Genesis 48 - Maayong Balita nga Biblia (2012)

Ginbendisyunan ni Jacob si Efraim kag si Manases

¹ Sang ulihi, si Jose ginsugiran nga ang iya amay nagamasakit. Gani gindala niya ang iya duha ka mga anak nga lalaki nga si Manases kag si Efraim kag nagbisita sila kay Jacob.

² Sang ginsugiran si Jacob nga yara si Jose sa pagbisita sa iya, nagtinguha sia sa pagpungko sa iya katre.

³ Si Jacob nagsiling kay Jose, “Ang Dios nga Makagagahom nagpakita sa akon sa Luz sa duta sang Canaan kag nagbendisyon sa akon.

⁴ Nagsiling sia sa akon, ‘Hatagan ko ikaw sing madamo nga mga kabataan, agod ang imo mga kaliwat manginmadamo nga mga pungsod. Ihatag ko ining duta sa imo mga kaliwat subong ila ginapanag-iyahan sa wala sing katubtoban.’”

⁵ Si Jacob nagsiling pa gid, “Ang imo duha ka mga anak nga lalaki nga natawo sa imo sa Ehipto sa wala pa ako makakadto diri, akon man sila. Si Efraim kag si Manases mangin-akon mga anak nga lalaki subong nga si Ruben kag si Simeon akon.

⁶ Pero ang mga kabataan nga matawo sa imo sa ulihi nila mangin-imo, kag sila magabaton sang palanublion halin kay Efraim kag kay Manases.

⁷ Ginahimo ko ini, tungod sa inyo iloy nga si Raquel. Daku gid ang akon kasubo sang napatay sia sa duta sang Canaan sang nagapabalik ako halin sa Mesopotamia, samtang malapit na kami sa Efrata. Ginlubong ko sia didto sa higad sang dalanon pakadto sa Efrata.” (Ang Efrata amo na karon ang Betlehem.)

⁸ Sang pagkakita ni Jacob sang mga anak nga lalaki ni Jose nagpamangkot sia, “Sin-o ining mga kabataan?”

⁹ Si Jose nagsabat, “Mga kabataan ko ini nga ginhatag sang Dios sa akon diri sa Ehipto.” Si Jacob nagsiling, “Kon mahimo dalha sila diri sa akon agod mabendisyunan ko sila.”

¹⁰ Ang panulok ni Jacob madulom na tungod sang iya katigulangon, kag indi na sia makakita sing maayo. Gindala ni Jose ang mga kabataan sa iya, kag ginhakos niya sila kag ginhalukan.

¹¹ Si Jacob nagsiling kay Jose, “Wala na gid ako maglaom nga makita ko pa ikaw liwat, pero karon ang Dios nagtugot nga makita ko pati ang imo mga anak.”

¹² Dayon ginkuha sila ni Jose sa sabak ni Jacob, kag nagsaludo sia nga ang iya guya nagduot tubtob sa duta sa atubang ni Jacob.

¹³ Ginbutang ni Jose si Efraim sa wala ni Jacob kag si Manases sa iya tuo.

¹⁴ Pero ginpalambid ni Jacob ang iya mga kamot, kag ginbutang niya ang iya tuo nga kamot sa ulo ni Efraim bisan nga manghod sia, kag ang iya wala nga kamot sa ulo ni Manases nga amo ang magulang.

¹⁵ Dayon ginbendisyunan niya si Jose nga nagasiling: “Kabay nga ang Dios, ang Dios nga gin-alagad sang akon mga ginikanan nga si Abraham kag si Isaac, magbendisyon sini nga mga kabataan! Kabay nga ang Dios, nga nagtuytoy sa akon tubtob karon nga adlaw, magbendisyon sa ila!

¹⁶ Kabay nga ang anghel nga nagluwas sa akon sa tanan nga katalagman, magbendisyon sa ila! Kabay nga ang akon ngalan, kag ang ngalan sang akon mga ginikanan nga si Abraham kag si Isaac pagadumdomon gihapon paagi sa ila! Kabay nga magdamo ang ila mga kabataan kag mga kaliwat!”

¹⁷ Naglain ang buot ni Jose sang pagkakita niya nga ang iya amay nagtungtong sang iya tuo nga kamot sa ulo ni Efraim. Gani, gin-uyatan niya ang kamot sang iya amay nga halinon kuntani halin sa ulo ni Efraim pakadto sa ulo ni Manases.

¹⁸ Nagsiling sia sa iya amay, “Tay, indi amo ina. Amo ini ang magulang. Itungtong ang imo tuo nga kamot sa iya ulo.”

¹⁹ Pero ang iya amay nagpamalibad nga nagasiling, “Nakahibalo ako, toto, nakahibalo ako. Ang mga kaliwat ni Manases mangingamhanan man nga mga tawo, pero ang iya manghod mas mangingamhanan pa sang sa iya, kag ang iya mga kaliwat mangingamhanan nga mga pungsod.”

²⁰ Gani, ginbendisyunan niya sila sadto nga adlaw nga nagasiling, “Ang mga Israelinhon magagamit sang inyo mga ngalan sa pagbendisyon. Magasiling sila, ‘Kabay nga ang Dios maghimo sa inyo subong kay Efraim kag kay Manases.’” Sa sini nga paagi gin-una ni Jacob si Efraim kay Manases.

²¹ Dayon si Jacob nagsiling kay Jose, “Tan-awa, madali na lang ako mapatay, pero ang Dios magaupod sa imo, kag pabalikon ka niya sa duta sang imo mga katigulangan.

²² Sa imo ko ginahatag ang Siquem, kag indi sa imo mga utod, inang pinili nga bahin sang duta nga akon ginkuha sa mga Amornon paagi sa akon espada kag pana.”