Kuma 3 - Mbivilia

Kwĩtwa kwa Mose

¹ Na ĩndĩ Mose eethĩwa akĩĩthya ndĩthya ya mbũi na malondu ya Yethilo mũthoni wake, mũthembi wa Mitiani: na atongoesya ĩla ndĩthya avĩtĩlya weũnĩ, na avika kĩĩma kya Ngai o Olevu.

² Na mũlaĩka wa Yeova amumĩlĩla ũlĩlĩnzĩnĩ wa mwaki ũla wakanĩte kakuthunĩ katĩ: na oona, na, sisya, kakuthu nĩkakanĩte mwaki, na kakuthu katyavĩsaa.

³ Na Mose asya, Nĩngwathũka yu none ũndũ ũũ ũnene, na kĩla kĩũtuma kakuthu katavya.

⁴ Na yĩla Yeova wonie kana nĩwathũka ũtee one, Ngai amwĩta kuma kakuthunĩ katĩ, na amwĩa, Mose, Mose. Nake eetĩka, Ninyioo.

⁵ Na amwĩa, Ndũkathengeee vaa: umya iatũ syaku maũũnĩ maku, nũndũ vau ũũngeme nĩ vandũ vatheu.

⁶ Na ĩngĩ amwĩa, Nyie ninyie Ngai wa ĩthe waku, Ngai wa Avalaamu, na Ngai wa Isaka, na Ngai wa Yakovo. Na Mose avitha ũthyũ wake; nũndũ akĩa kũmũsisya Ngai.

⁷ Na Yeova amwĩa, Nĩ w’o, nĩnonete thĩna wa andũ makwa ala me Misili, na ngew’a ũkayo woo kwondũ wa aũngamĩi moo; nũndũ nĩnĩsĩ mathĩna moo;

⁸ nakwa nĩtheete nĩmavonokye mokonĩ ma Amisili, na kũmaumya nthĩ ĩsu nĩmatwae nthĩ nzeo na nene, nthĩ yusũĩte ĩia na ũkĩ wa nzũkĩ; o kũndũ kwa Mũkanaani, na Mũititi, na Mũamoli, na Mũvelisi, na Mũivi, na Mũyevusi.

⁹ Na yu sisya, kĩĩo kya ana ma Isilaeli nĩkĩvikĩte kwakwa: na ĩngĩ nĩnonete mathĩna ũndũ Amisili mamathĩnasya.

¹⁰ Ũkĩla ĩndĩ yu, na nĩngũũtũma kwa Valao, nĩ kana wumye andũ makwa, ana ma Isilaeli, Misili.

¹¹ Na Mose amwĩa Ngai, Nyie nĩ ũũ, nĩende kwa Valao, na nĩ kana nyie numye ana ma Isilaeli Misili?

¹² Na amwĩa, Vate ndĩi ngeethĩwa vamwe naku; na ũndũ ũũ ũkeethĩwa kĩmanyĩthya kwaku kana nĩngũtũmĩte: waumya andũ Misili, mũkathũkũma Ngai kĩĩmanĩ kĩĩ.

¹³ Na Mose amwĩa Ngai, Sisya, yĩla nĩendea ana ma Isilaeli, na ngĩmea, Ngai wa aaĩthe menyu nũndũmĩte kũla mũi namo makangũlya, Syĩtwa yake nata? Ngamea ata?

¹⁴ Na Ngai amwĩa Mose, NINYIE ŨLA NINYIE: na amwĩa, Ũũ nĩw’o wĩtavya ana ma Isilaeli, NINYIE nĩwe ũndũmĩte kũla mũĩ.

¹⁵ Na ĩngĩ Ngai amwĩa Mose, Ũũ nĩw’o wĩtavya ana ma Isilaeli, Yeova, Ngai wa aaĩthe menyu, Ngai wa Avalaamu, na Ngai wa Isaka, na Ngai wa Yakovo, nũndũmĩte kũla mũĩ: yĩu nĩyo syĩtwa yakwa kũvika tene na tene, nayo nĩ ya kũndilikana kũvika nzyawa syonthe.

¹⁶ Enda, ũkomban’ye atumĩa ma Isilaeli, ũmee atĩĩ, Yeova, Ngai wa aaĩthe menyu, Ngai wa Avalaamu, na wa Isaka, na wa Yakovo, nĩwanumĩlĩle, akĩmbĩa, Nĩ w’o, nĩnamũkĩie na noona ũla mweekĩwe Misili:

¹⁷ nakwa nĩneenete atĩĩ, Ngamumya monyamaonĩ ma Misili na kũmũvikya nthĩ ya Mũkanaani, na Mũititi, na Mũamoli, na Mũvelisi, na Mũivi, na Mũyevusi, o nthĩ yusũĩte ĩia na ũkĩ wa nzũkĩ.

¹⁸ Na makeethukĩĩsya wasya waku: naku we na atumĩa ma Isilaeli mũkathi kwa mũsumbĩ wa Misili, na mũkĩmwĩa, Yeova, Ngai wa Aevelania, nĩwakomanie naitũ: na yu nĩtũũkwĩsũva, tũnenge ũtheĩ wa kũthi weũnĩ kyalo kya mĩthenya ĩtatũ, tũmũthembee Yeova Ngai waitũ.

¹⁹ Nakwa nĩnĩsĩ kana mũsumbĩ wa Misili ndakamũlekya mũthi, aiee, o na kwa kw’oko kwĩ vinya.

²⁰ Na ngatambũũkya kw’oko kwakwa, na ngĩkũna Misili na syama syakwa syonthe ila ngeka katĩ wayo: na ĩtina wa ũu akamũlekya mũthi.

²¹ Na ngamendethya andũ aa kũla kwĩ Amisili: na kũkeethĩwa, mũkĩthi, mũtikaenda mwĩ athei:

²² ĩndĩ kĩla mũndũ mũka akakũlya mũtũi wake, na ũla wĩkalaa ũeni nyũmbanĩ yake, mĩio ya wanake ya vetha, na mĩio ya wanake ya thaavu, na ngũa: na mũkasyĩkĩa ana menyu, na eĩtu menyu; na mũkatavĩa Amisili.