Genesis 46 - Maayong Balita nga Biblia (2012)

Si Jacob kag ang Iya Panimalay Nagkadto sa Ehipto

¹ Gindala ni Jacob ang tanan niya nga mga pagkabutang kag nagkadto sa Beerseba, sa diin naghalad sia sing mga halad sa Dios sang iya amay nga si Isaac.

² Ang Dios naghambal sa iya sa isa ka palanan-awon sa kagab-ihon nga nagasiling, “Jacob, Jacob!” Nagsabat sia, “Yari ako.”

³ Ang Dios nagsiling, “Ako ang Dios, ang Dios sang imo amay. Indi ka magkahadlok sa pagkadto sa Ehipto. Pagahimuon ko didto ang imo mga kaliwat nga isa ka daku nga pungsod.

⁴ Magaupod ako sa imo sa Ehipto, kag pabalikon ko sa sini nga duta ang imo mga kaliwat. Si Jose manginyara sa imo tupad sa imo kamatayon.”

⁵ Si Jacob naghalin sa Beerseba. Ang mga anak niya nga lalaki nagpasakay sa iya upod sa ila magamay nga mga kabataan, kag sa ila mga asawa sa mga karo nga ginpadala sang hari sang Ehipto.

⁶ Gindala nila ang ila mga kasapatan kag ang mga pagkabutang nga ila naangkon sa Canaan, kag nagkadto sila sa Ehipto. Gindala ni Jacob ang tanan niya nga mga kaliwat:

⁷ ang iya mga kaanakan nga lalaki kag babayi kag mga kaapuhan man nga lalaki kag babayi.

⁸ Amo ini ang mga ngalan sang mga kaliwat ni Jacob nga nagkadto sa Ehipto. Ang iya kamagulangan nga anak nga amo si Ruben,

⁹ kag ang iya mga anak nga lalaki amo sanday Hanoc, Palu, Hezron kag Carmi.

¹⁰ Ang mga anak nga lalaki ni Simeon amo sanday Jemuel, Jamin, Ohad, Jaquin, Zohar, kag Shaul nga anak sang Canaanhon nga babayi.

¹¹ Ang mga anak nga lalaki ni Levi amo sanday Gerson, Kohat, kag Merari.

¹² Ang mga anak nga lalaki ni Juda amo sanday Er, Onan, Sela, Perez, kag Zera (pero si Er kag si Onan napatay sa duta sang Canaan). Ang mga anak nga lalaki ni Perez amo si Hezron kag si Hamul.

¹³ Ang mga anak nga lalaki ni Isacar amo sanday Tola, Puva, Job kag Simron.

¹⁴ Ang mga anak nga lalaki ni Zabulon amo sanday Sered, Elon, kag Jaleel.

¹⁵ Amo ini ang mga lalaki nga anak ni Lea kay Jacob sa Mesopotamia, wala labot kay Dina nga bata niya nga babayi. Ang mga kaliwat niya kay Lea trayntay tres tanan.

¹⁶ Ang mga anak nga lalaki ni Gad amo sanday Zifion, Hagi, Suni, Esbon, Eri, Arodi, kag Areli.

¹⁷ Ang mga anak nga lalaki ni Aser amo sanday Imna, Isva, Isvi, Berias, kag ang ila utod nga babayi nga si Sera. Ang mga anak nga lalaki ni Berias amo si Heber kag si Malquiel.

¹⁸ Ining desi-sais amo ang mga kaliwat ni Jacob kay Zilpa, ang suloguon nga babayi nga ginhatag ni Laban sa iya bata nga si Lea.

¹⁹ Ang mga anak nga lalaki ni Raquel nga asawa ni Jacob amo si Jose kag si Benjamin.

²⁰ Si Manases kag si Efraim amo ang mga anak nga lalaki ni Jose kay Asenat sa Ehipto. Si Asenat anak nga babayi ni Potifera nga pari sang On.

²¹ Ang mga anak nga lalaki ni Benjamin amo sanday Bela, Bequer, Asbel, Gera, Naaman, Ehi, Ros, Mupim, Hupim, kag Ard.

²² Ining katorse amo ang mga kaliwat ni Jacob kay Raquel.

²³ Ang anak nga lalaki ni Dan amo si Husim.

²⁴ Ang mga anak nga lalaki ni Neftali amo sanday Jazeel, Guni, Heser, kag Silem.

²⁵ Ining pito amo ang mga kaliwat ni Jacob kay Bilha, ang suloguon nga babayi nga ginhatag ni Laban sa iya bata nga si Raquel.

²⁶ Ang kadamuon sang mga kaliwat ni Jacob nga nagkadto sa Ehipto sesentay sais, wala labot ang mga asawa sang iya mga anak.

²⁷ Duha ka anak nga lalaki ang natawo kay Jose sa Ehipto, gani setenta tanan ang kabilogan sang panimalay ni Jacob nga nagkadto didto.

Si Jacob kag ang Iya Panimalay sa Ehipto

²⁸ Ginpauna ni Jacob si Juda sa pagpangabay kay Jose sa pagpakigkita sa ila sa Gosen. Sang pag-abot nila sa duta sang Gosen,

²⁹ amo man ang tion nga si Jose nagsakay sa iya karwahi, kag nagkadto sa Gosen sa pagpakigkita sa iya amay. Sang pagkitaay nila, ginhakos ni Jose ang iya amay, kag naghibi sia sing dugay gid samtang nagahakos sia sa iya.

³⁰ Si Jacob nagsiling kay Jose, “Karon handa na ako magtaliwan, tungod kay nakita ko na ikaw kag nakahibalo nga buhi ka pa.”

³¹ Dayon si Jose nagsiling sa iya mga utod kag sa bug-os nga panimalay sang iya amay, “Kinahanglan maglakat ako kag sugiran ang hari nga ang akon mga utod kag ang bug-os nga panimalay sang akon amay nga nag-estar sa Canaan, nag-abot sa akon.

³² Singganon ko sia nga mga manugbantay kamo sang mga panong, mga kasapatan kag gindala ninyo ang inyo mga karnero, mga baka kag ang tanan ninyo nga mga pagkabutang.

³³ Kon ipatawag kamo sang hari kag pamangkuton kon ano ang inyo palangitan-an

³⁴ kinahanglan magsabat kamo nga mga manugbantay kamo sang mga hayop halin sang magamay pa kamo, subong sang inyo mga katigulangan. Sa sini nga paagi, iya kamo paestaron sa duta sang Gosen.” Ginsiling niya ini tungod kay ang mga Ehiptohanon nahigkuan sa mga manugbantay sang mga karnero.