Genesis 7 - Maayong Balita nga Biblia (2012)

Ang Anaw

¹ Ang Ginoo nagsiling kay Noe, “Sulod ka sa arka upod sa bug-os mo nga panimalay. Nakit-an ko nga ikaw lang ang matarong sa sining mga tawo sang bug-os nga kalibutan.

² Dala ka sing pito ka pares sang tagsa ka matinlo nga sapat, pero isa lang ka pares sang tagsa ka di-matinlo nga sapat.

³ Magdala ka man sing pito ka pares sang tagsa ka sari sang pispis. Himua ini agod ang tagsa ka sari sang sapat kag pispis may mabilin nga buhi kag magamuad liwat sa duta.

⁴ Sa tapos sang pito ka adlaw halin karon magapadala ako sing ulan sa duta sa sulod sing kwarenta ka adlaw kag kwarenta ka gab-i agod sa paglaglag sang tanan nga buhi nga mga butang nga akon ginhimo.”

⁵ Kag gintuman ni Noe ang tanan nga ginsugo sa iya sang Ginoo.

⁶ Si Noe nagaedad sing 600 ka tuig sang mag-abot ang anaw sa duta.

⁷ Sia kag ang iya asawa, ang iya mga anak nga lalaki kag ang ila mga asawa nagsulod sa arka agod indi sila maano sang anaw.

⁸ Ang isa ka pares sang tagsa ka sari sang sapat kag pispis, matinlo ukon di-matinlo,

⁹ nagsulod sa arka upod kay Noe, suno sa ginsugo sang Dios.

¹⁰ Sang makaligad ang pito ka adlaw nag-abot ang anaw sa duta.

¹¹ Sang si Noe nagaedad sang 600 ka tuig, sang ika-17 sang ikaduha nga bulan, ang tanan nga mga tuboran sang malapad nga dagat sa idalom sang duta nabuhang kag ang mga alagyan sang tubig sa langit ginbuksan,

¹² kag nag-ulan sa duta sing kwarenta ka adlaw kag kwarenta ka gab-i.

¹³ Sa sadto gid nga adlaw, si Noe kag ang iya asawa, ang ila tatlo ka mga anak nga lalaki nga si Sem, si Ham, si Jafet kag ang ila mga asawa nagsulod sa arka.

¹⁴ Nag-upod sa ila ang tagsa ka sari sang mga sapat, talunon kag anta, magamay kag dalagku, kag ang tagsa ka sari sang mga pispis.

¹⁵ Ang isa ka pares sang tagsa ka buhi nga tinuga nagsulod sa arka upod kay Noe,

¹⁶ suno sa ginsugo sang Dios. Dayon gintakpan sang Ginoo ang pwertahan sang nakasulod na si Noe.

¹⁷ Nagpadayon ang pagbaha sa sulod sang kwarenta ka adlaw, kag ang tubig nagdalom nga sarang na makalutaw ang arka.

¹⁸ Ang tubig nagdalom pa gid kag ang arka nagpaanod sa tubig.

¹⁹ Nagdalom nga nagdalom pa gid ang tubig kag ang tanan nga labing mataas nga mga bukid nalapawan.

²⁰ Nagsigi pa gid dalom ang tubig tubtob nga naglapaw ini sing baynte singko ka tapak sa ibabaw sang mga bukid.

²¹ Ang tanan nga nagakabuhi sa duta nagkalamatay—ang tanan nga mga pispis, ang tanan nga mga sapat, kag ang tanan nga mga tawo.

²² Ang tanan nga mga nagaginhawa sa duta nagkalamatay.

²³ Ang Ginoo naglaglag sang tanan nga nagakabuhi sa duta, lakip ang mga tawo, ang mga sapat, kag ang mga pispis. Ang wala lang magkalamatay amo si Noe kag ang mga upod niya sa arka.

²⁴ Ang tubig wala magsugod sa paghubas sa sulod sang 150 ka adlaw.