Kuma 9 - Mbivilia

Ũthĩn’yo indonĩ

¹ Nĩvo ĩndĩ Yeova wamwĩie Mose, Lika kwa Valao, ũmwĩe, Ũũ nĩw’o Yeova, Ngai wa Aevelania, ũnũkwasya, Lekya andũ makwa mathi, manthũkũme.

² Nũndũ ethĩwa nũkũlea kũmalekya mathi, na kũmekalangya,

³ sisya, kw’oko kwa Yeova kwĩ ĩũlũ wa ĩndo syaku ila syĩ isesinĩ, ĩũlũ wa mbalasi, na mang’oi, na ngamĩle, na ndĩthya sya ng’ombe, na ndĩthya sya mbũi na malondu: kũkeethĩwa mũimũ mũthũku mũno.

⁴ Na Yeova akavathũkan’ya katĩ wa indo sya Isilaeli na indo sya Misili: na kũikakw’a ĩmwe ya syonthe ĩla sya ana ma Isilaeli.

⁵ Na Yeova atw’a kyathĩ, akyasya, Ũnĩ nĩw’o Yeova wĩĩka ũndũ ũsu nthĩ ĩno.

⁶ Na ũnĩ ũsu Yeova eeka ũndũ ũsu, na indo syonthe sya Misili syakw’a: ĩndĩ indonĩ sya ana ma Isilaelĩ kũtyaakw’a o na ĩmwe.

⁷ Na Valao atũmana, na eethĩa kũtyaĩ o na ĩmwe ngw’ũ ya indo sya Aisilaeli. Ĩndĩ ngoo ya Valao yaĩ nyũmũ, na ndaalekya andũ mathi.

Ũthĩn’yo wa kwimba mĩimũ

⁸ Na Yeova amea Mose na Aluni, Utai mũu ikonĩ mbĩ syusĩe, na Mose naũlũkye kwelekela ĩtunĩ Valao ene.

⁹ Na ũkatw’ĩka kĩtoo kĩvinyu nthĩ yonthe ya Misili, na kwĩthĩwa mĩimũ mimbu ĩkĩvũthũkanga ĩũlũ wa andũ na ĩũlũ wa nyamũ, nthĩ yonthe ya Misili.

¹⁰ Na mauta mũu ikonĩ, na maũngama mbee wa Valao; na Mose aũlũkya kwelekela ĩtunĩ; na watw’ĩka mĩimũ mimbu ĩkĩvũthũkanga ĩũlũ wa andũ na ĩũlũ wa nyamũ.

¹¹ Na ala eki ma syama matyaatonya kũũngama mbee wa Mose nũndũ wa mĩimũ; nĩkwĩthĩwa eki ma syama maĩ na mĩlimũ ĩsu, o na Amisili onthe.

¹² Na Yeova oomya ngoo ya Valao, na ndaamethukĩĩsya; o tondũ Yeova ũtavĩtye Mose.

Ũthĩn’yo wa mbua ya mavia

¹³ Na Yeova amwĩa Mose, Ũkĩla kĩoko tene, ũũngame mbee wa Valao, na ũimwĩa, Ũũ nĩw’o Yeova, Ngai wa Aevelania, ũnũkwasya, Lekya andũ makwa mathi, manthũkũme.

¹⁴ Nũndũ ĩvinda yĩĩ ngaetee ngoo yaku mothĩn’yo makwa onthe, we na athũkũmi maku, na andũ maku; nĩ kana ũmanye kana vati ũngĩ ũtilyĩ takwa nthĩ yonthe.

¹⁵ Nũndũ yu nĩĩthĩwa ndambũũkĩtye kw’oko kwakwa, ngũkũne we na andũ maku na mũimũ, na ũivetwa kuma nthĩ:

¹⁶ ĩndĩ nĩ w’o, kwondũ wa ũndũ ũũ nĩngũũngamĩtye, nĩkwon’ye vinya wakwa, na nĩ kana syĩtwa yakwa yĩtavanw’e nthĩ yonthe.

¹⁷ O na yu, we, wĩneneveasya andũ makwa, ndũkamalekye mathi?

