Mateo 28 - Maayong Balita nga Biblia (2012)

Ang Pagkabanhaw

¹ Aga pa gid sang nahauna nga adlaw sang simana, sa tapos ang Adlaw nga Inugpahuway, nagkadto si Maria Magdalena kag ang isa pa ka Maria sa pagtan-aw sang lulobngan.

² Sa hinali naglinog sing mabaskog, kag ang isa ka anghel sang Ginoo nagkunsad halin sa langit. Iya ginpaligid ang bato nga nagatakop sa lulobngan kag iya ini ginpungkoan.

³ Ang iya dagway nagakirab subong sang kilat, kag ang iya bayu maputi gid kaayo.

⁴ Ang mga gwardya nagkulurog sa kakulba kag nagkalatumba nga nanginsubong sila sang patay nga mga tawo.

⁵ Ang anghel nagsiling sa mga babayi, “Indi kamo magkahadlok. Nakahibalo ako nga ginapangita ninyo si Jesus nga ginlansang sa krus.

⁶ Wala sia diri. Nabanhaw sia, suno sa iya ginsiling. Dali kamo diri kag tan-awa ang lugar nga ginpahamyangan sa iya.

⁷ Lakat kamo sing dalidali, kag sugiri ninyo ang iya mga gintuton-an: ‘Nabanhaw sia, kag karon magauna sia sa inyo sa Galilea. Didto makita ninyo sia!’ Indi pagkalimti ang ginsiling ko sa inyo.”

⁸ Gani naghalin sila sa lulobngan nga nagadalidali nga may kahadlok, pero puno sing kalipay, kag nagdalagan sila sa pagsugid sa iya mga gintuton-an.

⁹ Sa hinali ginsugata sila ni Jesus nga nagasiling, “Ang paghidait manginyara sa inyo.” Nagpalapit sila kay Jesus, ginhakos nila ang iya mga tiil kag nagsimba sila sa iya.

¹⁰ Si Jesus nagsiling sa ila, “Indi kamo magkahadlok. Lakat kamo kag sugiri ninyo ang akon mga sumolunod nga magkadto sila sa Galilea, kag didto makita nila ako.”

Mga Panugiron sang mga Gwardya

¹¹ Sang nakahalin ang mga babayi, ang iban sang mga gwardya nga nagabantay sang lulobngan nagkadto sa siudad kag nagpanugid sa pangulo nga mga pari sang tanan nga nahanabo.

¹² Nagsinapol ang pangulo nga mga pari kag ang mga katigulangan sang mga Judio, kag naghisugot sila sa paghatag sing madamo nga kwarta sa mga soldado,

¹³ kag ginsingganan sila, “Isugid ninyo sa mga tawo nga ang iya mga gintuton-an nag-abot sang kagab-ihon kag ginkawat nila ang iya bangkay samtang nagakatulog kamo.

¹⁴ Kag kon mabatian ini sang Gobernador, papatihon namon sia nga wala kamo sang kasaypanan. Indi kamo magpalibog.”

¹⁵ Ginkuha sang mga gwardya ang kwarta kag ginhimo nila ang ginsiling sa ila. Gani amo ini ang ginapalapnag nga sugid sa mga Judio tubtob sa sini nga adlaw.

Nagpakita si Jesus sa Iya mga Gintuton-an

¹⁶ Ang onse ka mga gintuton-an nagkadto sa isa ka bukid sa Galilea, sa diin si Jesus nagsiling nga magkadto sila.

¹⁷ Sang makita nila sia, nagsimba sila sa iya, bisan pa ang iban sa ila nagpangduhaduha.

¹⁸ Nagpalapit si Jesus sa ila kag nagsiling, “Ang bug-os nga awtoridad sa langit kag sa duta ginhatag sa akon.

¹⁹ Gani, kadtoi ninyo ang tanan nga mga tawo sa bug-os nga kalibutan kag himua sila nga mga gintuton-an ko. Bautisohi ninyo sila sa ngalan sang Amay kag sang Anak kag sang Espiritu Santo,

²⁰ kag tudloi ninyo sila sa pagtuman sang tanan nga ginsugo ko sa inyo. Kag magaupod ako sa inyo sa gihapon tubtob sa katapusan sang panag-on.”