Kuma 7 - Mbivilia

¹ Na Yeova amwĩa Mose, Sisya, nĩkũtw’ĩkĩthĩtye ta Ngai kwa Valao; na Aluni, mwana‐a‐mwenyu, akeethĩwa mwathani waku.

² Ũkaneene onthe ala ngũkwĩaĩa; na Aluni, mwana‐a‐mwenyu, akaneena na Valao, nĩ kana alekye ana ma Isilaeli maume nthĩ yake.

³ Nakwa ngoomya ngoo ya Valao, na ngingĩvya syama syakwa na moseng’yo makwa nthĩ ya Misili.

⁴ Ĩndĩ Valao ndakamwĩthukĩĩsya, nakwa ngailĩĩla kw’oko kwakwa Misili, na ngyumya nguthu syakwa, andũ makwa ana ma Isilaeli, kuma nthĩ ya Misili na mosilĩlo manene.

⁵ Na Amisili makamanya ninyie Yeova, yĩla nĩtambũũkya kw’oko kwakwa ĩũlũ wa Misili, na ngyumya ana ma Isilaeli katĩ woo.

⁶ Na Mose na Aluni meeka ũu; o tondũ Yeova wameaĩe, now’o meekie.

⁷ Na Mose aĩ wa myaka mĩongo nyanya, na Aluni wa myaka mĩongo nyanya na ĩtatũ, yĩla maneenie na Valao.

Ndata ya Aluni

⁸ Na Yeova aneena na Mose na Aluni, akyasya,

⁹ Yĩla Valao wĩneena nenyu, akĩmwĩa, Onan’yai kyama kwondũ wenyu: nĩvo ĩndĩ wĩmwĩa Aluni, Osa ndata yaku, nokĩkya nthĩ mbee wa Valao ĩtw’ĩke nzoka.

¹⁰ Na Mose na Aluni malika kwa Valao, na meeka ũu, o tondũ Yeova wameaĩe: na Aluni ekya ndata yake nthĩ mbee wa Valao na mbee wa athũkũmi make, na yatw’ĩka nzoka.

¹¹ Nĩvo ĩndĩ Valao nake wetie andũ oĩ na aoi: na asu nao, eki ma syama ma Misili, meeka o ta ũu na mowe moo.

¹² Nũndũ mekya kĩla mũndũ ndata yake nthĩ, nasyo syatw’ĩka nzoka: ĩndĩ ĩla ndata ya Aluni yamelya ndata syoo.

¹³ Na ngoo ya Valao yoomwa, na ndaamethukĩĩsya; o tondũ Yeova ũneenete.

Ũthĩn’yo wa nthakame

¹⁴ Na Yeova amwĩa Mose, Ngoo ya Valao nĩ nyũmũ, nũleete kũlekya andũ mathi.

¹⁵ Enda kwa Valao kwakya; sisya, ũkeethĩa aienda manzĩnĩ; naku ũkaũngame ũtee wa ũsĩ ũkomane nake; na ĩla ndata yalyũlilwe nzoka ũkethĩwe nayo kw’okonĩ kwaku.

¹⁶ Noimwĩa, Yeova, Ngai wa Aevelania, nũndũmĩte kũla ũĩ, akĩkwĩa, Lekya andũ makwa mathi, manthũkũme weũnĩ: na sisya, kũvika o na yu ndwaaĩthukĩĩsya.

¹⁷ Ũũ nĩw’o Yeova ũnũkwasya, Ũndũnĩ ũũ ũkamanya ninyie Yeova: sisya, ngakũna manzĩ ala me ũsĩnĩ na ndata ĩla yĩ kw’okonĩ kwakwa, na makaalyũka nthakame.

¹⁸ Na makũyũ ala me ũsĩnĩ makakw’a, na ũsĩ ũkanyunga naĩ; na Amisili makamena mũno kũnyw’a manzĩ ma ũsĩnĩ.

¹⁹ Na Yeova amwĩa Mose, Mwĩe Alunĩ, Osa ndata yaku, noitambũũkya kw’oko kwaku ĩũlũ wa manzĩ ma Misili, ĩũlũ wa mbũsĩ syoo, na ĩũlũ wa tũlũsĩ twoo, na ĩũlũ wa ndia syoo, na ĩũlũ wa maia moo onthe ma manzĩ, matw’ĩke nthakame; na kũkeethĩwa nthakame nthĩ yonthe ya Misili, syĩndũnĩ sya mĩtĩ o na syĩndũnĩ sya mavia.

²⁰ Na Mose na Aluni meeka ũu, o tondũ Yeova weaie; na ookĩlya ndata, na akũna manzĩ ala maĩ ũsĩnĩ, Valao ene, o na athũkũmi make mene; na manzĩ onthe ala maĩ ũsĩnĩ maalyũka nthakame.

²¹ Na makũyũ ala maĩ ũsĩnĩ makw’a; na ũsĩ wanyunga naĩ, na Amisili matyaatonya kũnyw’a manzĩ ma ũsĩnĩ; nayo nthakame yakomana nthĩ yonthe ya Misili.

²² Na eki ma syama ma Misili meeka o ta ũu na mowe moo: na ngoo ya Valao yoomwa, na ndaamethukĩĩsya; o tondũ Yeova ũneenete.

²³ Na Valao eethyũũa alika nyũmba kwake, o na ndaaona ũu ta ũndũ ngoonĩ yake.

²⁴ Na Amisili onthe menzanga kũndũ kw’onthe ũtee wa ũsĩ mone manzĩ ma ũnyw’a; nũndũ matyaatonya kũnyw’a ala manzĩ ma ũsĩnĩ.

Ũthĩn’yo wa syoa

²⁵ Na mĩthenya mũonza yathela, ĩtina wa Yeova akũna ũla ũsĩ.