Kuma 22 - Mbivilia

Mĩao ũndũ wa kũĩvĩa

¹ Ethĩwa mũndũ akoya ng’ombe, kana ĩlondu, na aiyũaa, kana aithoosya; akaĩvĩa ng’ombe ĩmwe itano, na ĩlondu yĩmwe malondu ana.

² Ethĩwa kĩng’ei kyu kĩkooneka kĩivũthũa, na kĩikũnwa ũndũ kĩkw’a, kũikethĩwa kũĩvanĩsya nthakame kwondũ wakyo.

³ Ethĩwa nĩkyakeewa ũndũnĩ ũsu, kũkeethĩwa kũĩvanĩsya nthakame kwondũ wakyo; kĩkaĩva: ethĩwa kĩti na kĩndũ, nĩvo ĩndĩ kĩtewa kwondũ wa ũng’ei wakyo.

⁴ Ethĩwa kĩla kyoyiwe kĩkooneka kĩ thayũ kw’okonĩ kwakyo, ethĩwa nĩ ng’ombe, kana ĩng’oi, kana ĩlondu; kĩkaĩvĩa kũndũ kwĩlĩ.

⁵ Ethĩwa mũndũ akaĩthya mũũnda kana mũũnda wa mĩsavivũ wa mũndũ ũngĩ, na akathasya ng’ombe yake, nayo ĩithi kũya mũũndanĩ wa mũndũ ũngĩ; akaĩvĩa ila nzeo mbee sya mũũnda wake mwene, na ila nzeo mbee sya mũũnda wake wa mĩsavivũ.

⁶ Ethĩwa mwaki ũkakana, noikwata mĩw’anĩ, ũndũ syove sya nganũ, o na lĩu ũtũĩtye, o na mũũnda, iivya; ũsu wakwatĩsye mwaki no mũvaka aĩve.

⁷ Ethĩwa mũndũ akanenga mũtũi wake mbesa kana mĩio ĩngĩ asũvĩe, na ĩkyũyĩwa nyũmbanĩ ya mũndũ ũsu; kĩng’ei kyooneka, kĩkaĩvĩa kũndũ kwĩlĩ.

⁸ Kĩng’ei kyalea kwoneka, nĩvo ĩndĩ mwene wa nyũmba wĩthengeea vala ve Ngai, nĩ kana kũmanyĩke ethĩwa nokwĩthĩwa oyĩte mĩio ya mũtũi wake.

⁹ Kwondũ wa kĩla ũndũ wa kũvĩtya, ethĩwa nĩ ũndũ wa ng’ombe, kana ĩng’oi, kana ĩlondu, kana ngũa, o na mũthemba o na wĩva wa kĩndũ kĩla kyaĩte, na mũndũ akyasya ũndũ wakyo, Nĩkyo kĩĩ, ũvoo wa andũ asu me elĩ wĩetwe vala ve Ngai; o ũla Ngai wĩmũtw’a mũvĩtan’ya akaĩvĩa mũtũi wake kũndũ kwĩlĩ.

¹⁰ Ethĩwa mũndũ akamũvithya mũtũi wake ĩng’oi, kana ng’ombe, kana ĩlondu, kana nyamũ o na yĩva, asũvĩe; na ĩikw’a, kana kwĩkwa ũndũ ũthũku, kana kũtwawa, mũndũ o na wĩva atene:

¹¹ makeeavĩa vala ve Yeova me elĩ, ethĩwa nokwĩthĩwa ndaatambũũkya kw’oko kwake amũvute mũtũi wake syĩndũ syake; na mwene wasyo akawĩtĩkĩla, nake ndakaĩva.

¹² Ĩndĩ ethĩwa ĩkoyĩwa kwake, akaĩvĩa mwene wayo.

¹³ Ethĩwa ĩkalĩka ĩkĩtilangwa ilungu, namĩete ĩthĩwe ũkũsĩ; na ndakaĩva ũndũ wa ĩla ĩlĩkĩte.

¹⁴ Na ethĩwa mũndũ akavoya nyamũ kwa mũtũi wake, na ĩkĩkwa ũndũ ũthũku, kana kũkw’a, mwene wayo ate nayo, no mũvaka aĩve.

¹⁵ Ethĩwa mwene wayo e nayo ndakamĩĩvĩa: ethĩwa nĩ ngomboe, nikomboetwe yonee mwene wayo mbesa.

Mĩao ĩmwe ũndũ wa mĩkalĩle mĩseo na mothaithi

¹⁶ Na ethĩwa mũndũ akakuua mwĩĩtu ũte mwĩvasye, na aikoma nake, no mũvaka aumye indo amũthooe atw’ĩke mũka wake.

¹⁷ Ethĩwa ĩthe wake akalea vyũ kũmũnengane kwake, akaĩva mbesa kwĩanana na ũndũ eĩtu maasaw’a.

¹⁸ Ndũkaeke mũndũ mũka mũoi ekale thayũ.

¹⁹ O ũla ũkakoma na nyamũ no mũvaka oawe.

²⁰ Ũla ũkathembea ngai ĩngĩ o na yĩva nthembo ate o Yeova e weka, no mũvaka anangwe vyũ.

²¹ Na ndũkamwĩke mwĩkali wa ũeninĩ naĩ, o na ndũkamũthĩn’ye: nĩkwĩthĩwa mwaĩ ekali ma ũeninĩ nthĩ ya Misili.

²² Mũtikathĩn’ye mũndũ mũka ndiwa o na wĩva, o na kana kakw’ĩĩwe nĩ ĩthe.

²³ Ethĩwa ũkamathĩn’ya na ũndũ o na wĩva, na makeengaĩla o na ata, nditĩa kwĩw’a kũkaya kwoo;

²⁴ na ũthilĩku wakwa ũkavyũva, na ngamũaa na ũvyũ; na iveti syenyu ikeethĩwa ndiwa, na syana syenyu ikakw’ĩĩwa nĩ aaĩthe.

²⁵ Ethĩwa ũkakovethya mbesa ũmwe wa andũ makwa ala ngya o na mekũ ala matwĩe naku, ndũkatinde ũkĩmũandũa; o na ndũkamwĩtye ũtandĩthyo wasyo.

²⁶ Ethĩwa ũkathi na ngũa o na yĩva ya mũtũi waku ĩtw’ike ngwatĩlĩlyo, ũkamũtũngĩa syũa yĩtanathũa:

²⁷ nũndũ nĩyo wĩ nayo yoka ya kwĩvw’ĩka, nĩ ngũa yake ya kũvw’ika mwĩĩ wake: akakoma na kĩ? Na kũkeethĩwa, eĩngaĩla, ngeew’a; nũndũ nyie nĩ mũseo.

²⁸ Ndũkamũume Ngai, o na kũuma mũnene wa andũ maku.

²⁹ Ndũkekale mũno ũtekumya kĩlungu kya ngetha yaku, o na kya wingĩ wa syĩndũ syaku sya kũnyw’a. Ĩkithathi ananĩ maku aũme ũkanengae.

³⁰ Na mwĩĩka o ta ũu na ng’ombe syaku, na malondu maku: ĩkekale na nyinyia matukũ mũonza; mũthenya wa nyanya ũkanengae.

³¹ Na mũkeethĩwa andũ atheu kwakwa: kwondũ wa ũu mũtikaye nyama ya ĩla ĩlĩkĩle kĩthekanĩ nĩ nyamũ; mũkamĩkĩsya ngitĩ.