Genesis 33 - Maayong Balita nga Biblia (2012)

Si Jacob kag si Esau Nagkitaay

¹ Nakita ni Jacob nga si Esau nagapadulong upod sa iya 400 ka mga tinawo, gani ginpartida niya ang iya mga kabataan kay Lea, kay Raquel, kag sa duha niya ka mga babayi.

² Ginpauna niya ang duha niya ka mga babayi kag ang ila mga kabataan, madason si Lea kag ang iya mga kabataan, kag si Raquel kag si Jose sa ulihi.

³ Si Jacob nag-una sa ila kag nagsaludo sia sing makapito nga ang iya guya nagaduot sa duta samtang nagapalapit sia sa iya utod.

⁴ Pero si Esau nagdalagan sa pagsugata sa iya, kag naghakos kag naghalok sa iya. Naghibi sila nga duha.

⁵ Sang pagpanghulonghulong ni Esau nakita niya ang mga babayi kag mga kabataan, gani nagpamangkot sia, “Sin-o ining mga kaupod mo?” Si Jacob nagsabat, “Manong, amo ini ang mga kabataan nga tungod sa kaayo sang Dios ginhatag niya sa akon.”

⁶ Dayon nagpalapit ang iya mga babayi upod sa ila mga kabataan kag nagsaludo.

⁷ Ang madason nga nagpalapit amo si Lea kag ang iya mga kabataan, kag sa ulihi si Jose kag si Raquel nagpalapit kag nagsaludo man.

⁸ Si Esau nagpamangkot, “Ano yadtong isa ka grupo nga nasugata ko? Para bala sa ano yadto?” Si Jacob nagsabat, “Para yadto sa imo agod magmaayo ka sa akon.”

⁹ Pero si Esau nagsabat, “Madamo na ang akon pagkabutang, utod ko, imo na lang ina.”

¹⁰ Si Jacob nagsiling, “Sigi na, kon wala na gid ikaw sing kaakig sa akon batuna man ang ginaregalo ko sa imo. Karon nga maayo ka gid sa akon, pareho lang nga nagatulok ako sa nawong sang Dios sa akon pagtulok sa imo nawong.

¹¹ Batuna man ining regalo nga akon gindala para sa imo. Ang Dios maalwan gid sa akon kag ginhatagan niya ako sang tanan ko nga kinahanglanon.” Ginpilit gid niya si Esau tubtob ginbaton na lang niya ini.

¹² Si Esau nagsiling, “Maghanda na kita kag maglakat. Magauna lang ako sa imo.”

¹³ Si Jacob nagsabat, “Nakahibalo ka nga ang kabataan maluya pa, kag ang mga karnero kag ang mga baka may mga tinday nga akon atipanon. Kon patam-an sila sing lakat, bisan isa lang ka adlaw, ang bug-os nga kasapatan magkalamatay.

¹⁴ Kon mahimo, una ka lang sa akon, kag masunod ako sa imo sing hinayhinay lang suno sa kadasigon sang kasapatan kag kabataan tubtob malambot ko ikaw sa Edom.”

¹⁵ Si Esau nagsiling, “Ti, kon luyag mo, ibilin ko lang ang iban ko nga mga tinawo sa imo.” Pero si Jacob nagsabat, “Indi na ina kinahanglan. Ang akon lang luyag amo nga magmaayo ka sa akon.”

¹⁶ Gani sadto nga adlaw nagbalik si Esau sa Edom.

¹⁷ Pero si Jacob naglakat padulong sa Sucot, sa diin nagpatindog sia sang iya balay kag sing mga palasilungan sang iya mga kasapatan. Amo ina nga ang lugar ginhingalanan Sucot.

¹⁸ Si Jacob nag-abot nga wala man maano sa siudad sang Siquem sa duta sang Canaan, sang iya pagbalik halin sa Mesopotamia. Nagpahamtang sia sang kampo sa latagon nga malapit sa siudad.

¹⁹ Ginbakal niya ang bahin sadto nga duta sa mga kaliwat ni Hamor nga amay ni Siquem sang 100 ka bilog nga pilak.

²⁰ Nagpatindog sia sing altar didto, kag ginhingalanan niya yadto nga El, ang Dios ni Israel.