Mateo 2 - Maayong Balita nga Biblia (2012)

Ang mga Bisita halin sa Sidlangan

¹ Sang natawo na si Jesus sa banwa sang Betlehem nga sakop sang Judea sa panahon nga si Herodes ang hari, may nag-abot sa Jerusalem nga mga tawo halin sa Sidlangan, nga nakatuon sang mga bituon.

² Nagpamangkot sila, “Sa diin na bala ang bata nga natawo nga manginhari sang mga Judio? Nakita namon ang iya bituon sa sidlangan, kag nag-abot kami sa pagsimba sa iya.”

³ Sang pagkabati sini ni Haring Herodes natublag gid sia, subong man ang tanan nga mga tawo sa Jerusalem.

⁴ Gani ginpatawag niya ang tanan nga mga pangulo sang mga pari kag ang mga manunodlo sang Kasugoan kag nagpamangkot sia sa ila, “Sa diin bala matawo ang Cristo?”

⁵ Nagsabat sila, “Didto sa banwa sang Betlehem nga sakop sang Judea, kay amo ini ang ginsulat sang propeta:

⁶ ‘Kamo nga mga taga-Betlehem sa duta sang Juda, ang inyo banwa indi amo ang pinakakubos sa nagapanguna nga mga siudad sang Juda. Kay sa inyo katawhan magagikan ang isa ka pangulo nga magatuytoy sa akon mga tawo nga Israelinhon.’”

⁷ Dayon ginpatawag ni Herodes sing tago ang mga bisita halin sa Sidlangan kag nagpamangkot sing maid-id sa ila kon san-o gid nagpakita ang bituon.

⁸ Dayon ginpakadto niya sila sa Betlehem kag ginmanduan, “Lakat kamo kag pangitaa sing maid-id ang bata, kag kon inyo sia makita pahibal-a ninyo ako, agod makakadto man ako kag magsimba sa iya.”

^9-10 Sang mabatian nila ang ginsiling sang hari, naglakat sila. Sang nagapanglakaton sila, nakita nila ang bituon nga nakita nila anay sa Sidlangan. Nagkalipay gid sila sang makita nila ang bituon. Nag-una ini sa ila kag nagdulog sa ibabaw sang lugar sa diin nahamtang ang bata.

¹¹ Nagsulod sila sa balay kag nakita nila ang bata kaupod sang iya iloy nga si Maria. Nagluhod sila kag nagsimba sa bata. Dayon ginbuksan nila ang ila mga dala, kag nagdulot sila sa iya sang bulawan, insyenso, kag mira.

¹² Ginpaandaman sila sang Dios sa damgo nga indi sila magbalik kay Herodes, gani nagpauli sila paagi sa lain nga dalan.

Ang Pagpalagyo sa Ehipto

¹³ Sang makahalin na ang mga bisita, ang anghel sang Ginoo nagpakita kay Jose sa damgo kag nagsiling, “Bangon ka, dalha ang bata kag ang iya iloy kag magpalagyo kamo sa Ehipto. Pabilin kamo didto tubtob magsiling ako sa inyo nga maghalin kamo kay si Herodes magapapangita sang bata sa pagpatay sa iya.”

¹⁴ Gani si Jose nagbangon kag gindala ang bata kag ang iloy sini sa sina gid nga gab-i pakadto sa Ehipto,

¹⁵ sa diin sila nag-estar tubtob nga si Herodes napatay. Ini nahanabo agod matuman ang ginsiling sang Ginoo paagi sa propeta, “Gintawag ko ang akon anak nga lalaki halin sa Ehipto.”

Ang Pagpamatay sang mga Kabataan

¹⁶ Sang mahibal-an ni Herodes nga ginpalapaw sia sang mga bisita gikan sa Sidlangan, naakig gid sia. Nagmando sia nga pamatyon ang tanan nga mga bata nga lalaki sa Betlehem kag sa iya sini palibot nga mga banwa halin sa duha ka tuig paidalom, suno sa tion nga iya nahibal-an sa mga bisita kon san-o nagpakita ang bituon.

¹⁷ Sa sini natuman ang ginsiling ni Jeremias nga propeta:

¹⁸ “Isa ka tingog ang nabatian sa banwa sang Rama. Ang tingog sang pagpanalambiton kag paghinibi. Si Raquel nagahibi tungod sa iya mga kabataan, indi gid sia malugpayan, kay sila nagkalamatay.”

Ang Pagbalik gikan sa Ehipto

¹⁹ Sang napatay na si Herodes, ang anghel sang Ginoo nagpakita paagi sa damgo kay Jose nga didto sa Ehipto

²⁰ kag nagsiling, “Bangon ka, dalha ang bata kag ang iya iloy kag balik ka sa duta sang Israel kay patay na ang mga nagahingabot sa kabuhi sang bata.”

²¹ Gani si Jose nagbangon, gindala ang bata kag ang iloy sini, kag nagbalik sa duta sang Israel.

²² Pero sang pagkabati ni Jose nga si Arquelao nga isa sang mga anak ni Herodes nga amo na karon ang nagagahom sa Judea, nahadlok sia magkadto didto. Sa tapos sia mapaandaman sa damgo, nagkadto sia sa probinsya sang Galilea.

²³ Didto sia nag-estar sa banwa nga gintawag Nazaret, agod matuman ang ginsiling sang mga propeta, “Pagatawgon sia nga Nazareno.”