Genesis 35 - Maayong Balita nga Biblia (2012)

Ang Dios Nagbendisyon kay Jacob sa Betel

¹ Ang Dios nagsiling kay Jacob, “Maghimos ka kag magkadto gilayon sa Betel, kag didto mag-estar. Maghimo ka didto sing altar para sa akon, ang Dios nga nagpakita sa imo sang nagapalagyo ikaw sa imo utod nga si Esau.”

² Gani, si Jacob nagsiling sa iya panimalay kag sa tanan nga kaupod niya, “Ipamilak ang dumoluong nga mga diosdios nga yara sa inyo, dayon magpaninlo kamo kag magsuksok sing matinlo nga mga bayu.

³ Magahalin kita diri kag magakadto sa Betel, sa diin magahimo ako sing altar sa Dios nga nagbulig sa akon sa tion sang akon kabudlayan, kag nag-upod sa akon bisan diin ako magkadto.”

⁴ Gani, ginhatag nila kay Jacob ang tanan nga dumoluong nga mga diosdios nga yara sa ila, kag ginhatag man nila ang ila mga aritos nga ila ginasuksok. Ginlubong niya yadto sa idalom sang kahoy nga terebinto nga malapit sa Siquem.

⁵ Sang maghalin si Jacob kag ang iya mga anak nga lalaki, ang kahadlok halin sa Dios nag-abot sa mga tawo sa mga banwa sa palibot, kag wala nila ginlagas ang mga anak ni Jacob.

⁶ Si Jacob kag ang tanan niya nga mga tinawo nag-abot sa Luz, nga amo na karon ang Betel, sa duta sang Canaan.

⁷ Naghimo sia didto sing altar, kag ginhingalanan niya ang lugar para sa Dios sang Betel, tungod kay ang Dios nagpahayag sa iya didto sang nagpalagyo sia sa iya utod.

⁸ Si Debora nga manug-atipan ni Rebeca napatay kag ginlubong sia sa bagatnan sang Betel sa idalom sang kahoy nga terebinto. Gani, ginhingalanan ini “Terebinto sang Paghibi.”

⁹ Sang pagbalik ni Jacob halin sa Mesopotamia, ang Dios nagpakita sa iya liwat, kag ginbendisyunan niya sia.

¹⁰ Ang Dios nagsiling sa iya, “Ang ngalan mo si Jacob, pero sugod karon pagatawgon ka nga Israel.” Gani, ginhingalanan sia sang Dios kay Israel.

¹¹ Ang Dios nagsiling sa iya, “Ako ang Makagagahom nga Dios. Magbata ka sing madamo. Manginmadamo gid nga mga pungsod ang imo mga kaliwat, kag manginginikanan ikaw sang mga hari.

¹² Pagaihatag ko sa imo ang duta nga ginhatag ko kay Abraham kag kay Isaac, kag ihatag ko man ina sa imo mga kaliwat sa ulihi.”

¹³ Dayon ang Dios nagbiya sa iya.

¹⁴ Sa lugar sa diin ang Dios nagpakighambal sa iya, si Jacob nagpatindog sing bato nga handumanan, kag ginpakabalaan niya ini paagi sa pagbubo sing bino kag lana sang olivo sa ibabaw sang bato.

¹⁵ Ginhingalanan niya ang lugar Betel.

Ang Pagkapatay ni Raquel

¹⁶ Naghalin si Jacob kag ang iya panimalay sa Betel, kag sang wala pa sila makalambot sa Efrata ginsakitan si Raquel kay manugbata sia, kag tama gid ang iya pagpasakit.

¹⁷ Sang tudo na gid ang iya pagpasakit, ang paltera nagsiling sa iya, “Indi ka magkahadlok Raquel, isa naman ka lalaki ini.”

¹⁸ Pero tagumatayon na sia, kag sang wala pa mabugto ang iya ginhawa ginhingalanan niya ang iya anak nga lalaki Ben-oni, pero ang iya amay naghingalan sa iya Benjamin.

¹⁹ Sang pagkapatay ni Raquel, ginlubong sia sa higad sang dalan pakadto sa Efrata nga karon amo ang Betlehem.

²⁰ Si Jacob nagpatindog sing handumanan nga bato didto, kag amo ining tanda sang lulobngan ni Raquel tubtob karon.

²¹ Si Jacob nagpadayon kag nagpatindog sang iya kampo sa unhan sang tore ni Eder.

Ang mga Anak nga Lalaki ni Jacob

²² Sang si Jacob nagaestar sa sina nga duta, si Ruben nagpakighilawas kay Bilha, ang isa sang mga babayi ni tatay niya. Nabatian ini ni Jacob kag naakig gid sia. Si Jacob may dose ka mga anak nga lalaki.

²³ Ang mga anak ni Lea amo ang masunod: si Ruben, ang kamagulangan nga anak ni Jacob, si Simeon, si Levi, si Juda, si Isacar, kag si Zabulon.

²⁴ Ang mga anak nga lalaki ni Raquel amo si Jose kag si Benjamin.

²⁵ Ang mga anak ni Bilha nga suloguon ni Raquel amo si Dan kag si Neftali.

²⁶ Ang mga anak ni Zilpa nga suloguon ni Lea amo si Gad kag si Aser. Ini sila amo ang mga anak ni Jacob nga natawo sa Mesopotamia.

Ang Pagkapatay ni Isaac

²⁷ Si Jacob nagkadto sa iya amay nga si Isaac sa Mamre, malapit sa Hebron, sa diin si Abraham kag si Isaac nag-estar.

²⁸ Si Isaac nagaedad sing 180 ka tuig

²⁹ sang pagkapatay niya. Tigulang na gid sia sang mapatay kag ginlubong sia sang iya mga anak nga amo sanday Esau kag Jacob.