¹⁸ Sisya, ũnĩ ta yu ngausya mbua mbai mũno ya mavia, mũthemba ũla ũtaaoneka Misili kuma mũthenya ũla yambĩlĩlw’e o na kũvika yu.

¹⁹ Yu ĩndĩ tũmana, ũkalaate indo syaku na syonthe ila wĩ nasyo kĩsesinĩ syĩnũkw’e; nũndũ kĩla mũndũ na nyamũ ĩla ĩkakitw’a kĩsesinĩ, ĩte mbĩnũkye, mbua ĩsu ya mavia ĩkasyuĩa, na ikakw’a.

²⁰ Ũla wakĩie ndeto ya Yeova athũkũminĩ ma Valao atuma athũkũmĩ make na indo syake ikũka ilike nyũmbanĩ:

²¹ nake ũla ũtaaona ndeto ya Yeova ta kĩndũ atia athũkũmi make na indo syake kĩsesinĩ.

²² Na Yeova amwĩa Mose, Tambũũkya kw’oko kwaku keelekela ĩtunĩ, kue, mbua ya mavia nthĩ yonthe ya Misili, mũndũnĩ, na nyamũnĩ, na nyũnyinĩ syonthe sya mũũndanĩ, nathĩ yonthe ya Misili.

²³ Na Mose atambũũkya ndata yake kwelekela ĩtunĩ: na Yeova aete ĩtundumo na mbua ya mavia, na mwaki watheea wavika nthĩ; na Yeova ausya mbua ya mavia nthĩ ya Misili.

²⁴ Na kwondũ wa ũu kweethĩwa mbua ya mavia, na mwaki ũvulene na ĩla mbua ya mavia, mbai mũno, mũthemba ũla ũtaaoneka nthĩ yonthe ya Misili kuma yĩla yambĩlĩlye kũtũwa nĩ andũ.

²⁵ Na mbua ĩsu ya mavia yakũna syonthe ila syaĩ kĩsesinĩ, andũ o na nyamũ, nthĩ yonthe ya Misili; na mbua ĩsu ya mavia yakũna nyũnyi syonthe sya mũũndani, na yatũlanga kĩla mũtĩ wa kĩsesinĩ.

²⁶ No nthĩ ya Ngoseni ĩ yoka, ĩla yatwĩe ana ma Isilaeli, ĩtaĩ mbua ya mavia.

²⁷ Na Valao atũmana, na eeta Mose na Aluni, na amea, Nĩnĩvĩtĩtye ĩvinda yĩĩ: Yeova nĩ mwene ũlũngalu, nakwa nyie na andũ makwa twĩ athe.

²⁸ Mwĩsũvei Yeova; nũndũ itundumo ii nene mũno na mbua ya mavia nĩsyĩanĩe; nakwa ngamũlekya mũthi, na mũtiendeea na kwĩkala kũũ.

²⁹ Na Mose amwĩa, O yĩla nĩuma ndũanĩ, ngookĩlĩlya Yeova moko makwa; na itundumo ikathela, o na kũtikethĩwa mbua ya mavia ĩngĩ; nĩ kana ũmanye atĩ nthĩ nĩ ya Yeova.

³⁰ Ĩndĩ ũndũ waku na athũkũmi maku, nĩnĩsĩ kana o na yu mũtikakĩa Yeova Ngai.

³¹ Na katane na mbaale syakũnwa: nũndũ mbaale syaĩ na iia, na katane kaĩ kalaũku.

³² Ĩndĩ nganũ na kusemethu ityaakũnwa: nũndũ ityaameete.

³³ Na Mose auma ndũanĩ kwa Valao, na atambũũkĩsya Yeova moko make: na itundumo na mbua ya mavia syatĩa, na mbua ndĩaaua ĩũlũ wa nthĩ.

³⁴ Na yĩla Valao wonie atĩ mbua na mbua ya mavia na itundumo nitĩĩte, aendeea kũvĩtya, na oomya ngoo yake, we na athũkũmi make.

³⁵ Na ngoo ya Valao yoomĩthw’a, na ndaalekya ana ma Isilaeli mathi; o tondũ Yeova ũneenete na kanyw’a wa Mose.