Kuma 5 - Mbivilia

Mose na Aluni me mbee wa Valao

¹ Na ĩtina wa ũu Mose na Alunĩ maenda, na mamwĩa Valao, Ũũ nĩw’o Yeova, Ngai wa Isilaeli, ũnũkwasya, Lekya andũ makwa mathi, methĩwe na mboka weũnĩ kwondũ wakwa.

² Na Valao asya, Yeova nũũ, nĩthukĩĩsye wasya wake nĩlekya Isilaeli mathi? Ndimwĩsĩ Yeova, o na ndikalekya Isilaeli mathi.

³ Na mamwĩa, Ngai wa Aevelania nũnakomanie naitũ: nĩtũũkwĩsũva, ũtũlekye tũthi weũnĩ kyalo kya mĩthenya ĩtatũ, tũthembee Yeova, Ngai waitũ, ndakese kũtũvalũkĩlya mũimũ, kana ũvyũ.

⁴ Na mũsumbĩ wa Misili amea, Nĩ ũndũ wa kĩ inyw’ĩ, Mose na Aluni, mũũtuma andũ matia mawĩa moo? Endai mũsyokee mĩio yenyu.

⁵ Na Valao amea, Sisya, andũ ma nthĩ yu nĩ aingĩ, na nĩmũũtuma mathũmũia mĩio yoo.

⁶ Na mũthenya o ũsu Valao ameaĩa aũngamĩi ma andũ, na anene moo, akĩmea,

⁷ Mũikanenge andũ ũa ĩngĩ ta tene, wa kũmba mavali: nĩmaende memanthĩe ũa mo ene.

⁸ Na ũtalo wa mavali, ala mombaa tene, manengei o w’o; mũtikanyivye o na vanini: nĩkwĩthĩwa nĩ atulu; kwondũ wa ũu nimeũlonzan’ya, na kwasya, Tũendei tũmũthembee Ngai waitũ.

⁹ Andũ nĩmanengwe wĩa wĩ vinya mbee, motethye; na matikethukĩĩsye ndeto sya ũvũngũ.

¹⁰ Na aũngamĩi ma andũ, na anene moo, maumaala, na maneena na andũ, makĩmea, Ũũ nĩw’o Valao ũnũkwasya, Ndimũnenga ũa.

¹¹ Endai inyw’ĩ, mũkemanthĩe ũa o vala mũtonya kũwona; nũndũ wĩa wenyu o na wĩva ndũkaoleka.

¹² Kwondũ wa ũu andũ manyaĩĩkwa nthĩ yonthe ya Misili mamanthe mavuthĩ vandũ va ũla ũa.

¹³ Na aũngamĩi mamakalaata mũno, makĩmea, Ianĩsyai mawĩa menyu, mawĩa ma kĩla mũthenya, o ta yĩla ũa waĩ vo.

¹⁴ Na anene ma ana ma Isilaeli, ala aũngamĩi ma Valao mamaiĩte, makũnwa, makĩwa, Nĩ ũndũ wa kĩ muineanĩsya wĩa wenyu wa kũmba mavali ĩoo, o na ũmũnthĩ, ta tene?

¹⁵ Nĩvo ĩndĩ anene ma ana ma Isilaeli mathi manũĩĩa Valao, makĩmũkũlya, Wĩĩka na athũkũmi maku ũu nĩkĩ?

¹⁶ Ithyĩ athũkũmi maku tũtinengawe ũa, nao metwĩa, Ũmbai mavali: na, sisya, athũkũmi maku nĩtũkũnawa; ĩndĩ ĩvĩtyo yĩ kwa andũ maku mwene.

¹⁷ Ĩndĩ amea, Mwĩ atulu, mwĩ atulu: kwondũ wa ũu mwĩasya, Tũendei tũmũthembee Yeova.

¹⁸ Endai yu ĩndĩ, mũtethye wĩa; nĩkwĩthĩwa mũikanengwa ũa, ĩndĩ mũkeanĩsye ũla ũtalo wa mavali.

¹⁹ Na anene ma ana ma Isilaeli moona atĩ me ũndũnĩ ũthũku, yĩla matavĩw’e, Mũtikaole o na vanini mavali menyu, ũtalo wa kĩla mũthenya.

²⁰ Na makyuma kwa Valao makomana na Mose na Aluni, ala maũngeme nzĩani:

²¹ na mamea, Yeova amũsisye, na kũsila; nũndũ nĩmũtũnyungĩtye naĩ kũla kwĩ Valao, na kũla kwĩ athũkũmi make, kũmanenga ũvyũ mokonĩ moo matũae.

Mboya ya Mose

²² Na Mose amũsyokea Yeova, na amwĩa, Mwĩaĩi, ũmekĩte andũ aa naĩ nĩkĩ? Ũndũmĩte nĩkĩ?

²³ Nũndũ kuma navika kwa Valao nĩneene syĩtwanĩ yaku, nũmekĩte andũ aa naĩ; o naku ndũmathonoketye andũ maku nongi.