Mateo 20 - Maayong Balita nga Biblia (2012)

Ang mga Manug-obra sa Talamnan sang Ubas

¹ “Ang Ginharian sang langit kaangay sang isa ka tawo nga naglakat sang aga pa sa pagpangita sing mga manug-obra nga masuholan para sa iya talamnan sang ubas.

² Nagsugot sia sa pagbayad sa ila sang minimo nga suhol sa isa ka adlaw, kag ginpadala niya sila sa pag-obra sa iya talamnan sang ubas.

³ Sang mga alas nwebe sa aga nagkadto sia liwat sa tiendahan kag nakita niya nga may mga tawo nga nagatilindog didto nga wala sing obra.

⁴ Gani nagsiling sia sa ila, ‘Lakat man kamo kag mag-obra sa akon talamnan sang ubas, kag suholan ko kamo sang nagakaigo.’

⁵ Gani naglakat sila. Amo man ang ginhimo niya sang mga alas dose kag sang mga alas tres sa hapon.

⁶ Sang mga alas singko na sa hapon nagkadto naman sia sa tiendahan kag may nakita pa gid sia nga mga tawo nga nagatilindog didto. Nagpamangkot sia sa ila, ‘Ngaa bala nagatilindog lang kamo diri sa bug-os nga adlaw nga wala sing obra?’

⁷ Nagsabat sila, ‘Kay wala man sing may nagpaobra sa amon.’ Nagsiling sia sa ila, ‘Kon amo ina, kadto man kamo kag mag-obra sa akon talamnan sang ubas.’

⁸ “Sang sirom na, nagsiling ang tag-iya sang talamnan sang ubas sa iya enkargado, ‘Tawga ang mga manug-obra kag suholi sila halin sa mga naulihi gid nga nag-obra tubtob sa mga nahauna.’

⁹ Ang tagsatagsa nga nag-ulobra sugod sang alas singko sa hapon ginbayaran sang minimo nga suhol.

¹⁰ Sang suholan na ang mga nahauna nga nag-ulobra, naghunahuna sila nga mas daku ang ila mabaton, pero ang tagsatagsa sa ila ginhatagan man sang minimo nga suhol.

¹¹ Ginbaton nila ang ila suhol ugaling nagkulomuron sila batok sa tag-iya,

¹² nga nagasiling, ‘Ining mga naulihi, nag-obra sila sing isa ka oras lang, samtang kami nag-obra sa bug-os nga adlaw sa nagatagiti nga init, pero pareho lang ang imo suhol sa amon!’

¹³ Ang tag-iya nagsabat sa isa sa ila, ‘Abyan, pamati ka! Wala ko ikaw gindayai. Indi bala nagkasugot kita sa minimo nga suhol?

¹⁴ Karon, kuhaa ang imo suhol, kag magpauli. Akon ini luyag nga suholan ining naulihi pareho sa ginsuhol ko sa imo.

¹⁵ Indi bala ako makapagusto kon ano ang himuon ko sang akon kwarta? Ukon nahisa ka bala tungod kay maalwan ako?’”

¹⁶ Dayon si Jesus nagsiling, “Gani ang mga naulihi mauna, kag ang mga nahauna maulihi.”

Ikatlo nga Paghambal ni Jesus Nahanungod sa Iya Kamatayon

¹⁷ Sang si Jesus nagataklad pakadto sa Jerusalem, ginpain niya ang dose ka mga gintuton-an, kag samtang nagalakat sila nagsiling sia sa ila nga silahanon lang,

¹⁸ “Pamati kamo, nagataklad kita pakadto sa Jerusalem sa diin ang Anak sang Tawo igatugyan sa pangulo nga mga pari kag mga manunodlo sang Kasugoan, kag ila sia pamatbatan sing kamatayon.

¹⁹ Dayon igatugyan nila sia sa mga Hentil nga magayaguta kag magabunal sa iya, kag magalansang sa iya sa krus, pero sa ikatlo nga adlaw pagabanhawon sia.”

Ang Pangabay sang Isa ka Iloy

²⁰ Dayon nagpalapit kay Jesus ang asawa ni Zebedeo upod sa iya duha ka mga anak nga lalaki kag nagluhod sia sa iya atubang, kag may ginpangabay.

²¹ Si Jesus nagpamangkot sa iya, “Ano bala ang luyag mo?” Nagsabat sia, “Ginapangabay ko nga kon maghari ka na, papungkua ining duha ko ka mga anak, ang isa sa imo tuo kag ang isa sa imo wala.”

²² Si Jesus nagsabat sa duha niya ka mga anak, “Wala kamo makahibalo sang inyo ginapangayo. Sarang bala kamo makainom sa kupa sang pag-antos nga akon pagaimnan sa indi na lang madugay?” Nagsabat sila, “Huo, sarang kami.”

²³ Nagsiling si Jesus sa ila, “Magainom kamo matuod sa kupa nga akon pagaimnan. Pero ang pagpapungko sa akon tuo ukon sa akon wala, indi ako ang magahatag sina. Ini nga mga pulongkuan para lamang sa ila nga gin-amanan sang akon Amay.”

²⁴ Sang pagkabati sini sang napulo ka mga gintuton-an naakig sila sa duha ka mag-utod.

²⁵ Gani gintawag sila tanan ni Jesus kag ginsingganan, “Inyo nahibaluan nga ang mga pangulo sang mga pagano may gahom sa ila mga sinakpan kag ang mga gamhanan may bug-os nga awtoridad sa ila.

²⁶ Pero indi manginsubong sini iya ang sa inyo. Kay kon may isa sa inyo nga luyag magpangulo, dapat sia magmanginsuloguon ninyo.

²⁷ Kag kon may isa sa inyo nga luyag mangin-una, dapat sia mangin-ulipon ninyo.

²⁸ Subong nga ang Anak sang Tawo wala mag-abot agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.”

Gin-ayo ni Jesus ang Duha ka Bulag

²⁹ Madamo nga mga tawo ang nagsunod kay Jesus sang sia kag ang iya mga gintuton-an nagapagwa sa Jerico.

³⁰ May duha ka bulag nga nagapungko sa higad sang dalan nga nakabati nga si Jesus nagaagi, gani nagsagad sila singgit, “Sir, Anak ni David! Kaluoyi kami!”

³¹ Ginsaway sila sang mga tawo kag ginsingganan nga maghipos. Pero nagsinggit pa gid sila sing mabaskog, “Sir, Anak ni David! Kaluoyi kami!”

³² Si Jesus nagdulog kag nagtawag sa ila. Ginpamangkot niya sila, “Ano bala ang luyag ninyo nga himuon ko sa inyo?”

³³ Nagsabat sila, “Sir, luyag kami nga makakita!”

³⁴ Si Jesus naluoy sa ila kag gintandog niya ang ila mga mata, kag sa gilayon nakakita sila kag nagsunod sa iya.