mamina kwĩanĩsya maũndũ onthe ala meeaĩtwe mĩaonĩ ya Mwĩaĩi, masyoka Kalilii, na mathi ndũanĩ yoo Nasaleti.

Wana wa Yesũ

⁴⁰ Na kana kaneneva, na keethĩwa na vinya, na kausũwa nĩ ũĩ: na mumo wa Ngai waĩ ĩũlũ wako.

⁴¹ Na kĩla mwaka ĩthe na inyia wako maendaa Yelusaleme ĩvinda ya mboka ya vasaka.

⁴² Na kavikya myaka ĩkũmi na ĩlĩ, mambata o tondũ kweekawa ĩvinda ya mboka ĩsu;

⁴³ na matukũ meanĩa, masyoka, na kĩvĩsĩ Yesũ kyatiwa Yelusaleme; ĩndĩ ĩthe na inyia wakyo maiaamanya ũu;

⁴⁴ ĩndĩ matalĩthasya kĩ o vamwe namo nguthunĩ, na mathi mũendo wa syũa ĩima; na mambĩlĩlya ũkĩmantha andũnĩ ma mbaĩ yoo na andũnĩ ala meesene namo;

⁴⁵ na malea ũkyona, masyoka Yelusaleme, maikĩmantha.

⁴⁶ Na kweethĩwa, matukũ atatũ mathela makyona ĩkalũnĩ, kĩilyĩ katĩ wa amanyĩsya ma mĩao, kĩimethukĩĩsya, na kĩimakũlya mokũlyo:

⁴⁷ na onthe ala makĩwie maseng’a ũndũ wa ũmnayi wakyo na mosũngĩo makyo.

⁴⁸ Nao makyona, maseng’a; na inyia wakyo akĩkũlya, Mwana wakwa, ũtwĩkie ũu nĩkĩ? Nĩwene, au waku nakwa tũkũmanthie na kyeva.

⁴⁹ Nakyo kyamea, Mwĩmanthĩaa kĩ? Mũiĩsĩ kana nĩnaĩlwe kwithĩwa wĩanĩ wa Asa wakwa?

⁵⁰ Nao maiaamanya kĩtina kya ndeto ila kyamatavya.

⁵¹ Nakyo kyatheea nao, kũvika Nasaleti: na kyamenyivĩsya; na inyia wakyo aia maũndũ asu onthe ngoonĩ yake.

⁵² Na Yesũ aendeea akyũĩva na akĩana, e mwaĩlu kwa Ngai na kwa andũ.