Panalambiton 2 - Maayong Balita nga Biblia (2012)

Ang Pagsilot sang Ginoo sa Jerusalem

¹ Ang Ginoo sa iya kaakig naglikop sang Sion sing kadulom. Ginbayluhan niya ang langitnon nga kadungganan sang mga ginub-an. Sa adlaw sang iya kaakig ginbayaan niya bisan ang iya Templo.

² Ginlaglag sang Ginoo nga wala sing luoyluoy ang tanan nga mga kabarangayan sang Juda, kag ginpangguba ang mga pamakod nga nagadepensa sang duta. Ginpakahuy-an niya ang ginharian kag ang mga pangulo sini.

³ Sa iya kasingkal ginguba niya ang kusog sang Israel; wala sia magtabang sa aton sang mag-abot ang mga kaaway. Nangakig sia sa aton kaangay sang kalayo nga nagasunog sang tanan.

⁴ Kaangay sang kaaway, ginpuntariya niya ang iya mga baslay sa aton. Ginpamatay niya ang tanan nga aton ginapabugal kag ginakalipayan. Diri sa Jerusalem mabatyagan naton ang iya nagabalingaso nga kaakig.

⁵ Kaangay sang kaaway, ang Ginoo naglaglag sang Israel; ginbilin niya nga guba ang mga pamakod kag ang mga palasyo. Nagdala sia sang kasubo sa mga tawo sang Juda sa walay katapusan.

⁶ Ginrumpag niya ang Templo sa diin ginsimba naton sia. Ginpauntat niya ang balaan nga mga adlaw kag mga Adlaw nga Inugpahuway. Ang hari kag ang pari nakabatyag sang iya tuman nga kaakig.

⁷ Ginsikway sang Ginoo ang iya altar kag ginbayaan ang iya balaan nga Templo; gintugotan niya ang kaaway sa pagguba sang mga pader sini. Nagsinggit sila sa pagdaog, sa diin sang una nagsimba kami sa kalipay.

⁸ Ang Ginoo nagpamat-od nga ang mga pader sang Sion mapukan; gintakos niya ini agod mahibal-an gid ang tanan nga kalaglagan. Ang mga tore kag mga pader yara nagapabilin nga guba.

⁹ Ang mga pwerta nalubong nga guba, ang mga trangka sini nagkalabali. Ang hari kag ang dungganon nga mga tawo karon ginbihag. Ang Kasugoan wala na ginatudlo, kag ang mga propeta wala na sing mga palanan-awon gikan sa Ginoo.

¹⁰ Sa duta ang mga katigulangan sang Jerusalem nagalingkod nga wala nagahambal, nga nagabutang sing yab-ok sa ila mga ulo kag nagabayo sing sako. Ang pamatan-on nga mga babayi sang Jerusalem nagaduko sang ila mga ulo sa duta.

¹¹ Ang akon mga mata nagapalangharok sa paghibi, ang akon kalag nagapangalisod. Tuman ang akon kasubo sa kalaglagan sang akon mga tawo. Ang mga kabataan kag mga lapsag nagakalipong sa mga kalsada sang siudad.

¹² Nagasinggit sila sa ila mga iloy sa kagutom kag kauhaw. Nagakatumba sila sa mga kalsada nga daw napilasan sila, kag inanay nga nagakalamatay sila sa sabak sang ila mga iloy.

¹³ O Jerusalem, siudad nga akon ginapalangga, ano bala ang akon isiling? Paano ang akon paglipay sa imo? Wala sing may nag-antos subong sini. Ang imo kalalat-an wala sing dulonan subong sang malapad nga dagat, kag wala sing paglaom.

¹⁴ Ang imo mga propeta wala sang iban nga ginahambal sa imo kundi mga kabutigan. Ang ila wali nagadaya sa imo kag wala nagapakilala sang imo kalautan. Nagapatalang sila sa imo paagi sa pagpakilala nga wala ka nagakinahanglan sang paghinulsol.

¹⁵ Ang mga tawo nga nagaagi sa siudad nagatulok sa imo nga may pagyaguta. Nagalungolungo sila sang ila mga ulo kag nagakadlaw sa ginub-an sang Jerusalem: “Amo bala ini ang matahom nga siudad? Amo bala ini ang bugal sang kalibutan?”

¹⁶ Ang tanan nimo nga mga kaaway nagayaguta kag nagatulok sa imo nga may pagdumot. Nagapanagmot kag nagapanagutsot sila kag nagasiling, “Ginlaglag namon ini! Amo ini ang adlaw nga amon ginahulat!”

¹⁷ Ginhimo sang Ginoo ang iya ginplano nga himuon: Ginlaglag niya kita nga wala sing kaluoy, suno sa iya ginpaandam sa aton sang una nga mga inadlaw. Ginpadaog niya ang aton mga kaaway; ginapahalipay sila tungod sa aton pagkapukan.

¹⁸ O Jerusalem, patawga ang imo mga pader sa Ginoo! Pailiga ang imo mga luha kaangay sang mga suba sa adlaw kag gab-i; indi ka mag-untat sa paghibi kag pagpangalisod!

¹⁹ Sa bug-os nga gab-i, indi ka mag-untat sa pagbangonbangon sa pagpanawag sa Ginoo; isugid ang tanan sa iya, kag magpakitluoy ka tungod sa imo mga kabataan nga nagakalipong sa gutom sa tagsa ka pamusod sang mga dalan!

²⁰ Tan-awa, O Ginoo! Ngaa nga ginasilutan mo kami kaangay sini? Ang mga babayi nagakaon sang mga lawas sang mga kabataan nga ila ginahigugma! Ang mga pari kag mga propeta ginapamatay sa Templo mismo!

²¹ Ang mga pamatan-on kag mga tigulang nagahalamyang nga patay sa mga dalan, pamatan-on nga mga lalaki kag mga babayi nga ginpamatay sang mga kaaway paagi sa mga espada. Ginpamatay mo sila nga wala sing kaluoy sa adlaw sang imo kaakig.

²² Gin-agda mo ang akon mga kaaway sa paghiwat sang kinasadya sang kakugmat sa bug-os ko nga palibot, kag sa sadto nga adlaw sang imo kaakig wala sing makapalagyo. Ginpamatay nila ang akon mga kabataan nga akon ginsagod kag ginpalangga.