Hoseas 3 - Maayong Balita nga Biblia (2012)

Si Oseas kag ang Maluibon nga Asawa

¹ Ang Ginoo naghambal liwat sa akon. Siling niya, “Lakat kag higugmaa ang isa ka babayi nga may kahagugma na kag nagapanginlalaki. Higugmaa sia subong sang akon paghigugma sa mga tawo sa Israel, bisan nga nagasimba sila sa iban nga mga dios kag maluyag maghalad sing mga pasas sa mga diosdios.”

² Gani nagbayad ako sing kinse ka bilog nga pilak kag pito ka sako nga sebada sa pagbakal sa iya.

³ Ginsingganan ko sia nga sa malawig nga tion magaestar sia upod sa akon kag indi na magbaligya sang iya dungog. Indi sia magpakighilawas bisan kay sin-o, bisan pa sa akon.

⁴ Nagakahulogan ini nga sa malawig nga panahon ang mga tawo sang Israel magaestar nga wala sing mga hari ukon mga pangulo, wala sing mga halad ukon balaan nga mga haligi, wala sing mga diosdios ukon mga imahen nga gamiton sa paghibalo sang palaabuton.

⁵ Sa ulihi ang mga tawo sang Israel magabalik liwat sa Ginoo nga ila Dios, kag sa kaliwat ni David nga ila hari. Kon mag-abot ina nga tion, magatahod sila sa Ginoo, kag magabaton sang iya maayo nga mga dulot.