Joel 3 - Maayong Balita nga Biblia (2012)

Ang Paghukom sang Dios sa mga Kapungsoran

¹ Ang Ginoo nagasiling, “Sa sadto nga tion pauswagon ko liwat ang Juda kag ang Jerusalem.

² Pagatipunon ko ang tanan nga mga kapungsoran kag dalhon sila sa Kapatagan sang Josafat. Didto pagahukman ko sila tungod sang tanan nga ginhimo nila sa akon nga mga tawo. Ginpaalaplaag nila ang mga Israelinhon sa iban nga mga kapungsoran kag ginpartida ang Israel nga akon duta.

³ Ginpagabutgabotan nila kon sin-o ang makaangkon sang mga bihag. Ginbaligya nila ang mga kabataan nga lalaki kag babayi agod mangin-ulipon bilang bayad sa mga malain nga mga babayi kag ilimnon.

⁴ “Ano bala ang inyo luyag himuon sa akon, O Tiro, Sidon kag bug-os nga Filistia? Luyag bala kamo sa pagbalos sa akon? Kon amo ina, balusan ko kamo sa labing madali!

⁵ Ginkuha ninyo ang akon pilak kag bulawan kag gindala ninyo ang akon mga manggad sa inyo mga templo.

⁶ Ginbihag ninyo ang mga pumoluyo sang Juda kag Jerusalem malayo sa ila kaugalingon nga pungsod kag ginbaligya sila sa mga Griego.

⁷ Karon kuhaon ko sila halin sa mga lugar nga inyo ginbaligyaan sa ila. Himuon ko sa inyo ang inyo ginhimo sa ila.

⁸ Ipabaligya ko ang inyo mga anak nga lalaki kag babayi sa mga taga-Juda. Ibaligya nila sila sa mga taga-Seba nga ang ila pungsod malayo. Ako, ang Ginoo, naghambal sini.

⁹ “Ipahibalo ini sa mga kapungsoran: ‘Maghanda para sa pag-away, tawga ang inyo mga hangaway, tipuna ang tanan ninyo nga mga soldado, kag magpalapit!

¹⁰ Salsala ang punta sang inyo mga arado nga mangin-espada kag ang inyo mga galab nga manginbangkaw. Bisan ang mga maluya dapat mag-away.

¹¹ Magdali kamo kag magpalapit, tanan kamo nga mga kapungsoran sa palibot, kag magtipon sa amo nga kapatagan.’” O Ginoo, padulhoga ang imo gamhanan nga mga hangaway sa pagsalakay sa ila!

¹² “Dapat maghanda ang mga kapungsoran kag magpadulong sa kapatagan sang Josafat. Didto, ako, ang Ginoo, magapungko sa paghukom sang tanan nga mga kapungsoran sa palibot.

¹³ Tama sila kalaut, gani galaba sila subong sang trigo sa tion sang tig-alani, linasa sila subong sang paglinas sang ubas sa pulogaan tubtob nga mag-awas ang bino.”

¹⁴ Linibulibo ang yara sa Kapatagan sang Paghukom. Didto magaabot ang adlaw sang Ginoo sa labing madali.

¹⁵ Madulom ang adlaw kag ang bulan, kag ang mga bituon indi na magsiga.

Ang mga Kaayuhan sang Dios nga Ginhatag sa Juda

¹⁶ Ang Ginoo nagangurob sa Bukid sang Sion, nagadaguob ang iya tingog gikan sa Jerusalem, nagakurog ang duta kag langit. Pero pagaapinan niya ang iya mga tawo.

¹⁷ “Dayon, O Israel, mahibaluan mo nga ako amo ang Ginoo nga inyo Dios. Nagaestar ako sa Sion, ang akon balaan nga bukid. Ang Jerusalem manginbalaan nga siudad, indi na gid sia pag-agawon liwat sang mga dumoluong.

¹⁸ Sa sadto nga tion ang mga bukid nahil-ob sang mga katamnan sang ubas, makita sa tanan nga mga bakulod ang mga hayop, may bugana nga tubig sa bug-os nga Juda. Ang isa ka sapa magailig gikan sa Templo sang Ginoo, kag magatubig ini sa Kapatagan sang Akasya.

¹⁹ “Ang Ehipto mangin-isa ka desierto, kag ang Edom malaglag kag manginwalay pulos, tungod kay ginsalakay nila ang duta sang Juda kag ginpamatay ang iya mga tawo nga wala sing sala.

^20-21 Magatimalos ako para sa mga ginpamatay, kag indi ko pagluwason ang mga nakasala. Ang Juda kag Jerusalem pagaestaran sa walay katubtoban, kag, ako, ang Ginoo, magaestar sa Bukid sang Sion.”