Luka 18 - Mbivilia

Ngelekan’yo ya ndiwa na mũsili

¹ Amatavya ngelekan’yo mamanye nĩmaĩlwe nĩ kũvoya mĩthenya yonthe, mateũleela;

² akyasya, Kwaĩ mũsili ndũanĩ ĩmwe, ũla ũtakĩaa Ngai, o na ndoonaa mũndũ ta mũndũ:

³ Na ndũanĩ ĩsu kwaĩ mũndũ mũka ũmwe ndiwa; nĩwaendangaa kaingĩ vala ũĩ aimwĩa, Ndĩvanĩsya kwa nthũ yakwa.

⁴ Nake alea ĩvinda: na ĩtina wa ũu asya ngoonĩ yake atĩĩ, O na ethĩwa ndimũkia Ngai, o na ndyonaa mũndũ ta mũndũ;

⁵ ĩndĩ nũndũ mũndũ mũka ũũ ndiwa nũnũũnyamasya, nĩngũmũĩvanĩsya, ndakanosye akĩndokeanga mĩthenya yonthe.

⁶ Na Mwĩaĩi asya, Ĩw’ai ũndũ ũla mũsili ũte mũlũngalu ũnũkwasya.

⁷ Na Ngai ndakamaĩvanĩsya anyuve make, ala mamũĩĩa mũthenya na ũtukũ, o na amomĩĩsya?

⁸ Nĩngũmũtavya, akamaĩvanĩsya mĩtũkĩ. Ĩndĩ yĩla Mwana wa mũndũ ũkoka nũkethĩa mũĩkĩĩo nthĩ?

Mũvalisi na mumya wa koti

⁹ Amatavya ngelekan’yo ĩno nao ala metusaa ene alũngalu, makĩvũthya angĩ:

¹⁰ Andũ elĩ nĩmambatie ĩkalũnĩ kũvoya; ũmwe nĩ Mũvalisi, na ũngĩ nĩ mumya wa koti.

¹¹ Ũla Mũvalisi aũngama avoya ngooni yake, Ngai, nĩngũũtũngĩa mũvea, nũndũ nditilyĩ ta andũ ala angĩ, avutani, ala mate alũngalu, ilaalai, kana o na ta mumya wa koti ũũ.

¹² Kyumwa kĩmwe nĩndĩĩaa ũya kelĩ; na nĩnumasya kĩlungu kya ĩkũmi kya kĩla kĩndũ nĩ nakyo.

¹³ Ĩndĩ mumya wa koti aũngamĩte kũasa, na ndaaũngalalya metho make kũsisya ĩtunĩ, ĩndĩ eekũnanga kĩthũi, akyasya, Ngai, mbĩw’ĩa tei, nĩ mwathe nyie.

¹⁴ Nĩngũmũtavya, Mũndũ ũsu atheeie kwake atalĩlwe ũlũngalu kũte ũla ũngĩ: nĩkwĩthĩwa ũla wĩnenevasya mwene nũkanyivw’a; ĩndĩ ũla wĩnyivasya mwene nũkanenevw’a.

Yesũ aiathima twana tũnini

¹⁵ Na mamũetee twana twoo tũnini, atũkiite: na amanyĩw’a moona ũu, mamakan’ya.

¹⁶ Ĩndĩ Yesũ atwĩta tũke, kwake, akyasya, Tũekei twana tũnini tũke kwakwa, mũtikatũvate: nũndũ ũsumbĩ wa Ngai nĩ wa ala mailyĩ tatw’o.

¹⁷ Nĩ w’o nĩngũmwĩa, Ũla ũtosaa ũsumbĩ wa Ngai ta kana kanini ndakavota vo nongi.

Thayũ ũtathela na mĩisyo ya ũthwii

¹⁸ Na mũnene ũmwe amũkũlya, akyasya, Mũmanyĩsya mũseo, nĩĩka ata kana nĩtiĩwe thayũ ũtathela?

¹⁹ Na Yesũ amwia, Nĩkĩ ũũmbĩta mũseo? Vai mũseo ate o ũmwe, nake nĩ Ngai.

