Salmo 28 - Manobo Western Bukidnon OT

Ampù para te Kebuyù te Tavang te Megbevayà

¹ Nengazen he iyan kutè ku. Ebpengumew a kenikew. Pemineǥa nu is ked-ampù ku! Su emun kenà a kenikew ebpemineǥen, ne megaan a ebpatey.

² Pemineǥa nu is hangyù ku te tavang diyà te kenikew, zutun te ziyà a medsinaru te segradu he valey nu he imbayew ku is menge velad ku.

³ Kenà a siluti zuma te menge lalung. Uvag dà sikandan ebpekid-emiǥu su mezaat is pelanu zan.

⁴ Belesi nu sikandan te sungkad te menge vaal zan. Siluti nu sikandan tenged te mezaat he menge vaal zan.

⁵ Su wazè dan seǥipaa is menge mibeelan nu. Umbe zezeeti nu sikandan ne veleǥaza nu en sikandan dutun te kebpekesavuk dan.

⁶ Nengazen, ereg ka he edeliǥen, su midineg nu is kebpehizuhizu ku kenikew.

⁷ Iyan ka mibeǥey kedì te zesen; iyan ka migkelasag kedì. Midsarig a kenikew ne edtevangan a kenikew. Umbe utew a melipayen ne migkanta a te peselamat diyà te kenikew.

⁸ Iyan ka, Nengazen, mibeǥey te zesen diyà te menge etew nu. Iyan ka melig-en he eputà wey menluluwas te pinilì nu.

⁹ Libriya nu wey tuvazi nu is menge etew he ǥaked nu. Bentayi nu sikandan he iring te ed-elima te kerehidu; etimana nu sikandan te wazà pidtemanan.