Levitico 27 - Maayong Balita nga Biblia (2012)

Mga Kasugoan Nahanungod sang mga Dulot sa Ginoo

¹ Ang Ginoo nagsugo kay Moises:

² “Ihambal ining masunod nga mga pagsulondan para sa mga tawo sang Israel. Kon ang isa ka tawo ginhatag sa akon sa pagtuman sang isa ka pinasahi nga saad, ina nga tawo sarang mahilway paagi sa pagbayad sang masunod nga mga balayran,

^3-7 suno sa opisyal nga talaksan: –Ang hamtong na nga lalaki, nga nagaedad sing baynte tubtob sa sesenta ka tuig: singkwenta ka bilog nga pilak –Ang hamtong na nga babayi: traynta ka bilog nga pilak –Ang pamatan-on nga lalaki, nga nagaedad sing lima tubtob sa baynte ka tuig: baynte ka bilog nga pilak –Ang pamatan-on nga babayi: napulo ka bilog nga pilak –Ang bata nga lalaki nga wala pa nagaedad sing lima ka tuig: lima ka bilog nga pilak –Ang bata nga babayi: tatlo ka bilog nga pilak –Ang lalaki nga nagaedad labaw sa sesenta ka tuig: kinse ka bilog nga pilak –Ang babayi nga nagaedad labaw sa sesenta ka tuig: napulo ka bilog nga pilak

⁸ “Kon ang tawo nga naghimo sing saad tama ka imol nga indi makabayad sang husto nga bili, dalhon niya ang amo nga tawo sa pari, kag ang pari magapanubo sang bili suno sa masarangan sang tawo sa pagbayad.

⁹ “Kon ang ginsaad isa ka sapat nga sarang mabaton subong isa ka halad sa akon, dayon ang tagsa ka dulot nga ginahimo sa akon manginbalaan,

¹⁰ kag ang tawo nga naghimo sang saad indi na makabaylo sing isa ka sapat sa pag-ilis sini. Kon iya ini himuon, ang duha ka mga sapat mangin-akon.

¹¹ Pero kon ang ginsaad isa ka sapat nga di-matinlo nga indi sarang mabaton subong isa ka halad sa akon, ang tawo magadala sang amo nga sapat sa pari.

¹² Ang pari magapabili sini, suno sa sahi sini, maayo ukon malain, kag ang iya ginapabili amo ang matuman.

¹³ Kon ang tawo luyag maggawad sini, kinahanglan bayaran niya ang bili sini kag magadugang sia sing baynte porsiento.

¹⁴ “Kon may isa ka tawo nga maghalad sang iya balay sa akon, ang pari magapabili sini suno sa sahi sini, maayo ukon malain, kag ang iya ginapabili amo ang matuman.

¹⁵ Kon ang naghalad sang balay luyag maggawad sini, kinahanglan bayaran niya ang bili, kag magadugang sia sing baynte porsiento.

¹⁶ “Kon ang isa ka tawo maghalad sang bahin sang iya duta sa akon, ang bili sini manginsuno sa kadamuon sang binhi nga sarang mapanggas sa sini nga duta, sa bili nga napulo ka bilog nga pilak sa tagsa ka tunga sa sako nga sebada.

¹⁷ Kon ihalad niya ang duta sa tapos gid ang Tuig sang Pagbalik, bayaran ini sing bug-os suno sa iya bili.

¹⁸ Kon ihalad niya ini sa ulihi sa bisan ano nga panahon, ang pari magapabili sini suno sa kadamuon sang tinuig nga nabilin tubtob sa madason nga Tuig sang Pagbalik, kag iya panuboan ang bili.

¹⁹ Kon ang tawo nga naghalad sang uma luyag maggawad sini, kinahanglan bayaran niya ang bili kag magadugang sia sing baynte porsiento.

²⁰ Kon ibaligya niya ang uma sa iban sa wala pa niya magawad ini sa akon, wala na sia sing kinamatarong sa paggawad sini.

²¹ Sa madason nga Tuig sang Pagbalik, ang uma mangin-akon pagkabutang sing dayon, mangin-iya ini sang mga pari.

²² “Kon ang isa ka tawo maghalad sa akon sang isa ka uma nga iya ginbakal,

²³ ang pari magapabili sini suno sa mga tinuig nga nabilin tubtob sa madason nga Tuig sang Pagbalik, kag ang amo nga tawo magabayad sang bili sa sina gid nga adlaw, ang kwarta mangin-iya sang Ginoo.

²⁴ Sa Tuig sang Pagbalik ang uma pagaiuli sa nahauna nga tag-iya ukon sa iya mga kaliwat.

²⁵ “Ang tanan nga bili manginsuno sa opisyal nga talaksan.

²⁶ “Ang panganay nga bata sang sapat mangin-akon, gani nga wala sing may maghalad sini sa akon subong isa ka halad nga kinabubot-on. Ang isa ka tinday nga baka, kordero ukon tinday nga kanding akon,

²⁷ pero ang panganay nga bata sang isa ka di-matinlo nga sapat sarang magawad sa opisyal nga bili kag magadugang sing baynte porsiento. Kon indi ini magawad sarang ini mabaligya sa iban suno sa opisyal nga bili.

²⁸ “Wala sing isa nga sarang makabaligya ukon makabakal sang ginhalad niya sing dayon sa akon, bisan ini isa ka tawo, isa ka sapat ukon duta. Akon ini sing dayon.

²⁹ Bisan gani ang isa ka tawo nga ginhalad sing dayon sa akon indi sarang magawad, kundi pagapatyon gid sia.

³⁰ “Ang ikapulo nga bahin sang tanan nga patubas sang duta, bisan ini mga uyas ukon mga prutas, akon.

³¹ Kon ang isa ka tawo luyag maggawad sang bisan ano sini nga mga butang, kinahanglan magbayad sia suno sa opisyal nga bili kag magadugang sia sing baynte porsiento.

³² Ang isa sang tagsa ka napulo nga sinagod nga mga hayop akon. Sa tapos maisip ang mga sapat, ang ikapulo akon.

³³ Indi niya pagpaiguigoon agod nga ang mapigaw nga mga hayop amo ang mapilian kag indi na niya sarang mabayluhan. Kon iya ini himuon, ang duha ka hayop mangin-akon kag indi na sarang magawad.”

³⁴ Amo ini ang mga sugo nga ginhatag sang Ginoo para sa mga tawo sang Israel paagi kay Moises sa Bukid sang Sinai.