²⁰ Nũmĩsĩ ĩla mĩao, Ndũkalaalae, Ndũkoae, Ndũkoye, Ndũkaneene ũkũsĩ wa ũvũngũ, Taĩa au na mwenyu.

²¹ Nake asya, Maũndũ asu onthe nĩnamakwatie kuma nĩ mũnini.

²² Yesũ eew’a ũu, amwĩa, Ve ũndũ ũmwe ũtielye: Thoosya syĩndũ syonthe ila wĩ nasyo, ũnenge ngya, na ũkethĩwa na ũthwii ĩtunĩ: na ĩndĩ ũkyũka ũngatĩĩe.

²³ Na eew’a ndeto isu, eew’a woo mũno; nũndũ aĩ mũthwii mũno.

²⁴ Na Yesũ amũketeea na asya, Ko nĩ vinya ala athwii kũvota ũsumbĩnĩ wa Ngai!

²⁵ Nũndũ nĩ ũvũthũ ngamĩle kũvotela kalimanĩ ka singano, kũte mũndũ mũthwii kũvota ũsumbĩnĩ wa Ngai.

²⁶ Na ala meewie masya, Nũũ ĩndĩ ũtonya kũtangĩĩwa?

²⁷ Nake asya, Maũndũ ala matatonyeka kwa andũ nĩmatonyeka kwa Ngai.

²⁸ Nĩvo Vetelo waisye, Sisya, ithyĩ nĩtũtiĩte syĩndũ sitũ twakũatĩĩa.

²⁹ Nake amea, Nĩ w’o nĩngũmwĩa, Vai mũndũ ũla waatia nyũmba, kana mũka, kana ana‐a‐inyia, kana asyai make, kana syana, kwondũ wa ũsumbĩ wa Ngai,

³⁰ ũtakosa vandũ va kĩmwe nyingĩ ĩvindanĩ yĩĩ twĩ nayo, na ĩvinda yĩla yũkĩte thayũ ũtathela.

Yesũ akyathana kĩkw’ũ kyake ya katatũ

³¹ Na amomban’ya vala ũĩ ala ĩkũmi na elĩ, na amea, Sisyai, nĩtũkwambata Yelusaleme, na maũndũ onthe ala maandĩkiwe nĩ athani makeanĩwa kwa Mwana wa mũndũ.

³² Nĩkwĩthĩwa akanenganwe mokonĩ ma Andũ‐ma‐mbaĩ‐ingĩ, akathekeewa na kĩvũthya, na kũthĩnw’a mũno, na kũtw’ĩlangwa mata:

³³ na makamũvũa na kũmũaa: na mũthenya wa katatũ akathayũũka.

³⁴ Na maiaamanya, o na vanini, maũndũ asu; na ndeto isu nĩsyavithĩtwe kwoo, na maiaamanya ũla waneeniwe.

Yesũ aivosya kĩlilinda

³⁵ Na kweethĩwa, aithengeea Yeliko, kwaĩ kĩlilinda kyekalĩte ũtee wa nzĩa kĩivoya syĩndũ:

³⁶ nakyo kyeew’a ĩkomano yĩvĩtĩte, kyakũlya nĩ ũndũ mwaũ.

³⁷ Nao makĩtavya nĩ Yesũ wa Nasaleti ũvĩtĩte.

³⁸ Nakyo kyookĩlya wasya, kĩkyasya, Yesũ Mwana wa Ndaviti, mbĩw’ĩa tei.

³⁹ Na ala matongoetye makĩkan’ya, kĩkilye: ĩndĩ kyookĩlya wasya mũno mbee, Mwana wa Ndaviti, mbĩw’ĩa tei.

⁴⁰ Na Yesũ aũngama, ameaĩa kĩetwe vala ũĩ: na kyathengeea, akĩkũlya,

⁴¹ Wĩenda ngwĩke ata? Na kyasya, Mwĩaĩi, nĩenda kwona nthĩ.

⁴² Na Yesũ akĩtavya, Ona nthĩ: mũĩkĩĩo waku nĩwakũvosya.

⁴³ Na kavinda o kau kyanengwa kwona, na kyamũvikĩla, kĩimũkatha Ngai: na andũ onthe, moona ũu, mamũtaĩa Ngai.