Genesis 47 - Maayong Balita nga Biblia (2012)

¹ Gani gindala ni Jose ang lima sang iya mga utod nga lalaki kag nagkadto sa hari. Nagsiling sia sa hari, “Ang akon amay kag ang akon mga utod nag-abot halin sa Canaan. Dala nila ang ila mga panong, mga kabakahan kag ang tanan nila nga mga pagkabutang. Yara sila subong sa duta sang Gosen.”

² Dayon ginpakilala niya sa hari ang iya lima ka mga utod nga lalaki.

³ Ang hari nagpamangkot sa ila, “Ano ang inyo palangitan-an?” Nagsabat sila, “Mahal nga hari, manugbantay kami sang mga karnero kasubong sang amon mga katigulangan.

⁴ Nag-abot kami sa pag-estar sa sini nga duta, tungod kay ang tiggulotom tama gid sa duta sang Canaan kag wala kami sing pahalban sang amon mga panong. Kon mahimo tugoti kami sa pag-estar sa duta sang Gosen.”

⁵ Ang hari nagsiling kay Jose, “Karon nga ang imo amay kag mga utod nag-abot,

⁶ ang duta sang Ehipto ila. Paestara sila sa duta sang Gosen, ang labing maayo nga bahin sang duta. Kag kon may yara sa ila nga sampaton, himua sila nga manugbantay sang akon mga kasapatan.”

⁷ Dayon gindala ni Jose ang iya amay nga si Jacob kag ginpakilala sia sa hari. Si Jacob nagbendisyon sa hari,

⁸ kag ang hari nagpamangkot sa iya, “Pila na ang edad mo?”

⁹ Si Jacob nagsabat, “Ang akon kabuhi nga pirme lang nagapanglugayaw naglambot na sa 130 ka tuig. Ang mga tinuig sa akon kabuhi diutay kag mabudlay, indi subong sang malawig nga mga tinuig sa pagpanglugayaw sang akon mga katigulangan.”

¹⁰ Kag ginpakamaayo ni Jacob ang hari kag naglakat.

¹¹ Dayon ginpaestar ni Jose ang iya amay kag iya mga utod sa duta sang Ehipto, kag ginhatagan niya sila sing labing maayo gid nga duta, malapit sa siudad sang Rameses, suno sa ginsugo sang hari.

¹² Si Jose nagsagod sa iya amay, mga utod, kag sang bug-os nga panimalay sang iya amay, lakip ang labing magamay gid.

Ang Tiggulotom

¹³ Ang tiggulotom tama gid kag ang bug-os nga duta nawad-an sing kalan-on. Ang mga katawhan sang Ehipto kag Canaan nagluya tungod sa gutom.

¹⁴ Gintipon ni Jose ang tanan nga kwarta nga gindalawat sang trigo sang mga tawo sang Ehipto kag Canaan kag gindala niya ang kwarta sa palasyo.

¹⁵ Sang maubos na ang tanan nga kwarta sa Ehipto kag Canaan, ang tanan nga mga Ehiptohanon nagkadto kay Jose kag nagsiling, “Hatagi kami sing kalan-on! Indi kami pagpabay-i agod indi kami magkalamatay! Ang amon kwarta naubos na.”

¹⁶ Si Jose nagsabat, “Dalha ninyo diri ang inyo mga hayop. Bayluhan ko ang inyo mga hayop sing pagkaon kon wala na kamo sing kwarta.”

¹⁷ Gani gindala nila kay Jose ang ila mga hayop, kag ginbayluhan niya sing kalan-on ang ila mga kabayo, mga karnero, mga kanding, mga baka kag mga asno. Sadto nga tuig ginbayluhan niya sing kalan-on ang tanan nila nga mga hayop.

¹⁸ Sang madason nga tuig nagkadto sila kay Jose kag nagsiling, “Sir, indi namon pagtaguon ang kamatuoran nga ang amon kwarta naubos na, kag ang amon mga hayop yara na sa imo. Wala na sing nabilin nga amon mahatag sa imo, luas sang amon mga lawas kag kadutaan.

¹⁹ Ikaw ang mahibalo agod indi kami magkalamatay kag indi mapatumbayaan ang amon kadutaan. Bakla kami kag ang amon kadutaan subong bayad sang kalan-on. Dayon mangin-ulipon kami sang hari, kag sia ang magapanag-iya sang amon kadutaan. Hatagi kami sing trigo agod indi kami mapatay sa gutom kag binhi agod matamnan namon ang amon kadutaan.”

²⁰ Ginbakal ni Jose ang tanan nga kadutaan sa Ehipto para sa hari. Ang tagsa ka Ehiptohanon napilitan sa pagbaligya sang iya duta, tungod kay ang gutom tama gid. Gani, ang bug-os nga kadutaan nangin-iya sang hari.

²¹ Ginhimo ni Jose ang mga katawhan nga mga ulipon sa bug-os nga duta sang Ehipto.

²² Ang wala lang niya mabakal nga duta amo ang iya sang mga pari. Indi na kinahanglan nga ibaligya pa nila ang ila mga duta, tungod kay ang hari naghatag sa ila sing rasyon nga ila pangabuhian.

²³ Si Jose nagsiling sa mga tawo, “Dumdoma ninyo nga ginbakal ko kamo kag ang inyo kadutaan para sa hari. Yari ang binhi nga inyo ipanggas sa inyo mga talamnan.

²⁴ Sa tion sang patubas ihatag ninyo sa hari ang isa sang lima ka bahin sang inyo patubas. Ang nabilin mangin-inyo, para binhi sa inyo palanggasan, kag para kalan-on ninyo kag sang inyo mga panimalay.”

²⁵ Nagsabat sila, “Sir, ginluwas mo ang amon kabuhi kag nagmaayo ka gid sa amon, gani, kami mangin-ulipon sang hari.”

²⁶ Gani, ginhimo ni Jose nga kasugoan para sa duta sang Ehipto nga ang isa sang lima ka bahin sang patubas dapat mangin-iya sang hari. Ini nga kasugoan nagapadayon tubtob karon. Ang mga duta lamang sang mga pari amo ang wala mangin-iya sang hari.

Ang Katapusan nga Pangabay ni Jacob

²⁷ Ang mga Israelinhon nag-estar sa Ehipto sa duta sang Gosen sa diin sila nagmanggaranon kag nagdamo ang ila mga kabataan.

²⁸ Si Jacob nag-estar sa Ehipto sing desi-siete ka tuig tubtob nag-edad sia sing 147 ka tuig.

²⁹ Sang nagahilapit na ang tion sang iya kamatayon, gintawag niya ang iya anak nga si Jose kag nagsiling sa iya, “Ibutang ang imo kamot sa gintung-an sang akon duha ka paa kag magsumpa ka sa akon nga indi mo ako pag-ilubong sa Ehipto.

³⁰ Luyag ko nga ilubong mo ako sa diin ang akon mga katigulangan ginlubong. Dalhon mo ako sa gwa sang Ehipto, kag ilubong mo ako sa ila lulobngan.” Si Jose nagsabat, “Himuon ko ang ginasiling mo.”

³¹ Si Jacob nagsiling, “Magsumpa ka sa akon nga himuon mo ang ginasiling ko.” Si Jose nagsumpa, kag si Jacob nagpasalamat didto sa iya katre.