Kanta 7 - Maayong Balita nga Biblia (2012)

Ang Lalaki

¹ Daw ano katahom sang imo mga tiil nga may mga sandalyas, ikaw ang labing matahom nga babayi! Ang korte sang imo mga paa kaangay sang binuhatan sang sampaton nga manug-obra.

² Ang imo pusod kaangay sang yahong nga indi mawad-an sang mahamot nga bino. Ang imo hawak kaangay sang binugkos nga trigo, nga nalibutan sang mga lirio.

³ Ang imo mga suso kaangay sang kapid nga usa, kaangay sang duha ka gasela.

⁴ Ang imo liog kaangay sang tore nga tiposo. Ang imo mga mata kaangay sang mga punong sa Hesbon, malapit sa pwerta sang daku nga siudad. Ang imo ilong subong katahom sang tore sang Libano nga nagatindog subong gwardya sa Damasco.

⁵ Ang imo ulo subong kataas sang Bukid sang Carmel. Ang imo sinalapid nga buhok madabong subong sang mapino nga purpora, ang katahom sini nagabihag sang hari.

⁶ Daw ano katahom sa imo, palangga ko, daw ano ka makawiwili ang imo paghigugma.

⁷ Ang imo tindog kaangay sang palma, kag ang imo mga suso subong sang iya pinungpong nga bunga.

⁸ Magasaka ako sa palma kag magpang-ipo sang iya bunga. Para sa akon ang imo mga suso kaangay sang pinungpong nga ubas, ang imo ginhawa mahamot subong sang mansanas,

⁹ kag ang imo baba kaangay sang labing maayo nga bino. Gani pailiga ang bino sa akon kahagugma, nga nagailig sa iya mga bibig kag mga ngipon.

Ang Babayi

¹⁰ Iya ako sang akon kahagugma, kag ginahandom niya ako.

¹¹ Dali, hinigugma ko, makadto kita sa kaumhan, kag magahigda kita sang isa ka gab-i sa talamnan sang ubas.

¹² Magamata kita sing aga pa sa pagtan-aw sang mga ubas kon nagapamukol na, kon nagapamukadkad na, kag tan-awon naton ang mga kahoy nga granada kon nagapamulak na. Didto ihatag ko sa imo ang akon gugma.

¹³ Masimhutan mo ang kahamot sang mandragora, kag ang tanan nga maayo nga mga prutas yara malapit sa aton pwertahan. Hinigugma ko, gintigana ko sa imo ang daan kag ang bag-o nga mga kawilihan.